వంతెన కూలి కిందపడ్డ మెట్రో రైలు.. 15 మంది మృతి.. 70 మంది గాయాలు
మెట్రో వంతెన కూలి బోగీలు కిందపడి 15 మంది చనిపోయిన ఘటన మెక్సికో రాజధానిలో చోటుచేసుకుంది. మెక్సికో సిటీలో జరిగిన ఈ ప్రమాదంలో మరో 70 మందికి గాయాలుకాగా.. వీరిలో పలువురి పరిస్థితి విషమంగా ఉంది. మృతుల సంఖ్య మరింత పెరిగే అవకాశం ఉన్నట్టు వైద్యులు తెలిపారు. వంతెన కూలిపోవడంతో దాని కింద నుంచి వెళ్తోన్న కార్లపై మెట్రో బోగీలు పడ్డాయి. దీంతో భారీ సంఖ్యలో జనం గాయపడ్డారు. స్థానిక కాలమానం ప్రకారం సోమవారం రాత్రి ఈ ఘటన జరిగినట్టు అధికారులు తెలిపారు. ప్రమాదం జరిగిన వెంటనే మెక్సికో నగర మేయర్ క్లాడియా షైన్బమ్ అక్కడకు చేరుకున్నారు. ‘‘అగ్నిమాపక సిబ్బంది, ప్రజా సంరక్షణ అధికారులు ఘటనా స్థలిలో సహాయక చర్యలు కొనసాగిస్తున్నారు.. క్షతగాత్రులను చికిత్స కోసం వివిధ ఆస్పత్రులకు తరలించారు.. కాసేపట్లో పూర్తి వివరాలను వెల్లడిస్తాం’’ అని మేయర్ ట్వీట్ చేశారు. కాగా, ప్రమాదానికి సంబంధించిన వీడియోలు సోషల్ మీడియాలో వైరల్ అవుతున్నాయి. శిథిలాల కింద చిక్కుకున్నవారిని రక్షించేందుకు సహాయక చర్యలు ముమ్మరంగా సాగుతున్నాయి. మెక్సోకో నగరం మెట్రో లైన్ 12 వద్ద సోమవారం రాత్రి 10.25 గంటల సమయంలో ఈ ప్రమాదం చోటుచేసుకుంది. ఈ నిర్మాణంలో అక్రమాలు జరిగినట్టు ఫిర్యాదులు, ఆరోపణలు ఉన్నాయి. నాణ్యత ప్రమాణాలు పాటించకపోవడంతోనే ప్రమాదం జరిగినట్టు ఆరోపిస్తున్నారు. ఈ మార్గాన్ని 2012లోనే ప్రారంభించారు. ప్రస్తుతం మెక్సికో విదేశాంగ మంత్రిగా ఉన్న మార్సెలో ఎబ్రాడ్ మెక్సికో నగర మేయర్‌గా ఉన్నట్టు ఈ నిర్మాణం చేపట్టారు. ఈ ఘటనపై స్పందించిన ఆయన.. ఇది విషాదరక ఘటన.. బాధితులు, వారి కుటుంబాలకు నా ప్రగాఢ సానుభూతి తెలుపుతున్నాను అని అన్నారు. ఈ ఘటనపై తప్పకుండా విచారణ జరిపి, బాధ్యులపై చర్యలు తీసుకుంటామని ఆయన హామీ ఇచ్చారు. ఉత్తర అమెరికాలో రెండో అతిపెద్ద మెట్రోగా ఇది గుర్తింపు పొందింది. మెక్సికో మెట్రోను అధికారికంగా సిస్టెమా డే ట్రాన్స్‌పోర్టే కలెక్టివో‌గా పిలుస్తారు. 2019లో 1.655 బిలియన్ల మంది ప్రయాణికులు ఇందులో ప్రయాణించారు. అయితే, మెట్రో ప్రారంభించి 50 ఏళ్లు కాగా.. ఇప్పటి వరకూ కనీసం రెండు అతిపెద్ద ప్రమాదాలు జరిగాయి. కానీ, ప్రాణనష్టం మాత్రం తక్కువే. తాజాగా జరిగిన ప్రమాదంలో 15 మంది చనిపోయారు.
By May 04, 2021 at 11:53AM
No comments