తాలిబన్లకు పాక్ సహా మిత్రదేశాలు షాక్.. నేటి క్యాబినెట్ ప్రమాణస్వీకారం రద్దు!

అఫ్గన్‌లో సెప్టెంబరు 7 తాత్కాలిక ప్రభుత్వాన్ని ఏర్పాటుచేసిన తాలిబన్లు.. అమెరికాలో ట్విన్ టవర్స్‌పై అల్‌ఖైదా ఉగ్రవాదులు దాడిచేసిన సెప్టెంబరు 11 రోజునే మంత్రుల ప్రమాణస్వీకారం నిర్వహించాలని నిర్ణయించారు. ఈ కార్యక్రమానికి రష్యా, ఇరాన్, చైనా, ఖతార్, పాకిస్థాన్ వంటి దేశాలకు ఆహ్వానం పంపారు. అయితే, తాజాగా ప్రమాణస్వీకార కార్యక్రమాన్ని రద్దుచేసుకున్నారు. మిత్రపక్షాల నుంచి వచ్చిన ఒత్తిడి వల్లే కార్యక్రమాన్ని తాలిబన్లు రద్దుచేసుకున్నట్టు రష్యా అధికారిక మీడియా టాస్ వెల్లడించింది. అమెరికాలోని వరల్డ్ ట్రేడ్ సెంటర్, పెంటగాన్ భవనంపై అల్-ఖైదా ఉగ్రవాదులు 2001 సెప్టెంబరు 11న దాడులకు పాల్పడిన విషయం తెలిసిందే. ఈ దాడికి నేటితో 20 ఏళ్లు పూర్తయ్యింది. ఈ నేపథ్యంలో అదే రోజున తమ క్యాబినెట్ ప్రమాణస్వీకారం నిర్వహించాలని తాలిబన్లు నిర్ణయించినట్టు నివేదికలు వెలువడ్డాయి. క్యాబినెట్ ప్రమాణస్వీకారం వాయిదాపై అఫ్గన్ ప్రభుత్వ సాంస్కృతిక కమిషన్ సభ్యుడు ట్విట్టర్ ద్వారా వెల్లడించారు. ‘అఫ్గన్ కొత్త ప్రభుత్వ ప్రమాణస్వీకారం వేడుకను రద్దుచేశారు.. ప్రజలను మరింత గందరగోళానికి గురి చేయకుండా ఉండటానికి ఇస్లామిక్ ఎమిరేట్ నాయకత్వం క్యాబినెట్‌లో కొంత భాగాన్ని ప్రకటించింది.. ఇది ఇప్పటికే పని చేయడం ప్రారంభించింది’ అని సాంస్కృతిక కమిషన్ సభ్యుడు ఇనాముల్లా సమాంగనీ తెలిపారు. అయితే, ప్రమాణస్వీకారం జరిగే తదుపరి తేదీని తాలిబన్ల వెల్లడించలేదు. కార్యక్రమానికి హాజరుకాలేమని మిత్రపక్షాలు స్పష్టం చేసినట్టు తెలుస్తోంది. అమానవీయ ఘటన జరిగిన రోజున క్యాబినెట్ ప్రమాణస్వీకారం నిర్వహించడం ఏంటని అమెరికా తీవ్రంగా మండిపడింది. అలాగే, ఈ కార్యక్రమానికి హాజరుకావద్దని ఖతార్‌పై ఒత్తిడి చేసినట్టు తెలుస్తోంది. ఏదేమైనా 9/11 వార్షికోత్సవం సందర్భంగా ప్రారంభోత్సవ కార్యక్రమంలో పాల్గొనబోమని తాలిబన్ ప్రభుత్వానికి, పశ్చిమ దేశాలకు మధ్యవర్తిగా ఖతార్‌కు రష్యా తెలియజేసింది. మహిళల హక్కుల విషయంలో తాలిబన్లు కఠినంగా వ్యవహరిస్తున్నారు. తాత్కాలిక ప్రభుత్వంలోనూ వారికి చోటు కల్పించలేదు. ఈ విషయంలో నిరసన తెలుపుతున్నవారిని నిర్దాక్షిణ్యంగా అణచి వేస్తున్నారు. మరోవైపు.. దేశవ్యాప్తంగా ఆయా జైళ్లలో బందీలుగా ఉన్న వేలాది నేరస్థులను, తీవ్రవాదులను, తాలిబన్లను విడుదల చేస్తున్నారు. దీంతో వారికి శిక్షలు వేసిన జడ్జిలకు ప్రాణభయం పట్టుకుంది.

By September 11, 2021 at 08:39AM

Read More https://telugu.samayam.com/latest-news/international-news/taliban-cancel-government-inauguration-ceremony-slated-for-9/11-anniversary/articleshow/86109944.cms