కేరళలో మరోసారి నిఫా కలకలం.. వైరస్ సోకి 12 ఏళ్ల బాలుడు మృతి

కేరళలో మరోసారి విజృంభించడంతో ఆందోళన వ్యక్తమవుతోంది. నిఫా వైరస్‌ సోకిన 12 ఏళ్లు బాలుడు ఆస్పత్రిలో చికిత్స పొందుతూ మృతిచెందినట్టు ఆరోగ్య శాఖ మంత్రి వీణా జార్జ్ ఆదివారం ప్రకటించారు. కోజికోడ్‌కు చెందిన బాలుడు రక్త నమూనాలను పుణేలోని నేషనల్ వైరాలజీ ఇన్‌స్టిట్యూట్‌కు తరలించి పరీక్షించగా.. నిఫా పాజిటివ్‌ వచ్చిందని ఆమె తెలిపారు. మరోసారి నిఫా కలకలం రేగడంతో జాతీయ వ్యాధుల నియంత్రణ కేంద్రం బృందాన్ని కేంద్ర ప్రభుత్వం హుటాహుటిన కేరళకు పంపింది. ‘‘దురదృష్టవశాత్తూ బాలుడు ఆదివారం ఉదయం 5 గంటలకు చనిపోయాడు.. చిన్నారి పరిస్థితి శనివారం రాత్రి నుంచి విషమించింది.. బాధితుడితో కాంటాక్ట్ అయిన వ్యక్తులను గుర్తించే ప్రక్రియ ప్రారంభించాం.. ఇందు కోసం పలు బృందాలను ఏర్పాటుచేశాం.. సన్నిహితంగా మెలిగినవారిని గుర్తించి, ఐసోలేషన్‌కు తరలిస్తాం’’ అని తెలిపారు. బాలుడికి నిఫా వైరస్ సోకినట్టు శనివారం రాత్రే పుణే వైరాలజీ ల్యాబ్ ధ్రువీకరించిందని ఆమె చెప్పారు. ‘‘నాలుగు రోజుల కిందట విపరీతమైన జ్వరంతో ఆస్పత్రిలో చేరిన బాలుడి రక్త నమూనాలను శుక్రవారం సేకరించాం.. ప్లాస్మా, సీఎస్ఎఫ్, సీరమ్‌లోనూ నిఫా గుర్తించారు.. శనివారం నుంచి బాలుడు ఆరోగ్యం విషమించింది’ అని పేర్కొన్నారు. బాలుడితో సన్నిహితంగా మెలిగినవారికి ఎటువంటి లక్షణాలు కనిపించలేదన్నారు. దీనిపై ఆందోళన చెందాల్సిన అవసరం లేదని, పరిస్థితిని ఆరోగ్య శాఖ నిశితంగా గమనిస్తోందని మంత్రి అన్నారు. ప్రత్యేక అధికారులు సహా ప్రత్యేక బృందాలను నియమించామని తెలిపారు. బాధితుడ్ని తొలుత చికిత్స కోసం ఓ ప్రయివేట్ ఆస్పత్రికి తీసుకెళ్లారని, తర్వాత మెడికల్ కాలేజీకి తరలించి.. అక్కడ నుంచి మళ్లీ కార్పొరేట్ ఆస్పత్రికి తరలించారని వివరించారు. కాబట్టి ఈ మూడు చోట్ల అతడితో కాంటాక్ట్ అయినవారిని గుర్తించామన్నారు. కోజికోడ్ పొరుగు జిల్లాలు కన్నూర్, మలప్పురం అధికారులు అప్రమత్తంగా ఉండాలని మంత్రి హెచ్చరించారు. ఇక, మృతదేహాన్ని ఆదివారం ఖననం చేయనున్నట్టు ఆస్పత్రి వర్గాలు తెలిపాయి. తొలిసారిగా 2018 మే 19న కేరళలో నిఫా వైరస్ కేసు కోజికోడ్‌లోనే బయటపడింది. ఆ సమయంలో మొత్తం 17 మంది ప్రాణాలు కోల్పోయారు.

By September 05, 2021 at 10:19AM

Read More https://telugu.samayam.com/latest-news/india-news/a-boy-12-dies-of-nipah-virus-infection-in-kozhikode-of-kerala/articleshow/85942124.cms