Miss Universe విశ్వసుందరిగా మెక్సికో భామ ఆండ్రియా.. మూడో రన్నరప్‌గా భారత అమ్మాయి
మిస్ యూనివర్స్ 2021గా మెక్సికో యువతి ఆండ్రియా మేజ్ (26) ఎంపికయ్యారు. అమెరికాలోని ఫ్లోరిడా వేదికగా ఆదివారం జరిగిన ఈ అందాల పోటీల్లో 70 దేశాలకు చెందిన అమ్మాయిలు పోటీపడ్డారు. ఈ పోటీల్లో ఆండ్రియా మేజ్ తొలి స్థానంలో నిలవగా.. ఫస్ట్ రన్నరప్‌గా బ్రెజిల్ సుందరి, రెండో రన్నరప్‌గా పెరూ యువతి నిలిచారు. ఈ పోటీలో పాల్గొన్న భారతీయ యువతి అడ్డైన్ క్యాస్టిలినో మూడో రన్నరప్‌గా నిలవడం విశేషం. కరోనా కారణంగా గతేడాది మిస్ యూనివర్స్ పోటీలను రద్దుచేసిన విషయం తెలిసిందే. మియామి, ఫ్లోరిడాలోని సెమినోల్ హార్డ్ రాక్ హోటల్, క్యాసినో హాలీవుడ్‌లో ఈ పోటీలు నిర్వహించారు. విజేతగా నిలిచిన ఆండ్రియా మేజ్‌కు 2019 మిస్ యూనివర్స్ జోజిబిని తుంజీ కిరీటం అలంకరించారు. వృత్తిరీత్యా సాఫ్ట్‌వేర్ ఇంజనీర్‌ అయిన ఆండ్రియా లింగ హింసకు వ్యతిరేకంగా పోరాడుతున్నారు. మిస్ యూనివర్స్ కిరీటం దక్కించుకున్న మూడో మెక్సికన్ మహిళగా ఆండ్రియా రికార్డు నెలకొల్పారు. భారత్‌కు ప్రాతినిధ్యం వహించిన అడ్డైన్ క్యాస్టెలినో తల్లిదండ్రులది కర్ణాటక కాగా.. ఆమె కువైట్‌లో పుట్టి పెరిగారు. తాను ఒకానొక సందర్భంలో తనకు బెదిరింపులు ఎదురయ్యాయని మిస్ యూనివర్స్ ఇండియాగా ఎంపికైన తర్వాత ఆడ్లైన్ తెలిపారు. పోటీల్లో చివర వరకూ గట్టిపోటీ ఇచ్చారు. టాప్-5లో చోటుదక్కించుకున్నారు. ఈ పోటీల్లో పాల్గొన్న మిస్ మాయన్మార్ తుజార్ వింట్ ల్విన్ ప్రత్యేక ఆకర్షణగా నిలిచారు. తమ దేశంలో సైన్యం దురాగతాలను ఈ వేదికపై ప్రస్తావించి అందరి దృష్టినీ ఆకర్షించారు. ‘‘సైన్యం జరుపుతున్న కాల్పుల్లో తమ పౌరులు రోజూ ప్రాణాలు కోల్పోతున్నారు.. ప్రతి ఒక్కళ్లూ మాయన్మార్ గురించి మాట్లాడాలని అభ్యర్థిస్తున్నాను’’ అని అన్నారు. ఈ పోటీల్లో తుజార్ బెస్ట్ నేషనల్ కాస్ట్యూమ్‌ అవార్డును గెలుచుకున్నారు. పోటీల్లో భాగంగా గురువారం జరిగిన వస్త్రధారణ అంశంలో ఆమె సంప్రదాయ మాయన్మార్ దుస్తులు ధరించి, న్యాయనిర్ణేతల ప్రశంసలు పొందారు. ఈ ఏడాది ఫిబ్రవరి 1 న మాయన్మార్‌లో ప్రభుత్వాన్ని కూలదోసి సైన్యం అధికారం హస్తగతం చేసుకుంది. అప్పటి నుంచి సైన్యానికి వ్యతిరేకంగా ప్రజలు ఆందోళన చేస్తున్నారు. ఈ నిరసనలో పాల్గొన్న పౌరులపై సైన్యం జరుపుతున్న కాల్పుల్లో ఇప్పటి వరకూ 796 మంది ప్రాణాలు కోల్పోయారు.
By May 17, 2021 at 12:01PM
No comments