పుతిన్ ఓ కిల్లర్.. మూల్యం చెల్లించుకుంటారు: రష్యాకు జో బైడెన్ వార్నింగ్!
గతేడాది నవంబరులో జరిగిన అధ్యక్ష ఎన్నికల్లోనూ రష్యా జోక్యం చేసుకుందని అమెరికా జాతీయ ఇంటెలిజెన్స్ విభాగం డైరెక్టర్ యావ్రిల్ హెయిన్స్ ధ్రువీకరించారు. ఈ ఎన్నికల్లో ట్రంప్నకు లబ్ధిచేకూర్చి బైడెన్ను ఓడించడానికి ప్రయత్నాలు చేసినట్లు ఆయన బాంబు పేల్చారు. దీంతో రష్యా అధ్యక్షుడు వ్లాదిమిర్ పుతిన్పై సంచలన వ్యాఖ్యలు చేశారు. పుతిన్ను ఓ కిల్లర్గా అభివర్ణించిన బైడెన్.. ఎన్నికల జోక్యానికి మూల్యం చెల్లించుకుంటారని హెచ్చరించారు. ఏబీసీ న్యూస్కు ఇచ్చిన ఇంటర్వ్యూలో ఇంటెలిజెన్స్ నివేదికపై వ్యాఖ్యత అడిగిన ప్రశ్నకు బైడెన్ ఈ మేరకు సమాధానం ఇచ్చారు. ప్రతిపక్ష నేత అలెక్సీ నావెల్నీ, ఇతర ప్రత్యర్థులపై విషప్రయోగానికి ఆదేశించినట్లు ఆరోపణలు ఎదుర్కొంటున్న పుతిన్ ఒక ‘కిల్లర్’ అని భావిస్తున్నారా అని బైడెన్ను ప్రశ్నించగా.. అవును నా అభిప్రాయం అదే అన్నారు. ప్రతిపక్ష నేత అలెక్సీ నావెల్నీ విషప్రయోగానికి శిక్షగా రష్యాపై విధించిన ఎగుమతి ఆంక్షలను కఠినతరం చేస్తున్నట్లు అమెరికా వాణిజ్య విభాగం ప్రకటించడంతో ఈ వ్యాఖ్యలకు ప్రాధాన్యత ఏర్పడింది. ఇదే సమయంలో రష్యా తన రాయబారిని వెనక్కు పిలిచింది. కానీ, ఇరు దేశాల మధ్య సంబంధాలలో కోలుకోలేని క్షీణతను నివారించాలని పేర్కొంది. ‘అమెరికాతో దౌత్య సంబంధాల విషయంలో ఏమి చేయాలి.. తీసుకోవాల్సిన చర్యల గురించి చర్చించేందుకు వాష్టింగ్టన్లోని రష్యా రాయబారి అనతోలీ ఆంటోనోవ్ను పిలిపించాం’ అని రష్యా విదేశాంగ మంత్రిత్వ శాఖ తెలిపింది. రష్యా విదేశాంగ శాఖ సహాయ మంత్రి సెర్గెయ్ రయ్బకోవ్ మాట్లాడుతూ.. రష్యా-అమెరికన్ సంబంధాలు మరింత క్షీణించే అంశం అమెరికాపై పూర్తిగా ఆధారపడి ఉందని అన్నారు. మరోవైపు, ట్రంప్నకు సన్నిహితులైన అధికారులను వినియోగించుకొని బైడెన్పై తప్పుడు ప్రచారం చేయడానికి ప్రయత్నించినట్లు అమెరికా ఇంటెలిజెన్స్ దర్యాప్తులో తేలింది. ఇప్పటికే 2016 అధ్యక్ష ఎన్నికల్లో హిల్లరీ ఓటమికి రష్యానే కారణమని అమెరికా ఇంటెలిజెన్స్ వర్గాలు అనుమానిస్తున్నాయి. అలాంటిది వరుసగా మరో సారి అధ్యక్ష ఎన్నికల్లో జోక్యం చేసుకోవడం ఇంటెలిజెన్స్ ఏజెన్సీలను దిగ్భ్రాంతికి గురిచేసింది. రష్యా అధ్యక్షుడు పుతిన్ ఉక్రెయిన్ చట్టసభ సభ్యుడు ఆండ్రీ డెర్కెచ్ను ఉపయోగించుకొని ట్రంప్ను ప్రభావితం చేసినట్లు గుర్తించింది. అండ్రీ పక్కా రష్యా ఏజెంట్ అని నిఘా వర్గాల నివేదికలో వెల్లడించారు. ట్రంప్ అటార్ని రూడీ గులియానీని అతను వాడుకొని తప్పుడు సమాచారాన్ని వ్యాపింప జేశారని పేర్కొన్నారు. బైడెన్ కుమారుడిపై మాస్కోకు అత్యంత సన్నిహితమైన వారే తప్పుడు సమాచారాన్ని వ్యాపింపజేశారని వెల్లడించింది.
By March 18, 2021 at 09:43AM
No comments