అప్పుడప్పుడు తప్పులు జరుగుతాయి.. ఏం పర్వాలేదు: హీరో రామ్ మంచి తనం
ఎనర్జిటిక్ స్టార్ ఎప్పుడూ పాజిటివ్‌గా ఉంటారు. తన చుట్టూ పాజిటివ్ వైబ్స్‌ను క్రియేట్ చేస్తూ ఉంటారు. ఇండస్ట్రీలో అందరితోనూ స్నేహంగా మెలుగుతూ మంచి మనిషిగా పేరు తెచ్చుకున్నారు. తన మంచి తనాన్ని ఇప్పుడు మరోసారి ఆయన చాటుకున్నారు. రామ్ హీరోగా తిరుమల కిశోర్ దర్శకత్వంలో రూపొందిన చిత్రం ‘రెడ్’. సంక్రాంతి కానుకగా రేపు (జనవరి 13న) ఈ చిత్రం ప్రేక్షకుల ముందుకు వస్తోంది. చిత్ర ప్రచారంలో భాగంగా మంగళవారం రాత్రి ‘రెడ్’ ప్రీ రిలీజ్ ఈవెంట్ నిర్వహించారు. ఈ వేడుకకు మాటల మాంత్రికుడు త్రివిక్రమ్ శ్రీనివాస్ ముఖ్య అతిథిగా విచ్చేశారు. ఈ ఈవెంట్‌ను చాలా గ్రాండ్‌గా నిర్వహించారు. అయితే, ఈవెంట్ చవరిలో జరిగిన ఒక తప్పిదం చర్చనీయాంశం అయిపోయింది. సోషల్ మీడియాలో విపరీతంగా ట్రోల్ చేశారు. ప్రీ రిలీజ్ ఈవెంట్‌లో ముఖ్య అతిథికి ఫస్ట్ డే ఫస్ట్ షో బిగ్ టికెట్ ఇవ్వడం ఆనవాయతీగా వస్తోంది. అలాగే, త్రివిక్రమ్‌కు ‘రెడ్’ టీం బిగ్ టికెట్ అందజేసింది. ఈ బిగ్ టికెట్‌కు ఉన్న కవర్‌ను త్రివిక్రమ్ ఓపెన్ చేయగానే అందరిలో ఆశ్చర్యం. ఎందుకంటే అది ‘క్రాక్’ సినిమా టికెట్. జనవరి 9 తేదీతో ఉంది. తప్పిదాన్ని గమనించిన ఈవెంట్ ఆర్గనైజర్ శ్రేయాష్ మీడియా అదే టికెట్‌పై ‘రెడ్’ మూవీ స్టిక్కర్ అతికించి ఇచ్చింది. అయితే, దీనిపై విమర్శలు వచ్చాయి. సోషల్ మీడియాలో ట్రోలింగ్ జరిగింది. ఈ ట్రోలింగ్‌పై సున్నితంగా స్పందించారు హీరో రామ్. ఈ మేరకు బుధవారం ఒక ట్వీట్ చేశారు. ‘‘త్రివిక్రమ్ గారు - ఈవెంట్‌ను మరపురాని జ్ఞాపకంగా మార్చినందుకు కృతజ్ఞతలు నా ప్రియమైన అభిమానులు - మిమ్మల్ని కలుసుకోవడం ఎప్పుడూ సంతోషమే మీడియా - మీ వార్తలకు, ప్రోత్సహానికి కృతజ్ఞతలు శ్రేయాష్ శ్రీనివాస్ - అప్పుడప్పుడు తప్పులు జరుగుతాయి.. ఏం పర్వాలేదు.. ఇప్పటికీ మీరే బెస్ట్.. చీర్స్’’ అని రామ్ పేర్కొన్నారు. రామ్ ట్వీట్‌కు శ్రేయాష్ శ్రీనివాస్ స్పందించారు. ‘‘రెడ్ సినిమాలో మేమూ భాగం కావడం చాలా సంతోషంగా ఉంది. ఉస్తాద్ రామ్ గారికి కృతజ్ఞతలు. మీరు అమేజింగ్ హీరో మాత్రమే కాదు.. అందరినీ ప్రేమించే మంచి వ్యక్తి కూడా. మీ ప్రేమకు, ప్రోత్సాహానికి కృతజ్ఞతలు. మీ ప్రోత్సాహం మాకు మరింత శక్తిని ఇస్తుంది’’ అని శ్రీనివాస్ పేర్కొన్నారు.
By January 13, 2021 at 12:19PM
No comments