Gisat-1 ఇస్రో జీఎస్ఎల్వీ ఎఫ్ 10 రాకెట్ ప్రయోగం విఫలం

భారత అంతరిక్ష పరిశోధన సంస్థ () జియో సింక్రోనస్‌ శాటిలైట్‌ లాంచ్‌ వెహికల్‌ (జీఎస్‌ఎల్‌వీ)-ఎఫ్‌10 ప్రయోగం విఫలమయ్యింది. నెల్లూరు జిల్లా శ్రీహరికోటలోని సతీష్‌ ధావన్‌ స్పేస్‌ సెంటర్‌ నుంచి గురువారం ఉదయం 5.43 గంటలకు జీఎస్‌ఎల్‌వీ ఎఫ్‌10ని ప్రయోగించారు. బుధవారం ఉదయం 3.43 గంటల నుంచి ప్రారంభమైన కౌంట్‌డౌన్.. నిరంతరాయంగా 26 గంటల కొనసాగాక వాహకనౌక నింగిలోకి వెళ్లింది. అయితే, జీఎస్ఎల్వీ ఎఫ్-10 వాహకనౌక నిర్దేశిత కక్ష్యలోకి చేరడంలో విఫలమయ్యింది. రెండు దశల వరకు విజయవంతంగా నిగ్గిలోకి దూసుకెళ్లిన రాకెట్‌‌లో క్రయోజనిక్ అప్పర్ స్టేజ్ దగ్గర సాంకేతిక సమస్య తలెత్తింది. దీంతో ప్రయాణించాల్సిన మార్గంలో కాకుండా మరో మార్గంలో జీఎస్ఎల్వీ పయనించింది. ఈ క్రమంలో తీవ్ర నిరాశకు గురయిన ఇస్రో శాస్త్రవేత్తలు.. లైవ్‌సోర్స్‌ను నిలిపి వేశారు. జీఎస్ఎల్వీ మిషన్ విఫలమైనట్టు ఇస్రో ఛైర్మన్ శివన్ ప్రకటించారు. ఈ ప్రయోగం ద్వారా జీఐశాట్‌-1 ఉపగ్రాహన్ని భూమికి 36 వేల కిలోమీటర్ల ఎత్తున భూస్థిర కక్ష్యలో ప్రవేశపెట్టాలని ఇస్రో శాస్త్రవేత్తలు భావించారు. కానీ, అనుకున్న లక్ష్యం నెరవేరలేదు. భారత భూపరిశీలన ఉపగ్రహాల్లో కీలకంగా భావిస్తోన్న జీఐశాట్-1 గతేడాది మార్చిలోనే ప్రయోగించాలని నిర్ణయించారు. అయినప్పటికీ సాంకేతిక సమస్యలతో ఈప్రయోగం రెండు సార్లు వాయిదా పడింది. మార్చి 5, 2020న జీఎస్‌ఎల్‌వీ-ఎఫ్‌10 రాకెట్ ప్రయోగం చివరి నిమిషంలో వాయిదా పడింది. ఈ ప్రయోగానికి సంబంధించి కౌంట్‌డౌన్‌కు పది నిమిషాల ముందే సాంకేతిక కారణాలతో ప్రయోగాన్ని వాయిదా వేశారు. సుమారు 2,275 కిలోల బరువున్న అత్యాధునిక భూ పర్యవేక్షిత ఉపగ్రహం. దేశ రక్షణ వ్యవస్థకు తోడ్పాటునందించడంతోపాటు విపత్తుల సమాచారాన్ని ముందుగా తెలుసుకోవడమే జీశాట్ ముఖ్య ఉద్దేశం. ఈ రిమోట్ సెన్సింగ్ శాటిలైట్‌ను తొలిసారిగా భూస్థిర కక్ష్యలోకి పంపాలని ఇస్రో భావించింది. నాలుగు మీటర్ల వ్యాసం కలిగిన ఓగివ్ ఆకారంలో ఉండే పేలోడ్ ఫెయిరింగ్‌ను జీఎస్ఎల్వీ రాకెట్‌లో తొలిసారి వినియోగించారు. జీఎస్ఎల్వీలో ఇది 14 ప్రయోగం. ప్రయోగం విజయవంతమై ఉంటే రాకెట్ ప్రయాణం ప్రారంభించి 18 నిమిషాల త‌ర్వాత జీశాట్‌-1 ఉప‌గ్ర‌హం... జీటీవో క‌క్ష్య‌లోకి చేరుకునేది. భూమికి సుమారు 36వేల కిలోమీట‌ర్ల దూరంలో ఉన్న జియోస్టేష‌న‌రీ ఆర్బిట్‌లో ఉంచాలని చేసిన ప్రయత్నం విఫలమయ్యింది. జీశాట్-1 ఉప‌గ్ర‌హం ఏడేళ్ల పాటు ప‌నిచేసేలా రూపొందించారు.

By August 12, 2021 at 06:47AM

Read More https://telugu.samayam.com/latest-news/science-technology/isro-earth-observation-satellite-gisat-1-fails-to-put-in-orbit/articleshow/85260253.cms