వ్యవసాయ చట్టాలపై రైతుల పోరు ఉద్ధృతం... ప్రారంభమైన నిరాహార దీక్ష
వ్యవసాయ చట్టాలను వ్యతిరేకిస్తూ రైతులు చేపట్టిన ఆందోళనలు 19వ రోజుకు చేరుకున్నాయి. రైతుల ఉద్యమానికి మద్దతు క్రమంగా పెరుగుతోంది. ఈ నేపథ్యంలో రైతుల తమ పోరాటాన్ని మరింత ఉద్ధృతం చేశారు. ఇందులో భాగంగా సోమవారం ఒక్క రోజు నిరాహార దీక్షను ప్రారంభించారు. ఢిల్లీ సరిహదులైన టిక్రీ, సింఘులో రైతు సంఘాల నేతలు దీక్షను ప్రారంభించగా.. దీనికి మద్దతుగా దేశవ్యాప్తంగా రిలే నిరాహార దీక్షలను చేపట్టారు. అన్నదాతల ఒక్క రోజు దీక్షలో తానూ పాల్గొంటున్నట్టు ఢిల్లీ సీఎం అరవింద్ కేజ్రీవాల్ ప్రకటించారు. ఆప్ కార్యకర్తలు కూడా స్వచ్ఛందంగా ఈ దీక్షల్లో పాల్గొనాలని పిలుపునిచ్చారు. వ్యవసాయ చట్టాలపై రైతుల డిమాండ్లను తక్షణమే ఆమోదించి, మద్దతు ధరకు భరోసా కల్పించే బిల్లును తీసుకురావాలని కేజ్రీవాల్ ఉద్ఘాటించారు. ఉదయం 8 గంటలకు ప్రారంభమైన దీక్ష సాయంత్రం 5 గంటల వరకు కొనసాగనుంది. దేశంలోని అన్ని జిల్లా కేంద్రాల్లో రైతులకు మద్దతుగా దీక్షలు చేయాలని పిలుపునిచ్చారు. ప్రతిపక్ష రాజకీయ పార్టీలు కూడా రైతుల ఉద్యమానికి మద్దతు తెలిపాయి. మరోవైపు, ఢిల్లీలో ఉద్యమానికి మద్దతుగా మరో 10వేల మంది సోమవారం రానున్నట్టు కర్షక సంఘాలు తెలిపాయి. ప్రధాని మోదీ నేతృత్వంలోని కేంద్ర ప్రభుత్వం రైతులను గౌరవిస్తుందని, అన్నదాతల ఉద్యమాన్ని తమకు అనుకూలంగా మార్చుకోవాలని ప్రయత్నిస్తున్న ‘తుక్డే తుక్డే గ్యాంగు’ను మాత్రం ఎట్టి పరిస్థితుల్లోనూ వదిలిపెట్టబోదని కేంద్ర మంత్రి రవిశంకర్ ప్రసాద్ సంచలన వ్యాఖ్యలు చేశారు. వారిపై కఠినచర్యలు తీసుకుంటుందని హెచ్చరించారు. మరోవైపు, నూతన వ్యవసాయ చట్టాలకు వ్యతిరేకంగా రైతులు చేస్తున్న ఆందోళనను కేంద్ర ప్రభుత్వం అవమానపరుస్తోందంటూ శివసేన, ఎన్సీపీ సహా పలు పార్టీలు ధ్వజమెత్తాయి. అన్నదాతల ఉద్యమంలోకి మావోయిస్టు శక్తులు చొరబడ్డాయంటూ కేంద్ర మంత్రి పీయూష్‌ గోయల్‌ చేసిన వ్యాఖ్యను తప్పుపట్టాయి. పాకిస్థాన్‌, చైనా హస్తముందంటూ మరో కేంద్ర మంత్రి రావ్‌సాహెబ్‌ దన్వె చేసిన వ్యాఖ్యలపైనా ఆగ్రహం వ్యక్తం చేశాయి.
By December 14, 2020 at 09:19AM
No comments