GHMC Elections: 30 సీట్లు గెలిస్తే చాలు.. గ్రేటర్ మేయర్ పీఠం టీఆర్ఎస్‌దే!

జీహెచ్ఎంసీ ఎన్నికల్లో టీఆర్ఎస్‌-మజ్లిస్ పొత్తు పెట్టుకొని బరిలో దిగుతుండగా.. బీజేపీ, కాంగ్రెస్, టీడీపీ, జనసేన ఒంటరి పోరుకు సిద్ధపడుతున్నాయి. ఈ ఎన్నికల్లో పోరు ప్రధానంగా టీఆర్ఎస్, బీజేపీ మధ్య సాగే అవకాశం ఉంది. దుబ్బాక ఉప ఎన్నికలో గెలిచిన ఉత్సాహం మీదున్న బీజేపీ.. గ్రేటర్ మేయర్ పీఠంపై కన్నేసింది. జీహెచ్ఎంసీ ఎన్నికల్లో సత్తా చాటి మేయర్ పీఠాన్ని దక్కించుకోవాలని ఆ పార్టీ భావిస్తోంది. కానీ మేయర్ పీఠాన్ని దక్కించుకోవడం అంత తేలికేం కాదు. 150 కార్పొరేటర్ స్థానాల్లో 100కిపైగా గెలిస్తేనే కాషాయ పార్టీకి మేయర్ పదవి దక్కే అవకాశం ఉంది. వాస్తవానికి సగానికిపైగా సీట్లు దక్కితే మేయర్ పదవిని సొంతం చేసుకోవచ్చు. అంటే 76 సీట్లొస్తే చాలు, కానీ ఎక్స్ అఫీషియో ఓట్ల కారణంగా టీఆర్ఎస్ మరోసారి మేయర్ పీఠాన్ని దక్కించుకునే అవకాశం ఉంది. జీహెచ్ఎంసీ పరిధిలో 60 వరకు ఎక్స్ అఫిషియో ఓట్లు ఉంటాయి. అంటే ఈ ప్రాంతానికి సంబంధించి ఎమ్మెల్యేలు, లోక్ సభ ఎంపీలు, ఇక్కడ నివసించే ఎమ్మెల్సీలు, రాజ్య సభ సభ్యులను ఎక్స్ అఫిషియో ఓటర్లుగా పరిగణిస్తారు. 150 మంది కార్పొరేటర్లు, 60 ఎక్స్ అఫిషియో ఓట్లు కలుపుకొని మొత్తం 210 మంది మేయర్‌ను ఎన్నుకోవాల్సి ఉంటుంది. అప్పుడు మ్యాజిక్ ఫిగర్ 106 అవ్వొచ్చు. 2016లో జీహెచ్ఎంసీ మేయర్ ఎన్నికకు మ్యాజిక్ ఫిగర్ 106. ఈసారి కూడా కాస్త అటూ ఇటుగా అంతే అయ్యే అవకాశం ఉంది. అలా జరిగే పక్షంలో టీఆర్ఎస్ ఖాతాలో 35 ఎక్స్అఫిషియో ఓట్లు ఉన్నాయి. మజ్లిస్‌కు 10 ఉండగా.. గవర్నర్ కోటాలోని 3 ఎమ్మెల్సీ ఓట్లతో కలుపుకుంటే.. టీఆర్ఎస్-మజ్లిస్ కూటమికి ఎక్స్‌అఫిషియో ఓట్ల రూపంలో 48 ఓట్లున్నాయి. బీజేపీ, కాంగ్రెస్‌కు ఎక్స్ అఫిషియో ఓట్లు తక్కువ. దీంతో గత జీహెచ్ఎంసీ ఎన్నికల్లో 99 స్థానాలు గెలుచుకున్న టీఆర్ఎస్ ఈ సారి ఆ స్థాయిలో గెలవకున్నా మేయర్ పీఠం దక్కించుకోవచ్చు. మజ్లిస్‌ ఎలాగో 30కిపైగా స్థానాల్లో గెలవడం తేలికే. కాబట్టి టీఆర్ఎస్ మరో 30 స్థానాల్లో గెలిస్తే చాలు మేయర్ పీఠం గులాబీ పార్టీకే దక్కుతుంది. 2016లో మ్యాజిక్ ఫిగర్ 106: 2009లో రాష్ట్ర విభజనకు ముందు జీహెచ్ఎంసీ పరిధిలో 65 ఎక్స్ అఫిషియో ఓట్లు ఉండేవి. ఆ ఎన్నికల్లో 25 మంది ఎమ్మెల్యేలు, 24 మంది ఎమ్మెల్సీలు, 11 మంది రాజ్యసభ సభ్యులు, ఐదుగురు లోక్ సభ సభ్యులు జీహెచ్ఎంసీ మేయర్ పీఠం కోసం ఎక్స్అఫిషియో సభ్యులుగా ఓటేశారు. కానీ రాష్ట్రం విడిపోయాక.. రాష్ట్రంలోని రాజ్యసభ సభ్యుల సంఖ్య ఐదుకి తగ్గింది. దీంతో ఎక్స్‌అఫిషియో సభ్యుల సంఖ్య 60కి తగ్గింది. దీంతో మేయర్ పదవికి మ్యాజిక్ ఫిగర్ 106గా మారింది.

By November 18, 2020 at 08:39AM

Read More https://telugu.samayam.com/telangana/news/trs-has-advantage-in-ghmc-elections-since-it-has-35-ex-officio-members-to-elect-mayor/articleshow/79274468.cms