చైనాతో చర్చలు కొనసాగిస్తూనే సైన్యాలను సంసిద్ధం చేస్తున్న భారత్
చైనా సరిహద్దుల్లో నెలకున్న ప్రతిష్టంభనపై లెఫ్టినెంట్-జనరల్ స్థాయిలలో చర్చలు విఫలం కావడంతో ఉత్తర సరిహద్దులలో సైనిక కార్యాచరణ సంసిద్ధతను భారత్ మరింత అప్రమత్తం చేసింది. సరిహద్దుల్లో చైనా ఆర్మీ నిర్మాణాలకు ప్రతిస్పందనంగా 3,488 కిలోమీటర్ల వాస్తవాధీన రేఖ (ఎల్ఏసి) వెంబడి పశ్చిమ (లడఖ్), మధ్య (ఉత్తరాఖండ్, హిమాచల్ప్రదేశ్), తూర్పు (సిక్కిం, అరుణాచల్ప్రదేశ్) మూడు భాగాలవైపు అన్ని ఆర్మీ యూనిట్లు, ఐఏఎఫ్ ఎయిర్బేస్లు సన్నద్ధమయ్యాయి. చైనా ఒకవేళ ఏదైనా దుస్సాహసానికి ఒడిగడితే ఎలాంటి అవకాశం ఇవ్వకుండా తిప్పికొట్టేందుకు సంసిద్ధం చేసింది. చైనా పీపుల్స్ ఆర్మీ తన బలగాలను వెనక్కు మళ్లించనంత కాలం లడఖ్ నుంచి అరుణాచల్ వరకు మా దళాలను సరిహద్దుల్లో నుంచి వెనక్కు తరలించే ప్రసక్తేలేదని ఆర్మీ వర్గాలు తెలిపాయి. కాగా, ఇదే సమయంలో చర్చల ద్వారా వివాదాన్ని శాంతియుతంగా పరిష్కరించుకుంటామని స్పష్టం చేసింది. భారత్-చైనాల మధ్య తూర్పు లడఖ్ సరిహద్దుకు సంబంధించి నెలకొన్న ప్రతిష్టంభనను సైనిక, దౌత్యపరమైన ఒప్పందాల ద్వారా శాంతియుతంగా పరిష్కరించుకునేందుకు చర్యలు చేపడుతున్నట్లు భారత్ ప్రకటించింది. ఈ మేరకు కేంద్ర విదేశాంగ మంత్రిత్వ శాఖ అధికార ప్రతినిధి అనురాగ్ శ్రీవాస్తవ ఒక ప్రకటన చేశారు. సరిహద్దు ప్రాంతాల్లో ప్రశాంతతను నెలకొల్పుతూ..రెండు దేశాలకు చెందిన నాయకుల మార్గదర్శకాల మేరకు వివాదాన్ని పరిష్కరించుకునేందుకు ఇరువర్గాలు అంగీకరించాయని తెలిపారు. గాల్వాన్ లోయ నుంచి ఇరు దేశాలకు చెందిన సైనిక బలగాల ఉపసంహరణకు గల కారణాలపై స్పందించేందు మాత్రం ఆయన నిరారకరించారు. ‘జూన్ 6న భారత్-చైనాకు చెందిన లెఫ్టినెంట్ స్థాయి అధికారుల మధ్య సమావేశం జరిగింది. ఈ సమావేశంలో రాజ్యాంగ నిబంధనలను అనుసరించి సైనిక, ద్వైపాక్షిక ఒప్పందాలకు అనుగుణంగా సరిహద్దు పరిస్థితులపై చర్చించారు. ఇరు దేశాలూ మార్గదర్శకాలకు అనుగుణంగా గతంలో మాదిరిగానే సైనిక, ద్వైపాక్షిక ఒప్పందాలను గౌరవిస్తూ వివాదాలను శాంతియుతంగా పరిష్కరించుకోవాలని నిర్ణయించాయి. భారత్-చైనా ద్వైపాక్షిక సంబంధాల అభివృద్ధికి ఇది ఎంతో అవసరం’ అని శ్రీవాస్తవ తెలిపారు. కాగా, మంగళవారం గాల్వాన్ వ్యాలీలో 14, 15 గస్తీ కేంద్రాల నుంచి ఇరు దేశాలు తమ బలగాలను ఉపసహరించుకున్నట్లు సైనిక వర్గాలు తెలిపాయి.
By June 12, 2020 at 08:26AM
No comments