మాస్క్ వేసుకోలేదని అడిగితే.. అపరకాళికలా రెచ్చిపోయిన మహిళ.. వీడియో
మహమ్మారి నుంచి మనల్ని మనం కాపాడుకోడానికి నిబంధనలను కచ్చితంగా పాటించడం ముఖ్యం. మాస్క్ ధరించడం, భౌతికదూరం వంటి నిబంధనలను పాటించాలని ఏడాది కాలంగా గొంతు చించుకుంటున్నా కొందరికి చెవికెక్కడంలేదు. మాస్క్ ధరించడం అంటే నమోషీగా భావిస్తున్నారు. మాస్క్ వేసుకోమంటే చాలా మందికి కోపం వస్తోంది. నువ్వు నాకేంటి చెప్పేది అన్నట్టు హూకరిస్తున్నారు. అడిగినవారిపై కొందరు దాడికి కూడా వెనుకాడటం లేదు. మహారాష్ట్రలో కరోనా తీవ్రత ఆందోళన కలిగిస్తోంది. గడచిన 24 గంటల్లో 25వేలకుపైగా కొత్త కేసులు నమోదుకావడం పరిస్థితికి అద్దం పడుతోంది. ఈ నేపథ్యంలో మాస్క్ పెట్టుకోలేదని ప్రశ్నించినందుకు మార్షల్‌పై ఓ మహిళ విచక్షణరహితంగా దాడికి పాల్పడింది. అపరకాళిక అవతారమెత్తి విరుచుకుపడి జట్టుపట్టుకుని గుంజి గుంజి కొట్టింది. ఈ ఘటన బృహన్ ముంబై మున్సిపల్ కార్పొరేషన్ (బీఎంసీ)లో చోటుచేసుకుంది. కండివలీ వెస్ట్‌ ప్రాంతంలో శుక్రవారం మాస్క్ లేకుండా జైనబ్ షైక్ అనే మహిళ ఆటోలో వెళుతుండా దహనుకార్వాడీ జంక్షన్ వద్ద బీఎంసీ మార్షల్ అశ్వని గుంజన్ అడ్డుకుంది. మాస్క్ పెట్టుకోకుండా ఆటోలో ప్రయాణిస్తున్నారని, ఫైన్ కట్టాలని అడగటంతో ఆమె రెచ్చిపోయింది. దీనికి షైక్ తాను దుప్పటాను మాస్క్‌లా వేసుకున్నట్టు చెప్పింది. అయితే, తప్పనిసరిగా మాస్క్ ధరించాలని గుంజన్ చెప్పడంతో ఇరువురి మధ్యా వాగ్వాదం చోటుచేసుకుంది. దీంతో ఆగ్రహం వ్యక్తం చేస్తూ ఆటోలో నుంచి దిగిన షైక్ ఆమె చెంపలు వాయించి జుట్టుపట్టుకుని పిడిగుద్దులు కురిపించింది. కనీసం బీఎంసీ ఉద్యోగిని అనే ఇంగితజ్ఞానం కూడా లేకుండా వ్యవహరించింది. ఇంతలో మరో మహిళా ఉద్యోగిని అక్కడకు చేరుకుని బాధితురాలికి అండగా నిలిచింది. ఈ దృశ్యాన్ని చూసిన అక్కడవారి ఆశ్చర్యపోయారు. అక్కడే ఉన్న ఓ వ్యక్తి దీనిని వీడియో తీసి సోషల్ మీడియాలో పోస్ట్ చేయడంతో ప్రస్తుతం వైరల్ అవుతోంది. ఈ ఘటనపై బీఎంసీ అధికారులు తీవ్రంగా స్పందించారు. పోలీసులకు ఫిర్యాదు చేయడంతో ఆమెపై పలు సెక్షన్ల కింద కేసు నమోదుచేసి అరెస్ట్ చేశారు. సోషల్ మీడియాలోనూ ఉద్యోగినికి అండగా నిలుస్తున్నారు. మాస్క్ ప్రతి ఒక్కరూ పెట్టుకోవాలని కోరుతున్నారు. ప్రస్తుతం మహారాష్ట్రలో మాస్క్ లేకుండా బహిరంగ ప్రదేశాలలో తిరిగి రూ.200 జరిమానా వేస్తున్నారు. అయినా సరే కొందరు ఉల్లంఘిస్తున్నారు.
By March 20, 2021 at 01:05PM
No comments