18 ఏళ్లు దాటినవారికి టీకా.. భారీ స్పందన.. కానీ, వ్యాక్సిన్ ఎప్పుడో తెలియదు!
దేశవ్యాప్తంగా 18 ఏళ్లు నిండినవారికి మే 1 నుంచి వ్యాక్సిన్ అందజేయనుండగా.. ఇందు సంబంధించిన నమోదు ప్రక్రియ బుధవారం సాయంత్రం 4 గంటల నుంచి ప్రారంభమైంది. మూడో దశ వ్యాక్సినేషన్‌లో భాగంగా 18 ఏళ్లు నిండిన ప్రతి ఒక్కరినీ టీకా అర్హుల జాబితాలో కేంద్రం చేర్చిన విషయం తెలిసిందే. ఇందుకోసం కొవిన్‌ పోర్టల్‌ సహా, ఆరోగ్య సేతు అప్లికేషన్‌లో నమోదు చేసుకునే అవకాశం కల్పించింది. రిజిస్ట్రేషన్ ప్రక్రియ ప్రారంభమైన కొద్దిసేపటికే.. కొవిన్‌ పోర్టల్‌, ఆరోగ్యసేతు యాప్‌లో సాంకేతిక సమస్యలు తలెత్తాయి. రిజిస్ట్రేషన్ కోసం పెద్ద సంఖ్యలో యువత ఒక్కసారిగా కొవిన్‌ పోర్టల్‌లో లాగిన్‌ అయ్యేందుకు ప్రయత్నించడం వల్ల సర్వర్‌ స్తంభించింది. దీనిపై సోషల్ మీడియాలో నెటిజన్లు అసహనం వ్యక్తం చేశారు. ఆరోగ్యసేతు యాప్‌లోనూ ఇదే పరిస్థితి ఎదురైనట్లు పోస్ట్‌లు పెట్టారు. సర్వర్‌ స్తంభించినట్లు వచ్చిన వార్తలను కేంద్రం ఖండించింది. ఆ ఆరోపణలు అవాస్తవమని, నిరాధారమైనవి స్పష్టంచేసింది. ‘‘కొవిన్‌ పోర్టల్‌ సర్వర్‌ తన గరిష్ఠ సామర్థ్యంతో పనిచేస్తోంది. ప్రజలు అందులో నమోదు చేసుకుంటున్నారు. సాయంత్రం 4గంటల నుంచి రాత్రి 7గంటల వరకు కేవలం మూడు గంటల్లోనే 80 లక్షల మంది నమోదు చేసుకున్నారు..పోర్టల్‌ నుంచి 1.45 కోట్ల సంక్షిప్త సందేశాలు విజయవంతంగా వెళ్లాయి’’ అని పేర్కొంది. ఇదిలా ఉండగా ఇప్పటి వరకూ 1.23 కోట్ల మంది వ్యాక్సిన్ కోసం రిజిస్ట్రేషన్ చేసుకున్నారు. అయితే, వీరికి టీకా ఎప్పుడు ఇస్తారనేది మాత్రం తెలియదు. స్లాట్ బుకింగ్ చేసుకున్నా.. ఆయా రాష్ట్రాల్లోని ఎన్ని కేంద్రాల్లో మే 1 నుంచి 18 ఏళ్లు నిండినవారికి వ్యాక్సినేషన్ ఇస్తారనే అంశంపై ఆధారపడి ఉంటుంది. మే 1 నుంచి 18 ఏళ్లు దాటిన వ్యక్తులకు వ్యాక్సినేషన్ అంశంపై ఇప్పటికే పలు రాష్ట్రాలు స్పష్టతనిచ్చాయి. టీకాల కొరత ఉన్నందున సాధ్యంకాదని పేర్కొన్నాయి. షెడ్యూలింగ్ సాధ్యం కానప్పటికీ, వ్యాక్సినేషన్ విషయంలో నిరుత్సాహపరుస్తున్నారే ఆందోళనల మధ్య యువత నుంచి భారీ స్పందన రావడం శుభపరిణామం. వ్యాక్సిన్‌కు డిమాండ్ ఉందని రాష్ట్రాలు, ప్రైవేట్ ఆస్పత్రులు, టీకా తయారీ సంస్థలను ఒప్పించడానికి ఇది దోహదపడుతుంది.
By April 29, 2021 at 10:57AM
No comments