Breaking News

రైతులకు మేలు చేయని ఆ చట్టాలను రద్దుచేయండి.. కేరళ అసెంబ్లీ ఏకగ్రీవ తీర్మానం


కేంద్రం తీసుకొచ్చిన కొత్త వ్యవసాయ చట్టాలకు వ్యతిరేకిస్తూ ఢిల్లీ సరిహద్దుల్లో అన్నదాతలు చేపట్టిన ఆందోళనలు 36వ రోజుకు చేరుకున్నాయి. ఇదిలా ఉండగా, వ్యవసాయ చట్టాలకు వ్యతిరేకంగా కేరళ అసెంబ్లీలో విజయన్ ప్రభుత్వం గురువారం ప్రవేశపెట్టిన తీర్మానం ఏకగ్రీవంగా ఆమోదం పొందింది. రైతులకు మేలు చేయని ఈ చట్టాలను తక్షణమే ఉపసంహరించుకోవాలని కోరుతూ ఈ తీర్మానం ప్రవేశపెట్టారు. వ్యవసాయ రంగంలో దీర్ఘకాలిక గందరగోళానికి ఈ చట్టాలు కారణమవుతాయని రాష్ట్రం ఆందోళన చెందుతున్నట్టు తీర్మానంలో పేర్కొంది. అటువంటి పరిస్థితిని ముఖ్యంగా కోవిడ్ మహమ్మారి సంక్షోభం సమయంలో కేరళ భరించడానికి సిద్ధంగా లేదని స్పష్టం చేసింది. ‘వ్యవసాయ ఉత్పత్తులను కేంద్ర ప్రభుత్వం సేకరించి, అవసరమైన వారికి న్యాయమైన ధరలకు పంపిణీ చేసే వ్యవస్థ ఉండాలి.. దీనికి బదులుగా, వ్యవసాయ ఉత్పత్తుల వాణిజ్యాన్ని కార్పొరేట్‌లు స్వాధీనం చేసుకోవడానికి ఇది అనుమతి ఇచ్చింది. రైతులకు సరసమైన ధరలను అందించే బాధ్యత నుంచి కేంద్రం తప్పుకుంటోంది’ అని తీర్మానంపై చర్చ సందర్భంగా కేరళ సీఎం విజయన్ అభిప్రాయపడ్డారు. ‘ఒకవేళ రైతుల ఆందోళనలు ఇలాగే కొనసాగితే కేరళపై దారుణ ప్రభావం చూపుతుంది.. ఒకవేళ కేరళ వంటి వినియోగ రాష్ట్రాలకు వ్యవసాయ ఉత్పతుల రాక నిలిచిపోతే ఆకలివైపు నెట్టేస్తుంది’ అని పేర్కొన్నారు. ‘ప్రస్తుతం పంటలకు ఉన్న మద్దతు ధరను కోల్పోతామని రైతులు ఆందోళన చెందుతున్నారని, ఇది కార్పొరేట్ సంస్థల బలం ముందు బేరసారాల శక్తిని బలహీనపరుస్తుంది’ అని అన్నారు. ‘వీటిని పరిగణనలోకి తీసుకుని రైతులు డిమాండ్ చేస్తున్నట్టుగా మూడు వ్యవసాయ చట్టాలను కేంద్రం రద్దుచేయాలని కేరళ శాసనసభ మనవి చేస్తోంది’ అని సీఎం విజయన్ వ్యాఖ్యానించారు. అయితే, ఇక్కడ ఆసక్తికర విషయం ఏంటంటే.. రైతులు ప్రధానంగా వ్యతిరేకిస్తున్న ఆర్థిక భద్రతను నిర్ధారించే లక్ష్యంతో భారతదేశ దీర్ఘకాల వ్యవసాయ ఉత్పత్తి మార్కెట్ కమిటీ (ఏపీఎంసీ) వ్యవస్థ కేరళలో అమలు కావడంలేదు. హార్టికార్ప్ ఉత్పత్తులు, కూరగాయల, పండ్ల అమ్మకాల కౌన్సిల్‌లతో కూడిన ప్రత్యామ్నాయ వ్యవస్థ రాష్ట్రంలో ఉంది.


By December 31, 2020 at 01:06PM


Read More https://telugu.samayam.com/latest-news/india-news/scrap-all-three-farm-laws-lest-kerala-starves-state-assembly-resolution/articleshow/80042550.cms

No comments