కేరళ విమాన ప్రమాదం: టేబుల్ టాప్ రన్‌వే‌నే కారణం.. 2010లో కర్ణాటకలోనూ ఇదే తరహా దుర్ఘటన
వందే భారత్ మిషన్‌లో భాగంగా దుబాయ్ నుంచి కేరళలోని కోజికోడ్‌కు చేరిన విమానం.. గమ్యస్థానానికి చేరుకున్న తర్వాత ప్రమాదానికి గురయిన విషయం తెలిసిందే. కిందికి దిగుతూనే రన్‌వే పై నుంచి కిందికి జారపడి, రెండు ముక్కలయ్యింది. ఈ ప్రమాదానికి టేబుల్ రన్‌వే కారణమని కేంద్ర పౌర విమానయాన శాఖ సహాయ మంత్రి మురళీధరన్ తెలిపారు. ఈ విమానాశ్రయంలో రన్‌వే టేబుల్ మాదిరిగా ఉంటుంది. రన్‌వేకి ఇరువైపులా చిన్నపాటి లోయలా ఉంటుంది.. విమానం లాండింగ్ సమయంలో అత్యంత అప్రమత్తంగా ఉండాలి. ఏమాత్రం తడబడినా విమానం రన్‌వే నుంచి జారిపోతుంది. దేశంలోని లేహ్‌,మంగళూరు, కోజికోడ్‌ విమానాశ్రయాలు ఈ తరహకు చెందినవే. వీటిని ఎత్తైన కొండల మధ్య పీఠభూముల్లో నిర్మించారు. రన్‌వేకు ఓవైపు లేదా రెండు వైపులా గానీ లోయలుంటాయి. ఏ మాత్రం అదుపుతప్పినా రెప్పపాటులో ఘోరం జరిగిపోతుంది. సుదీర్ఘమైన అనుభవమున్న పైలట్లకు కూడా ఈ రన్‌వేలపై విమానాలను ల్యాండింగ్ చేయడం పెద్దసవాల్‌. తాజాగా, ప్రమాదానికి గురైన బోయింగ్ 737 విమానాన్ని నడిపినవారిలో యుద్ధ విమానం నడపడంలో అపార అనుభవం ఉన్న వింగ్ కమాండర్ ఉన్నారు. 2010లో మంగళూరు విమానశ్రయంలో ఇలాంటి ప్రమాదం చోటుచేసుకుని 158 మంది ప్రాణాలు కోల్పోయారు. విమానం ల్యాండింగ్ అవుతూ అదుపుతప్పి రన్‌వే నుంచి పక్కకు వెళ్లి కిందనున్న లోయలోకి జారిపోయింది. మళ్లీ అదే టేబుల్‌టాప్‌ రన్‌వే ఉన్న కోలికోడ్‌ విమానాశ్రయంలో ప్రమాదం జరగడం గమనార్హం. మరోవైపు, విమానం ల్యాండింగ్ సమయంలో కోజికోడ్‌లో భారీగా వర్షం కురుస్తోంది. దీని వల్ల విమానం రన్‌వే నుంచి దిగి జారుకొని వెళ్లిపోవడంతో ప్రమాదం జరిగివుంటుందని అనుమానాలు వ్యక్తమవుతున్నాయి. టేబుల్ టాప్ రన్‌వే కావడంతో పాటు భారీ వర్షానికి విమానం రన్‌వే నుంచి కిందకు వెళ్లిపోయివుండవచ్చని పలువురు విమానయాన రంగ నిపుణులు అభిప్రాయపడుతున్నారు. 2,000 యుఎస్-రిజిస్టర్డ్ బోయింగ్ 737 ఎన్‌జీ, క్లాసిక్ విమానాలకు సంబంధించి యుఎస్ రెగ్యులేటర్ ఫెడరల్ ఏవియేషన్ అడ్మినిస్ట్రేషన్ జులైలో అత్యవసర నిర్దేశక ఆదేశాలు జారీ చేసింది. అవి ఇంజిన్ వైఫల్యానికి దారితీసే ముప్పు కలిగి ఉంటుందని, వారం లేదా అంతకంటే ఎక్కువ రోజులు వరుసగా ఎగరని విమానాలకు ఈ ఆదేశం వర్తిస్తుందని తెలిపింది.
By August 08, 2020 at 08:21AM
No comments