Tauktae Landfall ఐదు రాష్ట్రాల్లో బీభత్సం.. తీరం దాటుతూ బలహీనపడ్డ తౌక్టే
అరేబియా సముద్రంలో ఏర్పడిన ‘తౌక్టే’పెను తుఫాను పశ్చిమ తీరంలోని ఐదు రాష్ట్రాల్లో విధ్వంసం సృష్టించింది. కేరళను కకావికలం చేసి, కర్ణాటకలో కల్లోలం రేపిన తౌక్టే.. మహారాష్ట్ర, గుజరాత్లతో పాటు గోవా తీర ప్రాంతాలపై పెను ప్రభావం చూపించింది. సోమవారం రాత్రి పొద్దుపోయాక గుజరాత్లోని సౌరాష్ట్ర, డయ్యూ డామన్ మధ్య వద్ద తీరాన్ని తాకింది. రాత్రి 9.30 గంటలకు తీరాన్ని దాటిన తుఫాను.. అర్ధరాత్రి 12 గంటల వరకు కొనసాగినట్టు భారత వాతావరణ విభాగం పేర్కొంది. అనంతరం పెను తుఫాను నుంచి తీవ్ర తుఫానుగా బలహీనపడినట్టు తెలిపింది. తుఫాను తీరాన్ని తాకినప్పుడు గంటకు 185 కి.మీ. వేగంతో బలమైన గాలులు వీచాయి. ఒక్క గుజరాత్లోనే రెండు లక్షలమంది లోతట్టు ప్రాంత ప్రజల్ని సురక్షిత ప్రాంతాలకు తరలించారు. ఎన్డీఆర్ఎఫ్, ఎస్డీఆర్ఎఫ్ బలగాలను రంగంలోకి దించారు. ముంబయిలో కుంభవృష్టి కురిసింది. గంటకు 20 కి.మీ. చొప్పున కదులుతూ సౌరాష్ట్ర తీరంలో రాత్రి 9.30 గంటలకు భూమిని తాకి తీరాన్ని దాటడానికి 3 గంటల సమయం తీసుకుంది. తౌక్టే ధాటికి అరేబియా సముద్రంలో రెండు నౌకలు లంగర్లను తెంచుకుని కొట్టుకుపోయాయి. కోస్ట్గార్డ్ దళాలు తక్షణమే సహాయక చర్యలు చేపట్టడంతో అందులోని 410 మందిని సురక్షితంగా బయటపడ్డారు. ముంబయి విమానాశ్రయాన్ని కొన్ని గంటల మూసివేశారు. మహారాష్ట్రలోని కొంకణ్ తీరంలో వేర్వేరు ఘటనల్లో ఆరుగురు ప్రాణాలు కోల్పోగా, రెండు పడవలు నీట మునిగి ముగ్గురు నావికులు గల్లంతయ్యారు. కర్ణాటకలో మొత్తం 8 మంది ప్రాణాలు కోల్పోయారు. తుఫాను ప్రభావిత రాష్ట్రాల ముఖ్యమంత్రులతో ప్రధాని నరేంద్రమోదీ ఫోన్లో మాట్లాడారు. సహాయక చర్యలకు త్రివిధ దళాలు రంగంలోకి దిగాయి. నౌకలు, గజ ఈతగాళ్లు, సహాయక సామగ్రిని యుద్ధ ప్రాతిపదికన తరలించారు. పోర్బందర్లోని ప్రభుత్వాసుపత్రి ఐసీయూలో వెంటిలేటర్పై ఉన్న 17 మంది కొవిడ్ బాధితుల్ని ముందు జాగ్రత్త చర్యల్లో భాగంగా ఇతర ఆసుపత్రులకు హుటాహుటిన తరలించారు. కొచ్చి తీరానికి 35 నాటికల్ మైళ్ల దూరంలో ప్రమాదంలో చిక్కుకున్న 12 మంది మత్స్యకారులను ఇండియన్ కోస్ట్గార్డ్ రక్షించింది. తుఫాను తీవ్రతకు గుజరాత్లో పెద్దఎత్తున చెట్లు నేలకూలాయి. భావ్నగర్ జిల్లాలో కొన్ని ప్రాంతాలకు ఆదివారం రాత్రి నుంచి విద్యుత్తు సరఫరా నిలిచిపోయింది. ఈ జిల్లాలోని ఘోఘా ఓడరేవులో 9వ నంబరు అతి ప్రమాద హెచ్చరిక జెండాను ఎగరవేశారు.
By May 18, 2021 at 07:00AM
No comments