బిహార్: హిల్సాలో 547 ఓట్లతో ఆర్జేడీ అభ్యర్థి విజయం.. అంతలోనే 12 ఓట్ల తేడాతో ఓటమి!
బిహార్ శాసనసభ ఎన్నికల్లో ఎన్డీఏ, మహాకూటమి హోరాహోరీగా తలపడ్డాయి. నువ్వా నేనా అన్నట్టు సాగిన ఉత్కంఠ పోరులో చివరికి విజయం నీతీశ్ నాయకత్వంలోని ఎన్డీఏకే విజయం దక్కింది. ఇదిలా ఉండగా స్వల్ప ఓట్లతోనే పలువురు ఓటమిని చవిచూశారు. ఆర్జేడీ నుంచి నలందా జిల్లా హిల్సాలో అసెంబ్లీ స్థానంలో పోటీచేసిన మాజీ ఎమ్మెల్యే శక్తిసింగ్ యాదవ్‌కు ఇటువంటి చేదు అనుభవం ఎదురయ్యింది. ఎన్నికల కమిషన్ అధికారిక వెబ్‌సైట్ అప్‌డేట్‌ను అనుసరించి జేడీ(యూ) అభ్యర్థి కృష్ణ మురారీ శరణ్ ఉరఫ్ ప్రేమ్ ముఖియాకు 61,848 ఓట్లు, సమీప ప్రత్యర్థి ఆర్జేడీ నేత శక్తిసింగ్ యాదవ్ ఉరఫ్ అత్రిమునికి 61,836 ఓట్లు వచ్చాయి. హిల్సాలో బీజేపీ అభ్యర్థి 12 ఓట్ల తేడాతో విజయం సాధించినట్టు ఎన్నికల సంఘం పేర్కొంది. ఫలితాల కాలమ్‌లో ఓట్ల తేడాను 12గా చూపింది. కానీ, అంతకు ముందు మంగళవారం రాత్రి 10 గంటల సమయంలో హిల్సా ఫలితం వెలువడుతున్న సందర్భంలో... కౌంటింగ్‌లో గందరగోళం చోటుచేసుకుందని ఆర్జేడీ ఆరోపించింది. దీనిపై ఆర్జేడీ ట్విట్టర్‌లో స్పందిస్తూ.. తమ అభ్యర్థి విజయం సాధించినట్టు ప్రకటించి అంతలోనే 12 ఓట్ల తేడాతో ఓడిపోయారని చెప్పారని ఆరోపించింది. ‘ స్థానం నుంచి పోటీచేసిన ఆర్జేడీ అభ్యర్థి శక్తిసింగ్ 547 ఓట్ల తేడాతో గెలిచారని ఎన్నికల అధికారి ప్రకటించారు. అలాగే ధ్రువీకరణ పత్రం తీసుకోవడానికి నిరీక్షించాలని చెప్పారు.. కొద్దిసేపటి తరువాత అదే అధికారి... పోస్టల్ ఓట్లను రద్దు చేసిన కారణంగా ఆర్జేడీ అభ్యర్థి శక్తిసింగ్ కేవలం 12 ఓట్ల తేడాతో ఓటమి పాలయ్యారు’ అని ట్వీట్ చేసింది. ఎన్నికల కమిషన్ ప్రకటించిన వివరాల ప్రకారం.. జేడీయూ అభ్యర్థికి 232, ఆర్జేడీ అభ్యర్థికి 233 పోస్టల్ బ్యాలెట్ ఓట్లు వచ్చాయి. నితీశ్ కుమార్, ఆయన ప్రభుత్వం ఒత్తిడితోనే తమ అభ్యర్థులు విజయం సాధించిన చోట ధ్రువీకరణ పత్రాలు ఇవ్వడానికి ఎన్నికల అధికారులు నిరాకరించారని ఆర్జేడీ ఆరోపించింది. అంతేకాదు, తమ కూటమి 119 చోట్ల విజయం సాధించినట్టు పేర్కొన్న ఆర్జేడీ.. ఆ జాబితాను కూడా విడుదల చేసింది. అయితే ఎవరో ఒత్తిడి చేశారన్ని ఆరోపణలను ఎన్నికల సంఘం ఖండించింది.
By November 11, 2020 at 10:51AM
No comments