Breaking News

అమెరికాలో టిక్ టాక్ బ్యాన్.. ఎగ్జిక్యూటివ్ ఆర్డర్‌పై ట్రంప్ సంతకం


అత్యంత ప్రజాదరణ పొందిన సోషల్ మీడియా యాప్ ‘టిక్‌టాక్’ విషయంలో అమెరికా అధ్యక్షుడు అన్నంత పనీచేశారు. టిక్‌ టాక్‌పై నిషేధం విధిస్తూ ఉత్తర్వులపై గురువారం సంతకం చేసిన ఆయన.. ఇది 45 రోజుల్లోగా అమల్లోకి వస్తుందని స్పష్టం చేశారు. ‘జాతీయ భద్రతను కాపాడటానికి యజమాన్యంపై కఠిన చర్యలు తీసుకోవాలి’అని ఎగ్జిక్యూటివ్ ఉత్తర్వుల్లో పేర్కొన్నారు. ‘ఈ ఉత్తర్వులు అమలులోకి వచ్చిన తర్వాత అమెరికా అధికార పరిధికి లోబడి బైట్‌డాన్స్ లిమిటెడ్‌తో ఏ వ్యక్తి అయినా, లేదా ఏదైనా ఆస్తికి సంబంధించి కార్యకలాపాలను నిషేధిస్తుంది’ అని తెలిపారు. ‘సమాచార, సమాచార సాంకేతిక పరిజ్ఞానం సేవలకు సంబంధించి జాతీయ అత్యవసర పరిస్థితిని పరిష్కరించడానికి ఈ చర్యలు అవసరమని ట్రంప్ ఆదేశించారు. అమెరికా వ్యాప్తంగా టిక్ టాక్ 175 మిలియన్లకుపైగా వినియోగదారులు ఉన్నారు. ప్రపంచవ్యాప్తంగా ఈ సంఖ్య బిలియన్‌కుపైగా ఉంటుంది. వినియోగదారులకు చెందిన ఇంటర్నెట్, ఇతర నెట్‌వర్క్ కార్యకలాపాల పూర్తి సమాచారాన్ని టిక్ టాక్ సంగ్రహిస్తుందని ఉత్తర్వుల్లో పేర్కొన్నారు. దీని వల్ల చైనా కమ్యూనిస్ట్ పార్టీ నుంచి అమెరికన్ల వ్యక్తిగత, యాజమాన్య సమాచారానికి ముప్పు ఉందని అన్నారు. ప్రభుత్వ ఉద్యోగులు, కాంట్రాక్టర్ల స్థానాలను ట్రాక్ చేయడానికి, బ్లాక్ మెయిల్ కోసం ప్రజలపై పత్రాలను రూపొందించడానికి, కార్పొరేట్ గూఢచర్యాన్ని నిర్వహించడానికి టిక్‌టాక్ నుంచి వచ్చిన డేటాను చైనా ఉపయోగించుకోవచ్చని తెలిపారు. ఇప్పటికే హోమ్ ల్యాండ్ సెక్యూరిటీ, ట్రాన్స్‌పోర్టేషన్ సెక్యూరిటీ విభాగం, అమెరికా భద్రత దళాలలో టిక్ టాక్ వాడకంపై ఇప్పటికే నిషేధం విధించిన విషయాన్ని ట్రంప్ ఉత్తర్వుల్లో గుర్తుచేశారు. లక్షలాది మందిని బలితీసుకున్న కరోనా వైరస్‌కు చైనాయే కారణమని అమెరికా తరుచూ విమర్శలు గుప్పిస్తోంది. అంతేకాదు, ఆ దేశం భారీ మూల్యం చెల్లించుకోక తప్పదన్న ట్రంప్.. ఈ విషయంలో మరింత దూకుడుగా ఉన్నారు.


By August 07, 2020 at 09:28AM


Read More https://telugu.samayam.com/latest-news/international-news/us-president-donald-trump-issued-orders-for-baning-tiktok/articleshow/77405917.cms

No comments