రోజువారీ కేసుల్లో మళ్లీ టాప్‌లో అమెరికా.. భారత్‌లో తగ్గుతుంటే అక్కడ పెరుగుతున్నాయి
రెండు నెలలుపాటు ప్రపంచంలోనే అత్యధిక కేసులు భారత్‌లో నమోదుకాగా.. ప్రస్తుతం నెమ్మదించాయి. తాజాగా, అమెరికాలో భారత్ కంటే ఎక్కువ కేసులు నమోదవుతున్నాయి. గురు శుక్రవారాల్లో అమెరికాలో అత్యధికంగా పాజిటివ్ కేసులు నమోదయినట్టు గణాంకాలు వెల్లడిస్తున్నాయి. ఈ రెండు రోజులు వరుసగా 66,131, 71,687 కొత్త కేసులు నమోదుకాగా.. భారత్‌లో ఇవి 64,237, 62,587గా ఉన్నాయి. గత మూడు రోజుల నుంచి అమెరికాలో మరోసారి మహమ్మారి తీవ్రమవుతోంది. మొత్తం 71 రోజుల తర్వాత మళ్లీ పాజిటివ్ కేసులు పెరగడం ఆందోళన కలిగిస్తోంది. అమెరికాలో కేసులు తగ్గుముఖం పట్టినప్పుడు భారత్‌లో భారీగా కేసులు నమోదయ్యాయి. ప్రస్తుతం భారత్‌లో పాజిటివ్ కేసుల సంఖ్య 7.5 మిలియన్లకు చేరుకుంది. ప్రపంచంలోనే అత్యధిక కేసులు నమోదయిన దేశాల్లో అమెరికా 8.3 మిలియన్లతో తొలిస్థానంలో ఉంది. రాబోయే రోజుల్లో అమెరికాలో పాజిటివ్ కేసులు భారీగా నమోదవుతాయని అంచనా వేస్తున్నారు. అమెరికాలో కరోనా మూడో దశ కొనసాగుతోంది. సెప్టెంబరు 19న భారత్‌లో 98 వేల కేసులు నమోదుకాగా.. అప్పటి నుంచి క్రమంగా తగ్గుముఖం పట్టాయి. ఆసక్తికర విషయం ఏంటంటే అమెరికాలో సెప్టెంబరు మధ్య నుంచి కేసులు పెరుగుతుండగా.. భారత్‌లో తగ్గుతున్నాయి. జులై 25 తర్వాత అమెరికాలో పాజిటివ్ కేసులు తగ్గగా.. మళ్లీ పెరుగుతున్నాయి. మహమ్మారి బారినపడి 223,000 మంది అమెరికాలో బలయ్యారు. ఇది భారత్‌తో పోల్చితే (113,784) రెట్టింపు. శనివారం దేశవ్యాప్తంగా మరో 62,050 మందికి కొత్తగా వైరస్ నిర్ధారణ అయ్యింది. దీంతో మొత్తం కేసులు 74.9 లక్షలకు చేరాయి. మరో 812 మంది దేశంలో ప్రాణాలు కోల్పోయారు. మహారాష్ట్రలో కేసులు, మరణాలు తక్కువగా నమోదవుతున్నాయి. శనివారం 10,259 కేసులు నమోదుకాగా.. 250 మంది చనిపోయారు. దీంతో అక్కడ మొత్తం కేసులు 15,86,321కి చేరగా.. మరణాల సంఖ్య 41,956గా ఉంది. వరుసగా నాలుగో రోజు ముంబయిలో కేసులు తక్కువ సంఖ్యలో నమోదయ్యాయి. శనివారం 1,791 మందికి వైరస్ నిర్ధారణ అయ్యింది. తమిళనాడులో మరో 4,295 కేసులు, 57 మరణాలు చోటుచేసుకున్నాయి. దీంతో మొత్తం కేసులు 6,83,486కి చేరగా.. 10,586 మంది బలయ్యారు. ఏపీలోనూ 3,676 మందికి కొత్తగా వైరస్ బారినపడగా.. మరో 25 మంది చనిపోయారు.
By October 18, 2020 at 09:50AM
No comments