‘మా నిధులు నిలిపేయడం అనైతికం.. తిరిగివ్వండి’: అమెరికా సహా పలు దేశాలపై తాలిబన్లు అసహనం!

అఫ్గనిస్థాన్ గడ్డపై రెండు దశాబ్దాల సుదీర్ఘ యుద్ధాన్ని విరమించి తన సైన్యాలను అమెరికా ఉపసంహరించుకుంది. దీంతో మరోసారి అఫ్గన్‌‌లో తాలిబన్ల అరాచక పాలన కొనసాగుతోంది. ఓవైపు, తాలిబన్ల కఠిన ఆంక్షలు.. మరోవైపు ఆహారం, నగదు నిల్వలు ఖాళీకావడంతో తీవ్ర సంక్షోభంలోకి అఫ్గన్ జారుకుంది. ముఖ్యంగా అఫ్గన్‌ ఖజానాలో నగదు నిల్వలు పూర్తిగా నిండుకోవడంతో ఉద్యోగులకు జీతాలు ఇవ్వలేని పరిస్థితి. ఏటీఎంలో డబ్బులు ఉండట్లేదు. దీంతో ప్రజలు తీవ్ర ఇబ్బందులు ఎదుర్కొంటున్నారు. ఈ నేపథ్యంలో ప్రపంచవ్యాప్తంగా వివిధ బ్యాంకుల్లో ఉన్న తమ నిధులను తిరిగివ్వాలని తాలిబన్ల ప్రభుత్వం కోరుతోంది. అఫ్గన్‌లోని గత ప్రజా ప్రభుత్వాలు బిలియన్ల కొద్ది డాలర్లను అమెరికా, యూరప్‌లోని అనేక బ్యాంకుల్లో డిపాజిట్లు చేసింది. అయితే, అఫ్గనిస్థాన్‌ను స్వాధీనం చేసుకోవడంతో అమెరికా సహా పలు దేశాలు అప్రమత్తమై... ఆ డబ్బు తాలిబన్లకు అందకుండా స్తంభింపజేశాయి. దీంతో తమ డిపాజిట్లను తిరిగి ఇవ్వాలని తాలిబన్‌ ప్రభుత్వం అభ్యర్థిస్తోంది. ‘‘విదేశీ బ్యాంకుల్లోని ఆ డబ్బంతా అఫ్గనిస్థాన్‌‌కు చెందింది కాబట్టి మాకివ్వండి. అంతర్జాతీయ చట్టాలకు విరుద్ధంగా నగదు నిల్వలను నిలుపుదల చేయడం అధర్మం’’ అని అఫ్గన్‌ ఆర్థిక శాఖ ప్రతినిధి ఒకరు వ్యాఖ్యానించారు. తమ ప్రభుత్వం మహిళలకు విద్య సహా మానవ హక్కులను గౌరవిస్తుందని, మానవత్వంతో చేసే పనులకు నిధులు విడుదల చేయాలని ఆయన కోరారు. రోజువారీ పన్నుల ద్వారా 4.4 మిలియన్ డాలర్ల ఆదాయం మాత్రమే సమకూరుతోందని ఆయన తెలిపారు. మరోవైపు, నగదు నిల్వలు తగ్గిపోతుండటంతో పరిస్థితులు దారుణంగా మారుతాయని అఫ్గన్‌ సెంట్రల్‌ బ్యాంక్‌ బోర్డు సభ్యుడు షా మెహరబీ తెలిపారు. ‘అఫ్గన్‌లో ఈ ఆర్థిక సంక్షోభాన్ని నిలువరించాలంటే నెలకు 150 మిలియన్‌ డాలర్లు అవసరం.. ఈ ఏడాది చివరి వరకు సంక్షోభాన్ని ఎలాగోలా నెట్టుకురాగలం.. ఇదే పరిస్థితి కొనసాగితే ఐరోపాపై తీవ్ర ప్రభావం పడుతుంది.. వివిధ బ్యాంకుల్లో ఉన్న నగదును వినియోగించే అవకాశం ఇవ్వకపోతే అఫ్గన్‌ ప్రజలు యూరప్‌కే వలస వెళ్తారు’’అని మెహరబీ చెప్పారు. అఫ్గన్ డిపాజిట్లలో అధిక మొత్తం అమెరికాలోని బ్యాంకుల్లో ఉన్నాయి. అఫ్గన్‌కు చెందిన దాదాపు 9 బిలియన్‌ డాలర్లు ఉన్నా వాటిని విడుదల చేసేది లేదని అమెరికా కుండబద్దలు కొట్టింది. జర్మనీ కామర్జ్‌బ్యాంక్‌ వద్ద 431 మిలియన్‌ డాలర్లు, జర్మనీ సెంట్రల్‌ బ్యాంక్‌లో దాదాపు 94 మిలియన్‌ డాలర్లు ఉన్నాయి. స్విట్జర్లాండ్‌ బ్యాంకుల్లో దాదాపు 660 మిలియన్‌ డాలర్లు ఉన్నాయి. ‘‘ఈ నిల్వలను విడుదల చేయకపోతే అఫ్గన్‌లో దిగుమతులు తగ్గిపోతాయి. బ్యాంకింగ్‌ వ్యవస్థ కుప్పకూలిపోతుంది.. దుకాణాలు ఖాళీ అయి ఆహారం మరింత ప్రియం అవుతుంది’’ అని మెహరబీ ఆవేదన వ్యక్తం చేశారు. కాగా, అఫ్గన్ తాలిబన్ ప్రభుత్వాన్ని అంతర్జాతీయ సమాజం గుర్తించకపోవడంతో ఆ దేశానికి అందాల్సిన మానవతా సాయం కూడా నిలిచిపోయింది. మానవ హక్కులు, మహిళల హక్కుల విషయంలో తాలిబన్ల తీరుపై ఆందోళన వ్యక్తమవుతోంది. ఆగస్టులో అఫ్గన్‌ను ఆక్రమించుకున్న తర్వాత సమ్మిళిత ప్రభుత్వాన్ని ఏర్పాటుచేస్తామన్న తాలిబన్ల హామీలు ప్రకటనలకే పరిమితయ్యాయి. మహిళల విద్య విషయంలోనూ ఆంక్షలు కొనసాగుతున్నాయి.

By October 30, 2021 at 09:33AM

Read More https://telugu.samayam.com/latest-news/international-news/talibans-urges-to-us-and-european-banks-for-afghanistan-freezes-funds/articleshow/87385585.cms