నవంబరు 2019లోనే ఆస్పత్రులకు వుహాన్ ల్యాబ్ పరిశోధకులు.. !

కరోనా వైరస్ నుంచే లీకయ్యిందనే వాదనలు క్రమంగా బలపడుతున్నాయి. దీనికి సంబంధించిన ఆధారాలు ఒక్కొక్కటిగా బయటపడుతున్నాయి. తాజాగా, అమెరికాకు చెందిన వాల్ స్ట్రీట్ జర్నల్ పత్రిక సంచలన కథనం వెలువరించింది. గురించి బయట ప్రపంచానికి తెలియడానికి కొన్ని నెలల ముందే వుహాన్ ఇన్‌స్టిట్యూట్ ఆఫ్ వైరాలజీ (WIV)కు చెందిన ముగ్గురు పరిశోధకులు 2019 నవంబరులో ఆసుపత్రిలో చేరారని పేర్కొంది. ఈ మేరకు గతంలో అమెరికా నిఘా వర్గాలు వెల్లడించని నివేదికను ఉటంకించింది. ప్రభావితమైన పరిశోధకుల సంఖ్య, వారు అనారోగ్యానికి గురైన సమయం, ఆసుపత్రుల సందర్శన గురించి వివరాలను వెల్లడించింది. ల్యాబ్ నుంచి కరోనా వైరస్ బయటకు వచ్చిందా అనే దానిపై విస్తృత దర్యాప్తు కోసం పిలుపునిచ్చింది. కోవిడ్ మూలాలపై తదుపరి దశ దర్యాప్తునకు ప్రపంచ ఆరోగ్య సంస్థ (డబ్ల్యూహెచ్ఓ) నిర్ణయాత్మక విభాగం త్వరలోనే సమావేశం కానున్న వేళ ఈ నివేదిక బయటకు రావడం గమనార్హం. వాల్ స్ట్రీట్ జర్నల్ కథనంపై అమెరికా జాతీయ భద్రతా మండలి అధికార ప్రతినిధి ఎమిలీ హార్న్ స్పందించడానికి నిరాకరించారు. కానీ, తొలినాళ్లలో కోవిడ్‌ పుట్టుక, చైనాలో దాని మూలాల గురించి బైడెన్ యంత్రాంగం నిరంతరం సీరియస్‌గా పరిశీలిస్తోందని ఆమె వ్యాఖ్యానించారు. కోవిడ్ మూలాలపై దర్యాప్తు విషయంలో రాజకీయాలు చేయకుండా డబ్ల్యూహెచ్ఓ, ఇతర దేశాల నిపుణులతో కలిసి అమెరికా ప్రభుత్వం పనిచేస్తోందని ఉద్ఘాటించారు. ‘‘సార్స్-కోవి-2 (SARS-CoV-2)పై ప్రపంచ ఆరోగ్య సంస్థ దర్యాప్తు కొనసాగుతున్నందున ఇప్పుడే దీనిపై ముందస్తు ప్రకటనలు చేయబోం.. కానీ, బయటకు వస్తున్న విషయాలపై సాంకేతికంగా విశ్వసనీయమైన సిద్ధాంతాలను అంతర్జాతీయ నిపుణులు పూర్తిగా అంచనా వేయాలని మేము స్పష్టంగా చెప్పాం’’ అని ఎమిలీ వ్యాఖ్యానించారు. ల్యాబ్ పరిశోధకుల గురించి ఇంటెలిజెన్స్ ప్రస్తుత, మాజీ అధికారులు... నివేదికలో సాక్ష్యాల బలం గురించి పలు అభిప్రాయాలను వ్యక్తం చేశారని, పేరు వెల్లడించని మరో అధికారి.. మరింత దర్యాప్తు, అదనపు ధృవీకరణ అవసరమని చెప్పారని వాల్ స్ట్రీట్ జర్నల్ పేర్కొంది. డబ్ల్యూహెచ్ఓ నేతృత్వంలో కోవిడ్ మూలాల దర్యాప్తుపై అమెరికా, నార్వే, కెనడా, బ్రిటన్ సహా పలు దేశాలు మార్చిలో ఆందోళన వ్యక్తం చేశాయి. అంతేకాదు, తదుపరి దశ దర్యాప్తులో మహమ్మారి పుట్టుక, వ్యాప్తి గురించి పూర్తిస్థాయి సమాచారం సేకరించాలని డిమాండ్ చేశాయి. విశ్వసనీయ వర్గాల సమాచారం ప్రకారం.. ఈ దర్యాప్తు గురించి చైనా సహకారం, పారదర్శకతను నిర్ధారించడానికి అమెరికా ప్రయత్నిస్తోంది. వాషింగ్టన్‌లోని చైనా రాయబార కార్యాలయం తక్షణమే దీనిపై స్పందించడానికి నిరాకరించింది. ఫిబ్రవరిలో వైరాలజీ ఇనిస్టిట్యూట్‌ను సందర్శించిన తరువాత డబ్ల్యూహెచ్‌ఓ నేతృత్వంలోని బృందం ల్యాబ్ నుంచి లీక్ అవడం చాలా అరుదు అని చెప్పిన విషయాన్ని చైనా విదేశాంగ శాఖ ఆదివారం గుర్తుచేసింది. ల్యాబ్ లీక్ సిద్ధాంతాన్ని అమెరికా హైప్ చేస్తూనే ఉందని చైనా మండిపడింది.

By May 24, 2021 at 12:07PM

Read More https://telugu.samayam.com/latest-news/international-news/wuhan-virology-lab-staff-sought-hospital-care-before-covid-outbreak-report/articleshow/82902345.cms