టీఆర్పీల కోసం ఛానళ్లు నన్ను దోషిగా ప్రచారం చేశాయి.. దిశా రవి సంచలన వ్యాఖ్యలు
గ్రెటా థన్‌బర్గ్ ‘టూల్కిట్’ వ్యవహారంలో పర్యవరణ కార్యకర్త దిశా రవిని ఢిల్లీ పోలీసులు అరెస్ట్ చేయగా.. న్యాయస్థానం ఆమెకు బెయిల్ మంజూరు చేసిన విషయం తెలిసిందే. తన అరెస్ట్‌పై దిశ రవి తాజాగా సోషల్ మీడియా ద్వారా స్పందించారు. ఈ సందర్భంగా ఆమె మీడియాపై సంచలన వ్యాఖ్యలు చేశారు. టీఆర్పీల కోసం పాకులాడే ఛానెళ్లు నన్ను దోషిగా చిత్రీకరించాయని దుయ్యబట్టారు. ‘‘నన్ను దోషిగా చిత్రీకరించారు. అది నిర్ధారించాల్సింది కోర్టులు. కానీ.. నన్ను దోషిగా ప్రకటించింది న్యాయస్థానాలు కాదు.. టెలివిజన్‌ రేటింగ్‌ పాయింట్‌(టీఆర్పీ) కోసం పాకులాడే న్యూస్‌ చానళ్లు’అని మండిపడ్డారు. ‘ఏం జరిగింది నాకు తెలుసు.. నేను నమ్మిన మార్గంలోనే ప్రయాణిస్తున్నాను.. ఫిబ్రవరి 13న పోలీసులు మా తలుపులు బద్దలుకొట్టలేదు.. నా ఫోన్, ల్యాప్‌టాప్ తీసుకోలేదు.. అరెస్ట్ మాత్రమే చేశారు’ అని అన్నారు. అరెస్ట్ చేసిన తర్వాత కోర్టు ముందు ప్రవేశపెట్టినప్పుడు లాయర్‌‌ను నియమించలేదని అన్నారు. పోలీస్ కస్టడీకి ఇవ్వడంపై న్యాయ, పౌర హక్కుల నిపుణులు తనకు మద్దతుగా నిలిచారని పేర్కొంది. ‘నేను ఆ న్యాయస్థానంలో నిలబడి, నా లాయర్ల కోసం తీవ్రంగా అన్వేషిస్తున్నప్పుడు.. నన్ను నేను రక్షించుకోవాల్సి వస్తుందనే వాస్తవాన్ని గ్రహించాను. న్యాయ సహాయం అందుబాటులో ఉందో లేదో నాకు తెలియదు ... నాకు తెలియక ముందే నన్ను 5 రోజుల పోలీసు కస్టడీకి పంపారు’అని తెలిపారు. ఇది తనకు ఎటువంటి ఆశ్చర్యాన్ని కలిగించలేదు.. నా ఫోటోలు మీడియాలో ప్రచురించి, దోషిగా ప్రచారం చేశారు. న్యాయస్థానంలో కాదు, కానీ టీఆర్పీల కోరుకునేవారు నా గురించి తప్పుడు ప్రచారం చేశారు’ అని మండిపడ్డారు. న్యాయం దక్కక వేలాది మంది జైళ్లలో మగ్గిపోతున్నారని, వారి కోసం మీ (న్యూస్‌ చానళ్లు) స్క్రీన్ల కేటాయించాలని ఆమె హితవు పలికారు. మా తాతలు రైతులు కావడంతో పరోక్షంగా పర్యావరణ ఉద్యమంపై మక్కువ ఏర్పడిందని అన్నారు. అందుకే రైతుల ఉద్యమానికి తాను మద్దతు తెలిపానని పేర్కొన్నారు.‘టూల్కిట్’ కేసులో ఫిబ్రవరి 13న ఢిల్లీ పోలీసులు దిశా రవిని బెంగళూరులో అరెస్టు చేసిన విషయం తెలిసిందే. ఈ కేసులో పది రోజుల తర్వాత ఫిబ్రవరి 23న ఆమెకు కోర్టు బెయిల్ మంజూరు చేసింది.
By March 14, 2021 at 09:12AM
No comments