దేశంలో కరోనా కరాళ నృత్యం: 10 లక్షలు దాటిన కేసులు.. 25వేల మందికిపైగా మృతి

విషయంలో భారత్ గురువారం రెండు మైలురాళ్లు అధిగమించింది. పాజిటివ్ కేసుల సంఖ్య మిలియన్ మార్క్ దాటితే.. కరోనా మరణాలు 25వేల దాటాయి. గురువారం దేశవ్యాప్తంగా 36వేల మందికి కొత్తగా వైరస్ నిర్ధారణ కాగా.. మరో 684 మంది ప్రాణాలు కోల్పోయారు. దేశంలో కరోనా వైరస్ మొదలైన తర్వాత ఇంత పెద్ద సంఖ్యలో కేసులు, మరణాలు చోటుచేసుకోవడం ఇదే తొలిసారి. అమెరికా, బ్రెజిల్ తర్వాత పాజిటివ్ కేసులు మిలియన్ మార్క్ దాటిన మూడో దేశంగా భారత్ నిలిచింది. ఇక, కేవలం ఆరు రోజుల్లోనే పాజిటివ్ కేసులు 8 లక్షల నుంచి 10 లక్షలకు చేరాయి. అంతకు ముందు 6 లక్షల నుంచి 8 లక్షలకు చేరడానికి 9 రోజులు పట్టింది. గురువారం దేశంలో 36,139 మందికి కొత్తగా వైరస్ నిర్ధారణ కాగా.. బుధవారంతో పోల్చితే ఈ సంఖ్య 3,600 అధికం. ప్రస్తుతం దేశంలో పాజిటివ్ కేసుల సంఖ్య 10,04,806కి చేరగా.. మరణాలు 25,609గా నమోదయ్యాయి. గురువారం మరో 23వేల మంది దేశవ్యాప్తంగా కోలుకోవడంతో మొత్తం కోలుకున్నవారి సంఖ్య 6.36 లక్షలకు చేరింది. మరో 3.46 లక్షల మంది వివిధ ఆస్పత్రుల్లో చికిత్స పొందుతున్నారు. మహారాష్ట్రలో అత్యధికంగా 266 మంది చనిపోగా.. తర్వాత కర్ణాటకలో 104 మంది చనిపోయారు. మహారాష్ట్ర, ఢిల్లీ తర్వాత ఒకే రోజు 100 మందికిపైగా కరోనా రోగులు చనిపోయిన మూడో రాష్ట్రంగా కర్ణాటక నిలిచింది. గురువారం తమిళనాడులో 69, ఢిల్లీ 58, ఆంధ్రప్రదేశ్ 40, ఉత్తరప్రదేశ్ 34, బెంగాల్ 23, జమ్మూ కశ్మీర్ 16 మంది ప్రాణాలు కోల్పోయారు. కనీసం 11 రాష్ట్రాల్లో రోజువారీ కేసులు రికార్డుస్థాయిలో నమోదయ్యాయి. మహారాష్ట్ర 8,641, తమిళనాడు 4,549, కర్ణాటక 4,169, ఆంధ్రప్రదేశ్ 2,593, ఉత్తరప్రదేశ్ 2,083, బెంగాల్ 1,690, బీహార్ 1,690, కేరళ 722, జమ్మూ కశ్మీర్ 490, ఝార్ఖండ్ 381, చత్తీస్‌గఢ్ 218 మందికి కొత్తగా వైరస్ నిర్ధారణ అయ్యింది. కర్ణాటకలో తొలిసారి పాజిటివ్ కేసులు 4వేల మార్క్ దాటింది. ఇది ముందు రోజుతో పోల్చితే 1,000 అధికం. మహారాష్ట్రలో పాజిటివ్ కేసులు 2.84 లక్షలకు చేరగా.. 11వేల మంది ప్రాణాలు కోల్పోయారు. ముంబయిలో మరోసారి పాజిటివ్ కేసులు పెద్ద సంఖ్యలో నమోదయ్యాయి. గురువారం 1,476 కేసులు బయటపడగా.. మొత్తం అక్కడ 97,950కి చేరాయి. తమిళనాడులో పాజిటివ్ కేసులు పెరిగినా.. చెన్నైలో మాత్రం కేసులు తగ్గుముఖం పట్టాయి. తెలంగాణలో కొత్తగా 1,676 మందికి వైరస్ నిర్ధారణ కాగా.. 10 మంది ప్రాణాలు కోల్పోయారు. దీంతో మొత్తం కరోనా కేసులు 40వేలకు చేరాయి. గురువారం ఏకంగా 14,027 మందికి పరీక్షలు నిర్వహించారు. తాజా గణాంకాల ప్రకారం.. తెలంగాణలో ఇప్పటి వరకూ సేకరించిన నమూనాల్లో దాదాపు 19 శాతం పాజిటివ్‌గా నిర్దారణ అయ్యింది.

By July 17, 2020 at 07:22AM

Read More https://telugu.samayam.com/latest-news/india-news/coronavirus-india-surges-past-1-million-cases-with-record-one-day-spike/articleshow/77010256.cms