తాలిబన్ల అడ్డాలో రెచ్చిపోయిన ఐఎస్ ఉగ్రవాదులు.. కాందహార్‌ మసీదు పేలుడులో 47 మంది మృతి
అఫ్గన్‌లో వరుసగా రెండో శుక్రవారం ముష్కరులు ఆత్మాహుతి దాడికి పాల్పడ్డారు. తాలిబన్లకు మొదటి నుంచి పట్టున్న కాందహార్‌‌లో వరుస బాంబు పేలుళ్ల ఘటనలో కనీసం 47 మంది ప్రాణాలు కోల్పోయారు. ఈ ఘటనలో మరో 70 మందికిపైగా గాయపడ్డారు. ఇమామ్ బార్గా మసీదులో శుక్రవారం ప్రార్థనలు కొనసాగుతుండగా తొలుత భారీ పేలుడు చోటు చేసుకుంది. షియా ముస్లింలే లక్ష్యంగా జరిగిన ఈ దాడిలో మసీదు ధ్వంసమైంది. పేలుడు ధాటికి అక్కడ మృతదేహాలు చెల్లాచెదురుగా పడి భీతావాహ పరిస్థితి నెలకుంది. తొలుత మసీదు ప్రధాన ద్వారం వద్ద, ఆ తర్వాత మసీదు దక్షిణ భాగంలో, మూడోది ప్రార్థనలకు ముందు కాళ్లు కడుక్కునే చోట పేలుళ్లు జరిగినట్టు ప్రత్యక్ష సాక్షులు తెలిపారు. షియా వర్గాన్ని టార్గెట్ చేసి ఉగ్ర మూకలు అఫ్గన్‌లో ఇలా బాంబు దాడులకు పాల్పడడం ఇది వరుసగా రెండో వారం. గత శుక్రవారం కుందుజ్ సిటీలో ఓ మసీదుపై ఐఎస్ ఉగ్రవాదులు ఆత్మాహుతి దాడికి పాల్పడిన ఘటనలో దాదాపు 100 మంది మృతిచెందారు. ఈ ఘటనపై తాలిబాన్ హోం మంత్రిత్వ శాఖ ప్రతినిధి సయ్యద్‌ ఖోస్తీ స్పందించారు. కాందహార్‌‌లోని షియా మసీదుపై జరిగిన దాడి తమను ఎంతో బాధించిందని ఆవేదన వ్యక్తం చేశారు. ఈ దాడిలో ప్రాణాలు కోల్పోయిన వారికి సంతాపం ప్రకటించారు. పేలుళ్ల గురించి సమాచారం అందుకున్న వెంటనే అఫ్గన్ స్పెషల్ ఫోర్సెస్‌ సంఘటనా స్థలానికి చేరుకుని దర్యాప్తు చేపట్టాయి. ఈ ఘటనకు బాధ్యులను పట్టుకుని, కఠినంగా శిక్షిస్తామని ప్రకటించారు. కాగా, ఈ దాడికి బాధ్యత వహిస్తూ ఇస్లామిక్ స్టేట్ ఉగ్రవాదులు ప్రకటన చేశారు. ఇమామ్ బార్గా మసీదులో ఆత్మాహుతి దాడికి తామే పాల్పడినట్టు వెల్లడించారు. మైనారిటీలైన షియా ముస్లింలను చాలా కాలం నుంచి ఐఎస్ ఉగ్రవాదులు టార్గెట్ చేసి దాడులకు పాల్పడుతున్నారు. అఫ్గన్‌ను తాలిబన్లు ఆక్రమించుకున్న తర్వాత కాబూల్ ఎయిర్‌‌పోర్ట్ సహా మరికొన్ని ప్రాంతాల్లో ఐఎస్-కే ఉగ్రవాదులు ఆత్మాహుతి దాడులకు పాల్పడ్డారు. తాలిబన్లకు గుండెకాయ వంటి కాందహార్లోనే ఈ దాడి జరగడంతో వారు ఉలిక్కిపడ్డారు. తాలిబన్ వ్యవస్థ ఇక్కడే పురుడు పోసుకోగా.. కీలక నిర్ణయాలను కాందహార్లోనే తీసుకుంటారు. అలాంటిది షియా ముస్లింలకు చెందిన మసీదులో ఐఎస్-కే పేలుళ్లకు తెగబడటం తాలిబన్లకు మింగుపడటం లేదు.
By October 16, 2021 at 07:09AM
No comments