ఖురాన్లోని ఆయాత్లపై సుప్రీంలో పిల్.. వక్ఫ్ బోర్డ్ మాజీ ఛైర్మన్పై ముస్లింలు ఆగ్రహం
ఖురాన్లోని 26 అయాత్లు ఉగ్రవాదాన్ని ప్రోత్సహించేవిగా ఉన్నాయని, వాటిని తొలగించాలని కోరుతూ సుప్రీంకోర్టులో పిటిషన్ దాఖలుచేసిన యూపీ షియా సెంట్రల్ వక్ఫ్ బోర్డ్ మాజీ అధ్యక్షుడు వసీమ్ రిజ్వీపై ముస్లింలు తీవ్ర ఆగ్రహం వ్యక్తం చేస్తున్నారు. ఆయనకు వ్యతిరేకంగా పెద్ద ఎత్తున సున్నీలు, షియాలు బారా ఇమాంబారా వద్ద భారీ ఎత్తున ప్రదర్శనలు నిర్వహించారు. ‘ఖురాన్ను రక్షించుకుందాం (తహఫౌజ్-ఇ-ఖురాన్)’ అనే నినాదంతో మజ్లిస్-ఇ-ఉలేమా-ఇ-హింద్ జనరల్ సెక్రెటరీ మౌలానా కల్బే జవాద్ ఇచ్చిన పిలుపుమేరకు షియా, సున్నీ మతపెద్దలు, ముస్లిం పర్సనల్ లా బోర్డు మాజీ సభ్యులు మౌలానా సల్మాన్ నడ్వీ తదితరులు భారీగా హాజరయ్యారు. రిజ్వీకి వ్యతిరేకంగా నినాదాలు చేసిన ఆందోళనకారులు.. అతని ఇంటిపేరును తొలగించి, దాని స్థానంలో కొత్తదానిని చేర్చుకోవాలని మండిపడ్డారు. రిజ్వీ వేసిన పిటిషన్ను రద్దు చేయాలని కోరారు. అంతేకాదు, దైవదూషణ చేసి, శాంతికి విఘాతం కలిగించేలా ప్రయత్నించిన అతడిని ప్రభుత్వం తక్షణమే అరెస్టు చేయాలని డిమాండ్ చేశారు. ఈ విషయమై ప్రధాని నరేంద్ర మోదీ, కేంద్ర హోం మంత్రి అమిత్ షా, ముఖ్యమంత్రి యోగి ఆదిత్యానాథ్లకు ఇప్పటికే మోమెరాండం సమర్పించారు. ఒకవేళ రిజ్వీపై చర్యలు తీసుకోకపోతే ప్రభుత్వం ఆయనను సమర్ధించినట్టే భావించాల్సి వస్తుందని మౌలానా కల్బే జవాద్ అన్నారు. ఢిల్లీలోని జమా మసీదులో వచ్చే శుక్రవారం ప్రార్ధనల అనంతరం సున్నీ-షియాలు కలిసి ఇటువంటి ర్యాలీ చేపట్టనున్నట్టు తెలిపారు. ఇదిలా ఉండగా, రిజ్వీ సోదరుడు తమ కుటుంబం పేరుతో ఓ వీడియో సందేశాన్ని విడుదల చేశారు. అతడివి అర్ధంలేని చేష్టలని రజ్వీ తల్లి, సోదరి, సోదరులు పేర్కొన్నారు. అంతేకాదు, తమ సోదరుడు తీవ్రమైన పాపానికి ఒడిగట్టాడని మండిపడ్డారు. ఖురాన్కు వ్యతిరేకంగా రిజ్వీ చేసిన నేరాలకు మౌలానా సల్మాన్ నద్వి పరిష్కారాన్ని సూచించారు. ‘‘ ఖురాన్ మనకు ప్రసాదించిన రంజాన్ నెల సమీపిస్తోంది.. రంజాన్ మాసంలో రాత్రి పగలు అనే తేడా లేకుండా నగరంలోని అన్ని మసీదుల వద్ద ఖురాన్ పఠనాలు చేయాలి... షియాలు, సున్నీలు తమ విభేదాలను పక్కనబెట్టాలి ఎందుకంటే మనమందరం ఒక మతానికి చెందినవారిమే’’ అన్నారు.
By March 15, 2021 at 02:16PM
No comments