అంబానీ బెదిరింపుల కేసు: ఫిబ్రవరి 17న హిరేన్, సచిన్ మంతనాలు.. సీటీవీ ఫుటేజ్ లభ్యం
ముకేశ్ అంబానీకి బెదిరింపుల కేసులో దర్యాప్తు ముమ్మరంగా సాగుతోంది. ఈ కేసులో ఆరోపణలు ఎదుర్కొంటున్న పోలీస్ అధికారి సచిన్ వాజేను ఇప్పటికే అరెస్ట్ చేసిన ఎన్ఐఏ.. గురువారం అతడికి చెందిన రెండు ఖరీదైన కార్లను స్వాధీనం చేసుకుంది. ఇందులో టయోటా వాహనం రత్నగిరి ప్రాంతానికి చెందిన శివసేన నేత విజయ్కుమార్ గణ్పత్ భోస్లో పేరుమీద ఉన్నట్టు అధికారులు తెలిపారు. మరొకటి మెర్సిడేజ్ బెంజ్ అని పేర్కొన్నారు. మూడు రోజుల కిందటే ఈ వాహనాలను పోలీసులు స్వాధీనం చేసుకున్నట్టు తెలుస్తోంది. మరోవైపు, ముందస్తు బెయిల్ పిటిషన్పై థానే సెషన్స్ కోర్టు శుక్రవారం విచారణ చేపట్టనుంది. థానే వ్యాపారవేత్త అనుమానాస్పద మృతి కేసులో సచిన్ ఆరోపణలు ఎదుర్కొంటున్న విషయం తెలిసిందే. ఈ కేసును దర్యాప్తు చేస్తున్న ఏటీఎస్, ఎన్ఐఏలు కీలక ఆధారాలు సేకరించాయి. ఫిబ్రవరి 17న హిరేన్ను సచిన్ కలిసినట్టు సీసీటీవీ ఫుటేజ్ ఒకటి లభించింది. ఫోర్ట్ వద్ద జీపీఓ సమీపంలో ఇద్దరూ కలుసుకుని 10 నిమిషాలు మాట్లాడినట్టు అందులో రికార్డయ్యింది. ములంద్-ఐరోలీ రహదారిపై తన వాహనం మొరాయించడంతో ఓలా క్యాబ్లో వచ్చినట్టు హిరేన్ గతంలో వెల్లడించాడు. సచిన్ ఫిబ్రవరి 17న తన మెర్సిడేజ్ వాహనంలో ముంబయి పోలీస్ ప్రధాన కార్యాలయం నుంచి బయలుదేరినట్టు సీసీటీవీ ఫుటేజ్ ద్వారా గుర్తించారు. అక్కడ నుంచి సీఎస్ఎంటీ సమీపంలోని ట్రాఫిక్ సిగ్నల్ వద్ద నిలిపి ఉంచారు. గ్రీన్ సిగ్నల్ పడినా వాజే మాత్రం వాహనాన్ని ముందుకు తీసుకెళ్లకుండా పార్కింగ్ లైట్లు ఆన్చేసి నిలబెట్టారు. కొద్ది సెకెన్ల తర్వాత అక్కడకు చేరుకున్న హిరేన్.. సచిన్ వాహనంలోకి ఎక్కాడు. తర్వాత జీపీఓ వద్ద ఆ వాహనం పార్క్ చేసినట్టు మరో సీసీటీవీ ఫుటేజ్లో రికార్డయ్యింది. అక్కడే 10 నిమిషాల పాటు వాహనం నిలిపి మాట్లాడుకున్నారు. ఆ తర్వాత హిరేన్ కిందకు దిగి వెళ్లిపోయాడు. అంతకు ముందు ఓలా క్యాబ్ ఎక్కిన హిరేన్కు మొత్తం ఐదుసార్లు ఫోన్లు వచ్చినట్టు డ్రైవర్ పోలీసులకు చెప్పాడు. తొలుత పోలీస్ ప్రధాన కార్యాలయం ఎదురుగా ఉన్న రూపమ్ షోరూమ్ బయట కలవాలని చెప్పాడు.. కానీ, చివరిసారిగా స్పాట్ మార్చి సీఎస్ఎంటీ దగ్గర కలుద్దామని అవతలి వ్యక్తి చెప్పినట్టు వెల్లడించారు. వాజేతో పనిచేసిన మరో ఇద్దరి స్టేట్మెంట్స్ను ఎన్ఐ గురువారం రికార్డు చేసింది.
By March 19, 2021 at 11:39AM
No comments