ప్రజలకు టీకా తప్పనిసరి చేయం.. వచ్చే నెలలో వ్యాక్సినేషన్ ప్రారంభం: బ్రిటన్
మహమ్మారిని కట్టడిచేసే వ్యాక్సిన్ కోసం ప్రపంచం వేయి కళ్లతో ఎదురుచూస్తోంది. ఇప్పటికే పలు టీకాలు మూడో దశ క్లినికల్ ట్రయల్స్ దశలో ఉన్నాయి. ఈ నేపథ్యంలో టీకాపై ఆసక్తికర వ్యాఖ్యలు చేసింది. తమ ప్రజలకు కరోనా వైరస్ టీకా తప్పనిసరి కాదని, వేయించుకోవాలో?వద్దో వారే నిర్ణయించుకోవాలని వెల్లడించింది. ఈ మేరకు యూకే ఆరోగ్య శాఖ మంత్రి మాట్‌ హాన్‌కాక్‌ మంగళవారం ఓ ప్రకటనలో తెలిపారు. అలాగే పిల్లలకు టీకాలు వేయాల్సిన అవసరం లేదని ఆయన స్పష్టం చేశారు. ‘మేము టీకాను తప్పనిసరిచేయాలని ప్రతిపాదించడం లేదు. చాలామంది ప్రజలు టీకాను వేయించుకోవడానికి సిద్ధంగా ఉన్నారని భావిస్తున్నాం.. ఇది చిన్నారులకు మాత్రం కాదు. పిల్లలు కరోనా వైరస్ బారిన పడే అవకాశం చాలా తక్కువగా ఉంది’ అని వ్యాఖ్యానించారు. బ్రిటన్‌లో కరోనా వైరస్ మళ్లీ విజృంభించడంతో రెండోసారి లాక్‌డౌన్ విధించిన సంగతి తెలిసిందే. ప్రస్తుతం అక్కడ కరోనా వైరస్ బాధితుల సంఖ్య 12 లక్షలు దాటింది. అలాగే మింక్‌ల పెంపకంపై కూడా అంతర్జాతీయ సమాజం పునరాలోచించాలని అన్నారు. ఇటీవల డెన్మార్క్‌లో మింక్‌ల నుంచి కరోనా వైరస్ వ్యాప్తిచెందుతున్నట్టు శాస్త్రవేత్తలు గుర్తించిన విషయం తెలిసిందే. రెండు దశబ్దాల కిందటే తమ దేశంలో మింక్‌ల పెంపకాన్ని నిషేధించామని, 2023 నాటికి ఐరోపాలో వీటి పెంపకం నిలిచిపోతుందని అన్నారు. వచ్చే నెలలో వ్యాక్సినేషన్ ప్రారంభిస్తామని అన్నారు. ఇదిలా ఉండగా క్రిస్టమస్ నాటికి బ్రిటన్‌లో కరోనా వ్యాక్సినేషన్ ప్రారంభించడానికి సిద్ధంగా ఉన్నట్టు డిప్యూటీ చీఫ్ మెడికల్ ఆఫీసర్ ప్రొఫెసర్ జొనాథన్ వాన్-టామ్ అన్నారు. ఫైజర్- బయోఎంటెక్ టీకా 90 శాతం ప్రభావవంతంగా ఉన్నట్టు వెల్లడి కావడం శుభపరిణామం.. కానీ రెండోసారి మహమ్మారి విజృంభిస్తే దీనిని అడ్డుకోడానికి ఎటువంటి టీకా త్వరలో రాదని హెచ్చరించారు. ‘టీకాపై ఆశాజనకంగా ఉంది.. కానీ, క్రిస్మస్ నాటికి వ్యాక్సినేషన్ ప్రారంభమవుతుందని ఖచ్చితంగా చెప్పలేం.. ఇతర వ్యాక్సిన్ల పురోగతి కూడా ముఖ్యమైంది.. దాదాపు అన్ని టీకాలు ఎస్ ప్రోటీన్‌ను లక్ష్యంగా చేసుకుంటాయి అని అన్నారు.
By November 11, 2020 at 09:02AM
No comments