50 శాతానికిపైగా రిజర్వేషన్లు: సుప్రీం కీలక నిర్ణయం.. రాష్ట్రాలకు నోటీసులు
మరాఠాలకు విద్య, ఉదోగ్యాల్లో 16 శాతం రిజర్వేషన్లు కల్పించడాన్ని సవాల్ చేస్తూ దాఖలైన పిటిషన్‌పై సోమవారం కీలక నిర్ణయం తీసుకుంది. రాజ్యాంగం ప్రకారం రిజర్వేషన్లు 50 శాతానికి మించకూడదని గతంలో ఇచ్చిన తీర్పును సమీక్షించాలని నిర్ణయించింది. దీనిపై అన్ని రాష్ట్రాలకు తమ అభిప్రాయాలను తెలియజేయాలని కోరుతూ నోటీసులు జారీచేసింది. అలాగే, రిజర్వేషన్లు 50 శాతానికి మించకూడదన్న గత తీర్పుపై ఐదుగురు న్యాయమూర్తుల విస్తృత ధర్మాసనం సమీక్షించనున్నట్టు చీఫ్ జస్టిస్ ఎస్ఏ బాబ్డే ధర్మాసనం స్పష్టం చేసింది. అనంతరం కేసును మార్చి 15కు వాయిదా వేసిన సర్వోన్నత న్యాయస్థానం.. అప్పటి నుంచి రోజువారీ విచారణ చేపడతామని తెలిపింది. జస్టిస్ అశోక్ భూషణ్, జస్టిస్ ఎల్ నాగేశ్వరరావు, జస్టిస్ ఎస్ఏ నజీర్, జస్టిస్ హేమంత్ గుప్తా, జస్టిస్ రవీంద్ర భట్‌‌లతో కూడిన ధర్మాసనం ఏర్పాటుచేసింది. అలాగే, ఈ అంశానికి సంబంధించి 2018 రాజ్యాంగ చట్టం (102 సవరణ)పై అభిప్రాయం తెలియజేయాలని రాష్ట్ర ప్రభుత్వాలను కోరింది. ‘ఆర్టికల్ 342 ఎ ప్రాముఖ్యతను దృష్టిలో ఉంచుకుని, రాష్ట్రాలు తమ అభిప్రాయాలను తెలియజేయడానికి అవకాశం ఇచ్చినట్టు ధర్మాసనం స్పష్టం చేసింది. కాగా, సామాజికంగా, ఆర్థికంగా వెనకబడిన వర్గాలకు దేశంలో రిజర్వేషన్లను అమలు చేస్తున్నారు. ప్రస్తుతం షెడ్యూల్డ్ కులాలకు 15 శాతం, షెడ్యూల్డ్ తెగలకు 7.5 శాతం, ఇతర వెనకబడిన వర్గాలకు 27 శాతం మొత్తంగా 49.5 శాతం రిజర్వేషన్లను విద్యా, ఉద్యోగాలలో కేంద్ర ప్రభుత్వం అమలు చేస్తోంది. రిజర్వేషన్లు 50 శాతానికి మించకూడదని 1992 నాటి ఇందిరా సహానీ కేసులో తొమ్మిది న్యాయమూర్తుల విస్తృత ధర్మాసనం తీర్పునిచ్చింది. అయితే, కొన్ని అసాధరణ పరిస్థితుల్లో వీటిని విస్తరించవచ్చని సూచించింది. రిజర్వేషన్లు పెంచాలంటే రాజ్యాంగ సవరణ తప్పనిసరి. రాజ్యాంగ సవరణ చేసి ఆ చట్టాన్ని 9వ షెడ్యూల్‌లో పెట్టాలి. ఇక, తమిళనాడు ప్రభుత్వం 50 శాతానికి మించి రిజర్వేషన్లను అమలు చేస్తోంది. అక్కడ 69 శాతం రిజర్వేషన్లు అమలులో ఉన్నాయి. రిజర్వేషన్లు 50 శాతానికి మించరాదన్న సుప్రీం తీర్పును అధిగమించడానికి తమిళనాడు రిజర్వేషన్ల చట్టాన్ని 76వ రాజ్యాంగ సవరణ ద్వారా 9వ షెడ్యూల్డ్‌లో చేర్చింది.
By March 08, 2021 at 01:42PM
No comments