కోవిన్ యాాప్‌లో సాంకేతిక లోపాలు.. తాత్కాలికంగా టీకా పంపిణీ నిలిపివేసిన ఆ రాష్ట్రాలు
ప్రపంచంలోనే అతిపెద్ద వ్యాక్సినేషన్ ప్రక్రియ భారత్‌లో శనివారం ఘనంగా ప్రారంభమైన విషయం తెలిసిందే. అయితే, కొన్ని రాష్ట్రాల్లో టీకా పంపిణీకి ద్వితీయ విఘ్నాలు ఏర్పాడ్డాయి. కోవిన్ యాప్‌లో సాంకేతిక లోపాలు తలెత్తడంతో శనివారం మొదలైన వ్యాక్సినేషన్ ప్రక్రియను తాత్కాలికంగా నిలిపివేస్తున్నట్టు మహారాష్ట్ర ప్రకటించింది. రెండు రోజుల పాటు వ్యాక్సినేషన్ నిలిపివేస్తున్నామని, జనవరి 19న తిరిగి ప్రారంభిస్తామని ఆరోగ్య శాఖ అధికారులు వెల్లడించారు. తొలిరోజున టీకా పంపిణీ ప్రారంభం కాగానే, కొవిన్ యాప్‌లోని లోపాలు బహిర్గతమయ్యాయి. మహారాష్ట్రలోని థానేలో కొవిన్ వెబ్‌సైట్‌తో ఉన్న కనెక్షన్ తెగిపోయింది. తొలి రోజు 28,500 మందికి టీకా అందజేయాలని లక్ష్యంగా పెట్టుకోగా.. కేవలం 64.34 శాతం (18,388) మందికి మాత్రమే వేయగలిగారు. కోవిన్ యాప్‌లో సాంకేతిక లోపాలతోనే టీకా పంపిణీకి ఆటంకం ఏర్పడింది. అలాగే, టీకా తీసుకున్న పది మందిలో దుష్ప్రభావాలు తలెత్తాయి. అయితే, ఇవన్నీ స్వల్ప అనారోగ్య సమస్యలేనని అన్నారు. ఈ నేపథ్యంలోనే వ్యాక్సినేషన్ ను నిలిపివేసినట్టు అధికారులు వెల్లడించారు. అంతకుముందు ట్రయల్ రన్ నిర్వహించిన సమయంలో ఎటువంటి సమస్యలూ రాలేదని వారు తెలిపారు. ముంబయిలో 4000 మందికి టీకా వేయాల్సి ఉండగా.. కేవలం 1,926 మంది మాత్రమే తీసుకున్నారు. ఇదిలావుండగా, పశ్చిమ బెంగాల్‌లోనూ ఇదే తరహా సమస్య ఏర్పడింది. వ్యాక్సిన్ తీసుకున్న వారి వివరాలు యాప్‌లో నమోదు కాలేదు. తమిళనాడులోని నీలగిరిలో సైతం పలువురికి వ్యాక్సినేషన్ ఎకనాలెడ్జ్‌మెంట్‌ను అధికారులు ఇవ్వలేకపోయారు. అటు పంజాబ్‌లోనూ వ్యాక్సినేషన్‌కు ఆటంకం ఏర్పడింది. టీకా తీసుకునే వ్యక్తులకు యాప్ ద్వారా వెళ్లిన మెసేజ్‌లు అందడం లేదని పంజాబ్ అధికారులు కూడా ఆరోపించారు. హరియాణా, హిమాచల్ ప్రదేశ్, కర్ణాటకలోనూ వెబ్‌సైట్ మొరాయించింది. అయినా తాము టీకా ఇచ్చే ప్రక్రియను ఆపడం లేదని ఆయా రాష్ట్రాల అధికారులు స్పష్టం చేశారు. ఒడిశాలోనూ వ్యాక్సినేషన్ ప్రక్రియా నిలిచిపోయింది. ఒక రోజు ఆలస్యంగా టీకాను ఇస్తామని ఒడిశా అధికారులు ప్రకటించారు. కొవిన్ యాప్ సమస్యలను పరిష్కరించిన తరువాతే టీకా ఇస్తామని, తొలి దశలో మొత్తం 3.28 లక్షల మందికి టీకా ఇస్తామని రాష్ట్ర ఆరోగ్య శాఖ అదనపు ముఖ్య కార్యదర్శి ప్రదీప్త మహపాత్ర వెల్లడించారు.
By January 17, 2021 at 10:05AM
No comments