కోవిడ్-19 చికిత్స కోసం మ్యారీలాండ్ మిలటరీ ఆస్పత్రికి ట్రంప్
అమెరికా అధ్యక్షుడు , ఆయన సతీమణి మెలానియా ట్రంప్‌లకు నిర్ధారణ అయిన విషయం తెలిసిందే. గురువారం నిర్వహించిన కోవిడ్ పరీక్షల్లో పాజిటివ్‌గా తేలడంతో ప్రస్తుతం ఇద్దరూ క్వారంటైన్‌లోకి వెళ్లిపోయారు. కాగా, ట్రంప్ ఆరోగ్య పరిస్థితిపై సర్వత్రా ఉత్కంఠ నెలకున్న వేళ.. ఆయనను చికిత్స కోసం ఆస్పత్రికి తరలించనున్నట్టు వైట్‌హౌస్ శుక్రవారం వెల్లడించింది. వైద్యుల సూచనల మేరకు మరో రెండు రోజుల్లో మ్యారీల్యాండ్‌ బేథెస్డాలోని వాల్టర్ రీడ్ నేషనల్ మిలటరీ మెడికల్ సెంటర్‌లో ట్రంప్ చేరనున్నారని వైట్‌హౌస్ మీడియా కార్యదర్శి కైలీ మెక్‌నానీ తెలిపారు. ట్రంప్ వ్యక్తిగత వైద్యుడు, వైద్య నిపుణుల సూచనల మేరకు అత్యంత జాగ్రత్తలతో రాబోయే రెండు రోజుల్లో వాల్టర్ రీడ్ మెడికల్ సెంటర్‌లోని ప్రత్యేక వార్డు నుంచి అధ్యక్షుడు విధులు నిర్వహించనున్నారని ఓ ప్రకటనలో పేర్కొన్నారు. ట్రంప్ స్వల్ప జ్వరంతో బాధపడుతున్నట్టు ఆయన సన్నిహిత వర్గాలు వెల్లడించాయి. ట్రంప్ అలసటతో ఉన్నారు కానీ, ఆయనలో ఆత్మవిశ్వాసం తొణికిసలాడుతోందని వైట్‌హౌస్ వైద్యుడు సీన్ పీ కాన్‌లే అన్నారు. పలు అనారోగ్యాలకు చికిత్సలో ఉపయోగపడే రెజెనెరాన్ పాలిక్లోనల్ యాంటీబాడీ కాక్టెయిల్ ఒక మోతాదు ట్రంప్‌నకు ఇచ్చినట్టు ఆయన తెలిపారు. గడచిన కొన్ని దశాబ్దాల్లో అమెరికా అధ్యక్షునిగా పనిచేసిన వారెవరూ తమ పదవీకాలంలో ఇంతటి ఆరోగ్యపరమైన విపత్తును ఎదుర్కోలేదని సీఎన్‌ఎన్‌ పేర్కొంది. 74 ఏళ్ల వయసులో ట్రంప్ తీవ్ర అనారోగ్య ముప్పును ఎదుర్కొంటున్నారనీ... వృద్ధాప్యం, అధిక బరువు వంటి అంశాల కారణంగా ఆయన తీవ్ర సమస్యలను ఎదుర్కోవాల్సి రావచ్చని వైద్యులు ఆందోళన వ్యక్తం చేస్తున్నారు. ట్రంప్ కరోనా బారిన పడటంతో... రిపబ్లికన్‌ పార్టీ తదుపరి ఎన్నికల ప్రచార కార్యక్రమాలపై అనిశ్చితి నెలకొంది. అధ్యక్ష ఎన్నికల్లో భాగంగా గత మంగళవారం ట్రంప్-బైడెన్‌ల మధ్య తొలి చర్చా కార్యక్రమం జరిగింది. అక్టోబరు 15న జరిగే రెండో విడత చర్చకు హాజరు కావాల్సి ఉంది. అప్పటికి ట్రంప్ క్వారంటైన్‌ను పూర్తిచేసుకుంటారా? ఆయన ఆరోగ్య పరిస్థితి ఎలా ఉండబోతోంది? అన్నది చర్చనీయాంశంగా మారింది.
By October 03, 2020 at 06:51AM
No comments