కోవిడ్ మొదలైనప్పటి నుంచి నాలుగు స్ట్రెయిన్లు గుర్తింపు.. డబ్ల్యూహెచ్ఓ సంచలన ప్రకటన

కరోనా వైరస్ వెలుగుచూసిన దగ్గర నుంచి ఇప్పటి వరకు ప్రపంచవ్యాప్తంగా కనీసం నాలుగు రకాల స్ట్రెయిన్లు వెలుగు చూసినట్టు ప్రపంచ ఆరోగ్య సంస్థ(డబ్ల్యూహెచ్ఓ) ప్రకటించింది. డిసెంబరు 2019 నుంచి ఇప్పటివరకూ జరిగిన కొన్ని ఆసాధారణ ఘటనల వెనుక ఈ కొత్త వేరియంట్లు ఉండి ఉండొచ్చని అభిప్రాయపడింది. చైనాలోని వుహాన్ నగరంలో తొలిసారి కరోనా వెలుగుచూసిన అనంతరం.. గతేడాది జనవరిలో D614G జన్యు మార్పిడి చెందిన ఓ కొత్త స్ట్రెయిన్ ఉనికిలోకి వచ్చిందని పేర్కొంది. ఆ తరువాత..ఈ జన్యువే ప్రపంచవ్యాప్తంగా అత్యధికంగా వ్యాపించిందని తెలిపింది. జూన్ 2020 నాటికి అత్యధిక శాతం కేసులు ఈ స్ట్రెయిన్ మూలంగానే సంభవించినట్టు వివరించింది. ఆ తర్వాత ఆగస్టు, సెప్టెంబర్ నెలల్లో మూడో స్ట్రెయిన్ బయటపడినట్టు పేర్కొంది. డెన్మార్క్‌లో తొలిసారిగా ఉనికిలోకి వచ్చిన ఈ స్ట్రెయిన్‌కు Cluster-5గా శాస్త్రవేత్తలు నామకరణం చేశారు. మానవుల రోగ నిరోధక శక్తిని ఈ స్ట్రెయిన్ దీటుగా ఎదుర్కొగలదనే ఆందోళనను అప్పట్లో కొందరు శాస్త్రవేత్తలు వ్యక్తం చేశారు. మింక్‌ల నుంచి ఈ వైరస్ వ్యాపించినట్టు గుర్తించారు. ‘డెన్మార్క్‌లో నిర్వహించిన ప్రాథమిక అధ్యయనాలు.. ఈ వేరియంట్ మానవులలో యాంటీబాడీలను దీటుగా ఎదుర్కొంటోందని ఆందోళన వ్యక్తమయ్యింది.. ఇది సహజ సంక్రమణ లేదా టీకా తరువాత రోగనిరోధక రక్షణ పరిధి, వ్యవధిని తగ్గించగలదు’ అని డబ్ల్యూహెచ్ఓ పేర్కొంది. తాజాగా, బ్రిటన్‌లో విజృంభిస్తోన్న స్ట్రెయిన్‌ సెప్టెంబరులోనే గుర్తించగా.. డిసెంబరు నాటికి ఉనికిలోకి వచ్చింది. అప్పటికే అక్కడ ఉన్న కరోనా వైరస్‌తో ఈ కొత్త స్ట్రెయిన్‌కు ఫైలోజెనెటిక్ సంబంధం లేదన్న విషయాన్ని కూడా శాస్త్రవేత్తలు గుర్తించారు. దీంతో..నిపుణులకు ఈ స్ట్రెయిన్ జన్మరహస్యం అంతుచిక్కని ప్రశ్నగా మారింది. అలాగే, దక్షిణాఫ్రికాలో మరో స్ట్రెయిన్ పురుడు పోసుకోవడంతో భయాందోళనలు వ్యక్తమయ్యాయి. దీనికి 501Y.V2 అనే పేరును సూచించారు. అయితే..దక్షిణాఫ్రికా, బ్రిటన్‌ స్ట్రెయిన్ల కారణంగా వ్యాధి తీవ్రతలో ఎటువంటి మార్పు రాలేదన్న నిపుణుల మాటలు కొంత స్వాంతన కలిగిస్తున్నాయి. కేవలం కరోనా మహమ్మారి వ్యాప్తి చెందే వేగం మాత్రమే పెరిగిందని అంటున్నారు. కరోనా అనేది ఆర్‌ఎన్ఏ వైరస్ కాబట్టి.. వాటిల్లో జన్యుమార్పులు సహజమేనని నిపుణులు వ్యాఖ్యానిస్తున్నారు. ప్రస్తుతం ఈ కొత్తరకం స్ట్రెయిన్ మొత్తం 30 దేశాలకు వ్యాపించింది. ‘UK SARS-CoV-2 VOC 202012/01 కూడా N501Y మ్యుటేషన్ కలిగి ఉంది.. ఫైలోజెనెటిక్ విశ్లేషణ ఆధారంగా దక్షిణాఫ్రికా, యూకే స్ట్రెయిన్‌లు వేర్వేరు వైవిధ్యంగా గుర్తించారు.. నవంబర్‌లో దక్షిణాఫ్రికా ఆరోగ్య అధికారుల రొటీన్ సీక్వెన్సింగ్‌లో ఈ కొత్త SARS-CoV-2 వేరియంట్ ఎక్కువగా తూర్పు కేప్, వెస్ట్రన్ కేప్, క్వాజుల-నాటల్ ప్రావిన్సులలో వ్యాపించినట్టు కనుగొన్నారు’ అని డబ్ల్యూహెచ్ఓ తెలిపింది.

By January 03, 2021 at 01:36PM

Read More https://telugu.samayam.com/latest-news/international-news/four-variants-of-covid-strains-found-since-beginning-of-pandemic-says-who/articleshow/80081575.cms