Children's Day.. ప్రపంచమంతా నవంబరు 20న జరుపుకుంటే.. భారత్‌లో నవంబరు 14నే ఎందుకు?

నవంబర్ 14న బాలల దినోత్సవాన్ని దేశవ్యాప్తంగా వేడుకలా జరుపుకుంటాం. స్వాతంత్ర భారత తొలి ప్రధాని పండిట్ జవహర్ లాల్ నెహ్రూ పుట్టిన రోజునే బాలల దినోత్సవంగా నిర్వహిస్తున్నారు. ఆయన జన్మదినాన్ని ‘చిల్డ్రన్స్ డే’గా నిర్వహించుకోవడానికి బలమైన కారణం ఉంది. ప్రపంచ దేశాలన్నీ నవంబర్ 20న జరుపుకుంటాయి.. కానీ, భారత్‌లో మాత్రం ఆరు రోజులు ముందుగానే దీన్ని నిర్వహించుకుంటారు. భారతదేశ తొలి ప్రధాన మంత్రి జవహర్‌లాల్‌ నెహ్రూ. అత్యధిక కాలం ప్రధానిగా సేవలు అందించింది కూడా ఆయనే. బ్రిటిష్ వలసవాదుల దోపిడీకి గురైన భారతావని నేడు ఆర్థికంగా పరిపుష్టి సాధించిందంటే అందులో నెహ్రూ దార్శనికత, ముందుచూపు కారణం. ప్రధానిగా ఆయన అనుసరించిన విధానాలు దేశం ఆర్థికంగా బలపడటానికి పునాదులు వేశాయి. 1889 నవంబర్ 14న అలహాబాద్‌లో జన్మించిన నెహ్రూ భారత జాతీయోద్యమంలో ప్రముఖ పాత్ర పోషించారు. ఈ సమయంలో పలుసార్లు జైలుకు వెళ్లిన నెహ్రూ.. అక్కడ ఉన్నప్పుడే‘గ్లింప్సెస్ అఫ్ వరల్డ్ హిస్టరీ, ది డిస్కవరీ అఫ్ ఇండియా’ గ్రంథాలు రచించారు. 1929లో భారత జాతీయ కాంగ్రెస్‌కు నాయకత్వం వహించారు. 1936, 1937 తర్వాత 1946లలో కాంగ్రెస్ అధ్యక్ష బాధ్యతలను నిర్వహించారు. జాతీయోద్యమంలో గాంధీజీ తర్వాత రెండో ప్రముఖ నాయకుడిగా అవతరించారు. ప్రధానిగా బాధ్యతలు చేపట్టిన తర్వాత విదేశాంగ విధానంలో సోషలిజం వైపు మొగ్గి రష్యాతో మైత్రికి ప్రాధాన్యత ఇచ్చారు. చైనాతో పంచశీల ఒప్పందం.. అలీనవిధానం ప్రతిపాదించిన త్రిమూర్తులలో ఒకరుగా ప్రసిద్ధి చెందారు. పంచవర్ష ప్రణాళికలను ప్రారంభించి దేశ ఆర్థికాభివృద్ధికి ఎంతగానో పాటుపడ్డారు. ఇక, నెహ్రూకు పిల్లలన్నా, గులాబీలన్నా అమితమైన ప్రేమ. నెహ్రు ఎక్కడికెళ్లినా.. పిల్లలను వెతికి మరీ ఆప్యాయంగా పలకరించేవారు. వారికి కానుకలను ఇచ్చి ఉత్సాహపరిచేవారు. స్వాతంత్ర పోరాటంలో భాగంగా జైల్లో ఉన్నప్పుడు తన కుమార్తె ఇందిరకు అనేక ఉత్తరాలు రాసేవారు. స్వతహాగా రచయిత అయిన నెహ్రు తన కుమార్తెకు రాసిన ఉత్తరాల్లో బోలెడు మంచి విషయాలు చెప్పేవారు. పిల్లలు ఎలా ఉండాలి? ఎలాంటి విషయాలు నేర్చుకోవాలి? సమాజంలో మంచి, చెడులను ఎలా గ్రహించాలి? సమస్యలను ఎలా అధిగమించాలి తదితర అంశాలను కూలంకషంగా వివరించేవారు. నెహ్రూ నింపిన స్ఫూర్తి, ధైర్యంతో ఇందిర ‘ఉక్కు మహిళ’గా రూపొందారు. ప్రధానిగా పలు సాహసోపేతమైన నిర్ణయాలు తీసుకొని దేశాన్ని ముందుకు నడిపారు. తన కుమార్తె ఇందిరకు నెహ్రు రాసిన ఉత్తరాలు నేటి తరానికి పాఠాలయ్యాయి. ఆయన చెప్పిన ఆ మంచి మాటలు మనం ఎప్పటికీ ఆచరించదగినవే. పిల్లలకు కూడా పండిట్ నెహ్రూ అంటే వల్లమానిన ప్రేమ. ఆయణ్ని ముద్దుగా ‘చాచా నెహ్రూ’, ‘చాచాజీ’ అని పిలుచుకుంటారు. ఇష్టమైన మేనమామ/ బాబాయి అని దీని అర్థం. 1964లో నెహ్రూ మరణించిన తర్వాత ఆయన పుట్టిన రోజును ‘బాలల దినోత్సవం’గా నిర్వహించాలని భారత ప్రభుత్వం నిర్ణయించింది. నాటి నుంచి నవంబర్ 14ను ‘చిల్డ్రన్స్ డే’గా జరుపుకొంటున్నాం. స్వాతంత్య్రానికి ముందు బాలల దినోత్సవాన్ని నవంబర్ 20న అన్ని దేశాలతోపాటు నిర్వహించుకునేవాళ్లం. నవంబరు 20న చిల్డ్రన్స్ డే నిర్వహించాలని ఐక్యరాజ్య సమితిలోని సభ్యదేశాలు తీర్మానించాయి. 1964 వరకు భారత్ కూడా దీనినే అనుసరించినా నెహ్రు మరణం తర్వాత నుంచి నవంబర్ 14న చిల్డ్రన్స్ డే జరుపుకుంటున్నాం. ఈ రోజున పాఠశాలల్లో పండగ వాతావరణం ఉంటుంది. పిల్లలకు ఇష్టమైన చాక్లెట్లు, ఇతర కానుకలను పంచిపెడతారు. వ్యాస రచన, క్విజ్ పోటీలు నిర్వహించి బహుమతులు అందిస్తారు. అనంతరం సాంసృతిక కార్యక్రమాలతో పిల్లల్లో ఉత్సాహం నింపుతారు. పిల్లల అరుదైన వేషధారణ కూడా ఆహ్లాదం నింపుతుంది. కానీ, ఈసారి కరోనా మహమ్మారి కారణంగా బాలల దినోత్సవం పాఠశాలలో ఉత్సాహంగా జరుపుకునే అవకాశం లేకుండా పోయింది. చాచా నెహ్రూ చెప్పిన మంచి మాటలు ⍟ భయం మనలో ఎప్పటికీ ఉండకూడని విషయం. మనం ధైర్యంగా ముందడుగు వేసినప్పుడు మనకు మద్దతుగా బోలెడు మంది ఉంటారు. ఉర్దూ, హిందీ, ఇంగ్లిష్‌.. భాష ఏదైనా సరే.. అక్షరమాల నుంచే క్షుణ్ణంగా నేర్చుకోవాలి. ఏ విషయమైనా అంతే. మూలం నుంచే క్షుణ్నంగా అర్థం చేసుకోవాలి. అప్పుడే దానిపై మనకు పట్టు వచ్చేస్తుంది. (నెహ్రూ ఇందిరతో చెప్పిన మాట ఇది. మన పాఠశాలల్లో పిల్లలను గమనిస్తే.. పై తరగతులు చదువుకునే వాళ్లు కూడా సరిగ్గా అక్షరాలు గుర్తు పట్టలేరు. ఇలాంటి వారికి నెహ్రూ చెప్పిన విషయం అనుసరణీయం) ⍟ మనం కొన్ని సార్లు అబద్ధాలాడతాం. తర్వాత ఏమవుతుందోనని భయపడిపోతాం. అలా ఎప్పుడూ చెయొద్దు. మనలో ఎలాంటి రహస్యాలు దాచుకోకుండా స్వచ్ఛంగా ఉండాలి. మనం ఏ తప్పూ చేయలేనప్పుడు మాత్రమే అలా ఉండగలం. ఏదైనా లోపల దాచుకోవడానికి ప్రయత్నిస్తున్నామంటే ఏదో తప్పు చేశామనో, ఎందుకో భయపడుతున్నామనో అర్థం. ⍟ ఏది తప్పు ఏది ఒప్పు, ఏది చెయ్యవచ్చు, ఏది చెయ్యకూడదు అనేది మనంతట మనమే నిర్ణయించుకోగలగాలి. (ఓ వైపు పరీక్షలొస్తుంటే ఆటలతో కాలక్షేపం చేసే పిల్లలకు వర్తించే మాటలు ఇవి) ⍟ తెలియని విషయం గురించి ఎవరితో అయినా మాట్లాడాలంటే మనకు భయంగా ఉంటుంది. కానీ అదే చెయ్యాలి. కొన్ని సార్లు ఇతరులతో చర్చ వల్ల కూడా నిజానిజాలు తెలుస్తాయి. చాలా విషయాల్లో విజ్ఞానం ఇలాగేవస్తుంది. ⍟ మనుషులంతా సమానమే. అందులో నలుపు, తెలుపు అంటూ తేడా ఏం ఉండదు. జాతిని బట్టి మనుషులకి విలువ ఇవ్వకూడదు. ⍟ దేశాల చరిత్ర, గొప్ప వాళ్ల జీవిత చరిత్రలు చదవాలి. మామూలు వాళ్లంతా తమ జీవనోపాధి, తమ పిల్లలు అంత వరకే ఆలోచించుకుంటారు. అంతకు మించిన గొప్ప వాళ్ల గురించి చదివినప్పుడు, ఆలోచించినప్పుడే మనలోని గొప్ప వ్యక్తి బయటపడతాడు. అప్పుడే మనం అందరికీ ఆదర్శంగా ఉండగలుగుతాం. మనకంటూ ఓ చరిత్రను సృష్టించుకోగలుగుతాం. ⍟ ఇలా అనేక అంశాలను ప్రస్తావిస్తూ చిన్నారి ఇందిరలో నెహ్రూ అమితమైన ధైర్యాన్ని నింపారు. బోలెడు విజ్ఞాన విషయాల్ని ఉత్తరాల్లో పంచుకున్నారు. ఇందిర ధైర్యంగా ఎదగడానికి ఈ మాటలు ఎంతగానో తోడ్పడ్డాయి. మనమూ వీటిని పాటిస్తే.. ఉన్నతంగా ఎదిగిపోవచ్చు.

By November 14, 2020 at 06:33AM

Read More https://telugu.samayam.com/latest-news/india-news/why-celebrate-indias-first-pm-jawaharlal-nehru-birthday-as-childrens-day-on-november-14th/articleshow/79218084.cms