చైనాకు మరోసారి డబ్ల్యూహెచ్ఓ మద్దతు.. ఆ విషయంలో అందరూ డ్రాగన్‌నే అనుసరిస్తారట!
కరోనా వైరస్ విషయంలో ప్రపంచ ఆరోగ్య సంస్థ (డబ్ల్యూహెచ్ఓ) వైఖరిపై పలు దేశాలు అనుమానాలు వ్యక్తం చేస్తున్న విషయం తెలిసిందే. వైరస్ విషయమై ప్రపంచాన్ని హెచ్చరించడంలో విఫలమైందని అమెరికా అధ్యక్షుడు ట్రంప్ బాహటంగానే ఆరోపించారు. అంతేకాదు, ఆ సంస్థకు నిధులను కూడా నిలిపివేస్తూ సంచలన నిర్ణయం తీసుకున్నారు. ఈ నేపథ్యంలో మరోసారి డబ్ల్యూహెచ్ఓ వైఖరి చర్చనీయాంశమయ్యింది. కరోనా వైరస్ మరణాల సంఖ్యను చైనా సవరించిన విషయం తెలిసిందే. వుహాన్‌లో మరణాలు 50 శాతం పెంచి శుక్రవారం విడుదల చేసిన నివేదిక విషయంలో డబ్ల్యూహెచ్ఓ చైనాకు బాసటగా నిలవడం గమనార్హం. ఏ ఒక్క మరణం అధికారిక గణాంకాల నుంచి తప్పించుకోరాదనే ఉద్దేశంతోనే సంఖ్యను చైనా పెంచిందని సన్నాయి నొక్కులు నొక్కింది. కరోనా వైరస్ విషయంలో కుట్రపూరితంగానే చైనా, డబ్ల్యూహెచ్ఓ వ్యవహరించాయని అమెరికా, బ్రిటన్‌ వంటి దేశాల ఆరోపిస్తున్నాయి. ఈ తరుణంలో చైనాకు డబ్ల్యూహెచ్ఓ మద్దతుగా నిలవడం చర్చనీయాంశంగా మారింది. ఒక అడుగు ముందుకేసి మరణాల సంఖ్యను సవరించే విషయంలో మిగతా దేశాలు చైనాను అనుసరిస్తాయని డబ్ల్యూహెచ్ఓ కోవిడ్-19 టెక్నికల్ లీడ్ మరియా వెన్ కెర్ఖోవ్ వ్యాఖ్యానించారు. జెనీవాలో మీడియా సమావేశంలో కెర్ఖోవ్ మాట్లాడుతూ... ఒక్కసారి వైరస్ అదుపులోకి రావడం ప్రారంభమైతే ఆయా దేశాలు మరణాల సంఖ్యను పెంచుతాయని పేర్కొన్నారు. వైరస్ తీవ్రంగా ఉన్న సమయంలో కరోనా బాధితులు, మృతిచెందినవారి వాస్తవ సంఖ్యను నమోదుచేయడం సవాల్‌తో కూడుకున్న పని.. కాబట్టి మరణాలన్నింటినీ లెక్కించామో.. లేదోనని అన్ని దేశాలు ఒక్కసారి వెనక్కి తిరిగి చూసుకోవాల్సి వస్తుందని ఆమె అభిప్రాయపడ్డారు. వుహాన్‌లో వైరస్ తీవ్రరూపం దాల్చడంతో ఆస్పత్రులన్నీ బాధితులతో కిక్కిరిసి పోయాయని.. దీంతో కొంత మందికి చికిత్స తీసుకునే వీళ్లేకపోవడంతో ఇంటి వద్దే చనిపోయారని తెలిపారు. తాత్కాలిక హాస్పిటల్స్‌లో చికిత్స అందజేయడంలో తీరిక లేకుండా ఉన్న వైద్యులు.. మరణాల సంఖ్యను నమోదుచేయలేకపోయారంటూ చైనాకు మద్దతు పలికారు. డబ్ల్యూహెచ్ఓ అత్యవసర విభాగం డైరెక్టర్ మైఖేల్‌ ర్యాన్‌ సైతం ఇదే అభిప్రాయం వ్యక్తం చేశారు. అన్ని దేశాలకు ఇలాంటి పరిస్థితి తప్పదని వ్యాఖ్యానించారు. అయితే, వీలైనంత త్వరగా.. వాస్తవ రికార్డులను ప్రపంచానికి తెలపాలని కోరారు.
By April 18, 2020 at 12:41PM
No comments