Mamata Banerjee మంత్రులకు హైకోర్టు షాక్.. ఆ ఇద్దరి సంగతేంటన్న TMC
నారదా టేపుల వ్యవహారంలో ఇద్దరు తృణమూల్ కాంగ్రెస్ మంత్రులు, ఓ ఎమ్మెల్యే, ఆ పార్టీకి చెందిన మాజీ నేతను సీబీఐ సోమవారం అరెస్ట్ చేసిన విషయం తెలిసిందే. టీఎంసీ నేతలకు సీబీఐ న్యాయస్థానం ప్రత్యేక బెయిల్ మంజూరు చేయగా.. దీనిపై మధ్యంతర ఉత్తర్వులు జారీచేసింది. ఇదిలా ఉండగా ఎమ్మెల్యే మదన్ మిత్రా, సోవన్ ఛటర్జీల మంగళవారం ఉదయం వైద్య పరీక్షల కోసం ఆస్పత్రికి తరలించారు. శాశ్వ సంబంధిత సమస్యలతో ఎస్ఎస్కేఎం ఆసుపత్రిలో చేర్చారు. ఉదయం 3 గంటల ప్రాంతంలో అస్వస్థతకు గురికావడంతో ఆస్పత్రికి తరలించినట్టు అధికార వర్గాలు తెలిపాయి. సోమవారం ఉదయం నలుగురి నేతలను అరెస్ట్ చేసి భారీ భద్రత నడుమ కోల్కతాలో నిజాం ప్యాలెస్లోని తమ కార్యాలయానికి సీబీఐ తరలించింది. మంత్రులను అరెస్ట్ చేయడంపై సీఎం అగ్గిమీద గుగ్గిలమయ్యారు. ఆమె నేరుగా సీబీఐ కార్యాలయానికి చేరుకుని నిబంధనలు పాటించకుండా ఎలా అరెస్టు చేస్తారని ప్రశ్నించారు. తనను కూడా అరెస్ట్ చేయాలని సీబీఐకి సవాల్ విసిరారు. నేతల కుటుంబసభ్యులు, పెద్ద ఎత్తున టీఎంసీ నేతలు కూడా చేరుకుని ఆందోళన నిర్వహించారు. తన అరెస్ట్పై మంత్రి ఫర్హీద్ హకీమ్ మాట్లాడుతూ.. న్యాయస్థానంపై తనకు నమ్మకం ఉందని, మమ్మల్ని వేధించడానికి బీజేపీ ఏదైనా చేయగలదని దుయ్యబట్టారు. ఇదిలా ఉండగా, ఎమ్మెల్యే మదన్ మిత్రా ఆసక్తికర వ్యాఖ్యలు చేశారు. ‘‘మేము అంతా తప్పుడు మనుషులమే.. కానీ, ముకుల్ రాయ్, సువేందు అధికారి’’ సంగతేంటని మిత్రా ప్రశ్నించారు. ఈ కేసులో వారిద్దరూ ఆరోపణలు ఎదుర్కొంటున్నారు. నారద స్టింగ్ ఆపరేషన్ చేపట్టిన సమయంలో వీరు మమతా క్యాబినెట్లో మంత్రులే. ప్రస్తుతం బీజేపీలో ఉన్నారు. ‘‘నేను దోపిడీ చేయలేదు.. ఎటువంటి నేరానికి పాల్పడలేదు.. సీబీఐ తన పడక గదిలోకి చొరబడి అరెస్ట్ చేసింది’’ అని సోవన్ ఛటర్జీ అన్నారు. సీబీఐ ప్రత్యేక న్యాయస్థానం మంజూరు చేసిన బెయిల్పై కలకత్తా హైకోర్టు డివిజన్ బెంచ్ సోమవారం రాత్రి స్టే విధించింది. తదుపరి ఆదేశాలు వెలువరించే వరకూ నిందితులకు జ్యుడిషీయల్ కస్టడీ కొనసాగుతుందని స్పష్టం చేసింది. నారద న్యూస్కు చెందిన మాథ్యూ శామ్యూల్ 2014లో స్టింగ్ ఆపరేషన్ చేపట్టారు. 2016 పశ్చిమబెంగాల్ ఎన్నికలకు ముందు ప్రైవేట్ న్యూస్ వెబ్సైట్ నారద న్యూస్లో వార్త ప్రసారమైంది. స్టింగ్ ఆపరేటర్ శామ్యూల్ నుంచి అక్రమంగా పబ్లిక్ సర్వెంట్లు ముడుపులు అందుకుంటూ కెమెరాకు చిక్కడం అప్పట్లో సంచలనమైంది. ఇది నారద స్టింగ్ ఆపరేషన్గా ప్రచారంలోకి వచ్చింది.
By May 18, 2021 at 01:41PM
No comments