Aryan Khan షారుఖ్ తనయుడు విడుదలకు రూ.25 కోట్ల డిమాండ్.. ప్రత్యక్ష సాక్షి సంచలన వ్యాఖ్యలు

బాలీవుడ్ బాద్‌షా కుమారుడు ఆర్యన్‌ ఖాన్‌ డ్రగ్స్‌ కేసు రోజుకో మలుపు తిరుగుతూ సినిమాను తలపిస్తోంది. ఆర్యన్‌ ఖాన్‌ను విడుదల చేయాలంటే రూ.25 కోట్ల ఇవ్వాలని అధికారులు డిమాండ్ చేసినట్టు ప్రభాకర్‌ సాయీల్‌ అనే ప్రత్యక్ష సాక్షి ఆదివారం సంచలన ఆరోపణలు చేశారు. ఈ మొత్తంలో రూ.8 కోట్లను ఎన్‌సీబీ జోనల్‌ డైరెక్టర్‌ సమీర్‌ వాంఖడేకు ఇవ్వాల్సి ఉందని మాట్లాడుకుంటుండగా విన్నానని తెలిపారు. అక్టోబరు 2న ముంబయి తీరంలోని నౌకలో రేవ్ పార్టీ జరుగుతుండగా ఎన్‌సీబీ అధికారులు దాడిచేసిన విషయం తెలిసిందే. ఈ సమయంలో అరెస్టైన ఆర్యన్‌ ఖాన్ జైల్లో ఉన్నాడు. అతడి బెయిల్ పిటిషన్‌పై నేడు తీర్పు వెలువడనుంది. ఈ నేపథ్యంలో ఎన్‌సీబీ దాడి జరిగే సమయంలో కేపీ గోసావి అనే వ్యక్తితో కలిసి తాను అక్కడకు వెళ్లానని ఎన్‌సీబీ తరఫున 9 మంది సాక్షుల జాబితాలో ఉన్న ప్రభాకర్‌ పేర్కొన్నారు. ఎన్‌సీబీ తరఫున మరో సాక్షిగా ఉన్న గోసావికి తాను సెక్యూరిటీగా పనిచేస్తున్నట్లు చెప్పారు. ఆర్యన్‌ను ఎన్‌సీబీ కార్యాలయానికి తీసుకొచ్చాక శామ్‌ డిసౌజా అనే వ్యక్తితో గోసావి ఫోన్‌లో మాట్లాడాడని, రూ.25 కోట్లు డిమాండ్‌ చేయాలని అతడికి చెబుతుండగా విన్నానని తెలిపాడు. చివరకు రూ.18 కోట్లకు డీల్ ఖరారు చేయాలని, అందులో రూ.8 కోట్లు వాంఖడేకు ఇవ్వాల్సి ఉందని కూడా డిసౌజాకు గోసావి తనకు చెప్పినట్టు వివరించారు. ఆ తర్వాత గోసావి, డిసౌజాలను షారుక్‌ మేనేజర్‌ పూజా దద్లానీ కలిశారని చెప్పాడు. ఆ తర్వాత ఇద్దరు వ్యక్తులు రూ.50 లక్షలు ఇవ్వగా.. అందులోని రూ.38 లక్షలు తిరిగి ఇచ్చాడని తెలిపారు. ఈ వివరాలన్నింటినీ తాను కోర్టుకు సమర్పించిన అఫిడవిట్‌లో పొందుపరిచానని అన్నారు. తనతో వాంఖడే, గోసావి 10 ఖాళీ పేపర్లపై సంతకాలు చేయించుకున్నారని ఆరోపించారు. ప్రస్తుతం గోసావి ఆచూకీ తెలియడం లేదని, అందుకే ప్రాణభయంతో తాను ఈ విషయాలను బయటపెట్టానని ప్రభాకర్ చెప్పారు. ఇక, 2018లో ఓ చీటింగ్‌ కేసుకు సంబంధించి గోసావికి పూణె పోలీసులు ఇటీవలే లుక్‌ అవుట్‌ నోటీసులు జారీ చేశారు. అయితే, ఎన్‌సీబీ ప్రతిష్ఠను దెబ్బతీయడానికే ప్రభాకర్‌ ఈ ఆరోపణలు చేస్తున్నాడని ఆ సంస్థ అధికారులు ఖండించారు.

By October 25, 2021 at 08:08AM

Read More https://telugu.samayam.com/latest-news/india-news/aryan-khan-drug-case-witness-allegations-payoff-ncb-officials-denies/articleshow/87247568.cms