డొనాల్డ్ ట్రంప్, మెలానియాకు కరోనా పాజిటివ్.. ఎన్నికల ముందు ఊహించని ఎదురుదెబ్బ
అమెరికా ఎన్నికల ముందు అధ్యక్షుడు డొనాల్డ్ ట్రంప్‌కి ఊహించని ఆటంకం వచ్చిపడింది. , ఆయన భార్య మెలానియాలకు కరోనా వైరస్ పాజిటివ్‌గా నిర్ధారణ అయ్యింది. తన సలహా బృందంలో ఒకరికి కరోనా వైరస్ పాజిటివ్‌గా నిర్ధారణ కావడంతో ట్రంప్ దంపతులు కోవిడ్ పరీక్షలు చేయించుకున్నారు. దీంతో ఇద్దరికీ వైరస్ సోకినట్టు తేలింది. ఈ విషయాన్ని ట్రంప్ స్వయంగా వెల్లడించారు. ట్రంప్ సలహాదారిణి హూప్ హిక్స్ కోవిడ్ బారినపడ్డ విషయం తెలిసిందే. ఆమెతో సన్నిహితంగా మెలగడంతో ట్రంప్ కూడా వైరస్ బారినపడ్డారు. దీంతో ట్రంప్, మెలానియాలు క్వారంటైన్‌లోకి వెళ్లారు. అధ్యక్ష ఎన్నికల ప్రచారంలో భాగంగా మంగళవారం జరిగిన చర్చా కార్యక్రమంలో పాల్గొనేందుకు ట్రంప్‌తో కలిసి హూప్ హిక్స్ ఎయిర్‌ఫోర్స్ వన్ విమానంలో ప్రయాణించారు. హోప్ హిక్స్‌కు కరోనా వైరస్ సోకిన విషయాన్ని ఫాక్స్ న్యూస్‌కు ఇచ్చిన ఇంటర్వ్యూలో ట్రంప్ ధ్రువీకరించారు. ‘ఆమె చాలా హార్డ్ వర్కర్.. ఆమె తరుచూ మాస్క్ ధరిస్తుంది.. కానీ కరోనా పాజిటివ్ వచ్చింది’అన్నారు. మేము కూడా ఆమెతో చాలా సమయం గడిపాం.. ప్రథమ మహిళ కూడా పరీక్ష చేయించుకుంది అని తెలిపారు. ఎన్నికలు దగ్గరపడ్డ వేళ ఇది ట్రంప్‌కి ఓ రకంగా గడ్డుపరిస్థితే. కీలకమైన చివరి వారాల్లో ప్రచారానికి ఆయన దూరంగా ఉండాల్సిన పరిస్థితి ఎదురయ్యింది. ట్రంప్ దంపతులకు తొలిసారి మార్చిలో కరోనా నిర్ధారణ పరీక్ష నిర్వహించారు. బ్రెజిల్ అధ్యక్షుడు బోల్సోనారో సహా ఆయన కమ్యూనికేషన్‌ చీఫ్‌ ఫాబియోతో ట్రంప్ భేటీ అయ్యారు. అయితే, ఈ భేటీ జరిగిన రెండు రోజుల తర్వాత ఫాబియోకు కరోనా వైరస్ సోకినట్లు తేలింది. దీంతో డొనాల్డ్ ట్రంప్‌నకు కూడా కోవిడ్ సోకిందేమోనని అనుమానాలు వ్యక్తమయ్యాయి. దీంతో అమెరికా అధ్యక్షుడికి కరోనా పరీక్షలు నిర్వహించారు. అప్పుడు కూడా నెగెటివ్‌గా వచ్చింది. ఏప్రిల్‌లో రెండోసారి పరీక్షలోనూ ట్రంప్‌నకు నెగెటివ్ వచ్చినట్టు వ్యక్తిగత వైద్యుడు సీన్‌ పి కాన్‌లీ వెల్లడించారు. కేవలం 15 నిమిషాల్లోనే రిపోర్టు వచ్చిందని, అధ్యక్షుడికి కరోనాకు సంబంధించి ఎలాంటి లక్షణాలు లేవని ఆయన స్పష్టం చేశారు. ట్రంప్ సైతం ఈ విషయం స్వయంగా ప్రకటించారు. మీడియా సమావేశంలో ట్రంప్ మాట్లాడుతూ.. తనకు నిర్వహించిన పరీక్ష ఫలితాలు చాలా త్వరగా, కచ్చితంగా వచ్చాయని తెలిపారు.
By October 02, 2020 at 10:49AM
No comments