కరోనాకు ముకుతాడు.. అన్నింటీకి ఒకే వ్యాక్సిన్.. కేవలం రూ.75కే డోస్!

దాదాపు ఏడాదిన్నరగా కరోనా మహమ్మారి ప్రపంచాన్ని అతలాకుతలం చేస్తోంది. కొన్ని టీకాలు అందుబాటులోకి రావడం కాస్త ఊరటనిచ్చినా మహమ్మారి ఎప్పుడు పూర్తిగా అంతమవుతుందో తెలియని పరిస్థితి. ఇదిలా ఉండగా, కోవిడ్‌ను నిరోధించే సరికొత్త టీకా త్వరలోనే అందుబాటులోకి వచ్చే సూచనలు కనిపిస్తున్నాయి. ఇప్పటికే వ్యాప్తిలో ఉన్న కరోనా వైరస్‌లతో పాటు భవిష్యత్తులో జన్యుమార్పిడి ద్వారా పుట్టుకొచ్చే కొత్తరకం వైరస్‌లనూ నిలువరించగల వ్యాక్సిన్‌ను అమెరికాలోని వర్జీనియా యూనివర్సిటీ శాస్త్రవేత్తల బృందం ప్రయోగాత్మకంగా అభివృద్ధి చేసింది. కేవలం ఒక్క డాలరు (రూ.75)కే అందుబాటులోకి వచ్చే అవకాశం ఉండటం మరో ప్రత్యేకత. సాధారణంగా ‘పోర్కైన్‌ ఎపిడమిక్‌ డయేరియా వైరస్‌ (పీఈడీవీ)’ అనే వైరస్‌ పందుల్లో డయేరియా, తీవ్ర జ్వరం తదితర వ్యాధులకు కారణమవుతోంది. ఇది కూడా కరోనా కుటుంబానికి చెందిన వైరసే. తాజా పరిశోధనల్లో భాగంగా శాస్త్రవేత్తలు పీఈడీవీ, కొవిడ్‌ నివారణ టీకాలను అభివృద్ధి చేశారు. ఈ టీకాలూ.. కరోనా జాతికి చెందిన అన్ని వైరస్‌లపై ఉండే ‘ఫ్యుజన్‌ పెప్టైడ్‌’లను లక్ష్యంగా చేసుకొని పనిచేస్తాయి. ఇన్‌ఫెక్షన్‌ను నిలువరించకున్నా.. వైరస్‌లపై పోరాటానికి రోగనిరోధక శక్తిని వేగంగా సన్నద్ధం చేస్తాయని శాస్త్రవేత్తలు తెలిపారు. జంతువులపై జరిపిన ప్రయోగాల్లో ఆశాజనక ఫలితాలను సాధించినట్టు పరిశోధకులు పేర్కొన్నారు. పరిశోధకుల అభిప్రాయం ప్రకారం.. ఈ టీకా ప్రపంచ వ్యాక్సిన్ ప్రయత్నాలకు ప్రధాన అడ్డంకులను అధిగమించగల అనేక ప్రయోజనాలను అందిస్తుందని వివరించారు. అంతేకాదు, దీనిని భద్రపరచడం, రవాణా చేయడం చాలా తేలికైందని, మారుమూల ప్రాంతాలకు తరలించవచ్చని చెప్పారు. ప్రస్తుతం పలు టీకాల తయారుచేసే పరిశ్రమల్లోనే దీనిని పెద్ద సంఖ్యలో ఉత్పత్తి చేయవచ్చని అన్నారు. ‘‘మా కొత్త వేదిక ప్రపంచవ్యాప్తంగా ఉన్న సౌకర్యాలలో తయారు చేయగలిగే చాలా తక్కువ ఖర్చుతో వ్యాక్సిన్లను వేగంగా ఉత్పత్తి చేయడానికి కొత్త మార్గాన్ని అందిస్తుంది.. ఇది మహమ్మారిను కట్టిడి చేయడానికి ప్రత్యేకంగా సహాయపడుతుంది’’ అని వర్జీనియా వర్సిటీ పరిశోధకుడు డాక్టర్ స్టీవెన్ ఎల్ జైచ్నెర్ అన్నారు. ఈ పరిశోధన ఫలితాలను పీఎన్ఏఎస్‌లో ప్రచురించారు. ‘‘కలరా, పెర్టుసిస్ వంటి ప్రాణాంతక వ్యాధుల నుంచి రక్షించడానికి మొత్తం కణాలను నాశనం చేసే టీకాలు ప్రస్తుతం విస్తృతంగా వాడుకలో ఉన్నాయి.. ప్రపంచంలోని అల్ప, మధ్య ఆదాయ దేశాల్లోని ఫ్యాకర్టీలు సంవత్సరానికి వందల మిలియన్ల డోస్‌లను తయారు చేస్తున్నాయి.. డోస్‌కు 1 డాలర్లు లేదా అంతకంటే తక్కువే ఖర్చవుతుంది.. ప్రస్తుత కొత్త టీకా కూడా ఈ కర్మాగారాల్లో ఉత్పత్తికి అనుకూలంగా ఉంటుంది.. సాంకేతిక పరిజ్ఞానం, ధర కూడా ఒకేలా ఉంటాయి ’’ అని జైచ్నెర్ అన్నారు. అయితే, SARS-CoV-2 జన్యు శ్రేణులపై దీనిని పరీక్షించలేదు.. అయితే, పరిశోధకులు రెండు వ్యాక్సిన్లను అభివృద్ధి చేశారు. ఒకటి COVID-19 నుంచి, మరొకటి PEDV నుంచి రక్షించడానికి రూపొందించారు.

By April 22, 2021 at 11:52AM

Read More https://telugu.samayam.com/latest-news/international-news/new-covid-19-vaccine-may-provide-protection-against-existing-says-university-of-virginia/articleshow/82193480.cms