దేవుడిచ్చిన చెల్లి ఇక లేదు... విషాదంలో యాంకర్ ఉదయభాను

ప్రముఖ తీవ్ర విషాదంలో నిండిపోయింది. తెలుగు టీవీ షోల్లో ఎన్నో కార్యక్రమాలకు యాంకర్‌గా పనిచేసింది. అనేక సామాజిక అంశాల పట్ల కూడా ఉదయభాను స్పందిస్తూ ఉంటుంది. దిశా హత్యాచార ఘటన సమయంలో కూడా ఉదయభాను తన గళం గట్టిగా వినిపించింది. తాజాగా తనకు దేవుడిచ్చిన బంగారు చెల్లులు ఇక లేదని ఫేస్ బుక్‌లో పోస్టు పెట్టింది. తెలంగాణ నల్గొండ జిల్లాలో ఫ్లోరైడ్ సమస్య ఎక్కువగా ఉన్న విషయం తెలిసిందే. జిల్లాలోని మర్రిగూడెం మండలం ఖుధాబక్షు పల్లికి చెందిన రజిత అనే యువతి ఫ్లోరైడ్ బాధితురాలు. ఆమె ఇవాళ ఉదయం పదిగంటలకు చనిపోయింది. అదే విషయాన్ని ఉదయభాను తన సోషల్ మీడియా పేజీల్లో పోస్టు పెట్టి తీవ్ర ఆవేదన వ్యక్తం చేసింది. ఉదయ భాను ఫేస్ బుక్ పోస్టు చూస్తే.... ‘రజితమ్మ నాకు దేవుడిచ్చిన బంగారు చెల్లెల్లలో ఒకరు... తను ఇక లేదు. 24 ఏళ్లకే నిండు నూరేళ్లు నిండిపోయాయి... తిరిగి రాని లోకాలకి వెళ్లిపోయింది... ఈ ఉదయం 10 గంటలకు అస్తమించింది నా చిట్టి చెల్లి రజితమ్మ..... నిశ్శబ్దంగా సడి చప్పుడు లేకుండా తన ప్రశ్నలకి జవాబు దొరకకముందే వెళ్లిపోయింది. పొరపాటు పడకండి ఇది కరోనా మరణం కాదు... గాలి నీరు నింగిని కల్మషం చేసిన కరుణ లేని కర్కశుల వల్ల కలిగిన మరణం... మానవ తప్పిదాలకు స్వార్ధానికి ప్రత్యక్ష సాక్షి ఈ రజితమ్మ. 2014 నిగ్గదీసి అడుగు కార్యక్రమం చేస్తున్నప్పుడు నల్గొండ జిల్లా మర్రిగూడెం మండలం ఖుదాబక్షుపల్లి లో నాకు ఈ చిట్టి తల్లితో విడదీయలేని బంధం ఏదో ముడిపడిపోయింది. ఆ ఊరి పేరు ఖుదాబక్ష్ అంటే అర్ధం - దేవుడు రక్షించుగాక అని.. కానీ మానవుడి స్వార్ధం ముందు దేవుడు కూడా ఆ పల్లెను రక్షించలేకపోయాడు. ఆలా ఎన్ని ఊర్లో అక్కడ. ఫ్లోరైడ్ రక్కసి కోరల్లో చిక్కుకున్న నిస్సహాయులైన బిడ్డలెందరో.. కలుషిత నీటి రూపం లో ఫ్లోరైడ్ విషం తాగుతున్న బిడ్డలెందరో.. తాము చేయని తప్పుకు జీవితాంతం శిక్షను అనుభవిస్తున్న అసహాయులు ఎందరో.. అలంటి బిడ్డే ఈ రజితమ్మ. తనని చూసి నా గుండె తరుక్కుపోయింది.. తనకు నా చేతనైంది చేయాలనీ సంకల్పించి తన కాళ్ళ మీద తాను నడవలేకపోయిన, తన జీవితం లో తలెత్తుకుని బ్రతకాలని ఓ చిన్ని ప్రయత్నం చేసాను. ఒక చిన్న కిరానా కొట్టు పెట్టించాను.. అప్పటినుంచి తన తుది శ్వాశ వరకు ఓటమి ఎరుగక ఎంత ముద్దుగా చక్కగా షాప్ ని నడుపుకుందో.. తను తన కుటుంబానికి భారం కాదు ఆసరా అయింది.. తన ఆత్మా విశ్వాసం ఎందరికో భరోసా నిచ్చింది. ప్రతి పండక్కి తనకి కలిగిన ప్రతి సంతోషానికి నాకొక ఫోటో పంపేది.. షాప్ ముందు రంగురంగుల పెద్ద ముగ్గు వేసి, ముగ్గు మధ్యలో చిన్న బొడ్డెమ్మాలా కూర్చుని.. అక్క హ్యాపీ సంక్రాంతి.. అక్క హ్యాపీ దసరా.. అక్క హ్యాపీ దీపావళి.. అక్క హ్యాపీ BIRTHDAY..అక్క పాపలకి ముద్దులు అంటూ అందరికంటే ముందు తను WISHES పంపేది.. ఇప్పుడిక ఆ WISHES రావు.. ఇక నా చిట్టి చెల్లి లేదు.. గుండెలవిసి పోయేలా ఏడ్చినా ఇక రాదు.. ఏ జన్మ బంధమో తన గుండె నిండా నా పైన ఎంత ప్రేమో.. మాటల్లో చెప్పలేని దుఃఖం కట్టలు తెంచుకుని వస్తుంది. ఖుదాభక్షపల్లి లో భూగర్భంలోకి నీరింకినట్టు నా కళ్ళలో నీళ్లింకిపోతున్నాయి. అక్క నేనెందుకు ఇలా అయ్యాను.. నా తప్పేంటి.. నాలా ఇంకెంతమంది.. ఇంకెంతకాలం ఇలా పుడతారు. ఇలా తను సంధించిన ప్రశ్నలకి సమాధానం చెప్పేది ఎవ్వరు ? నా చిట్టి చెల్లి రజితమ్మ ఆత్మకు శాంతి కలగాలని మనసారా కోరుకుంటూ రజిత వాళ్ళ అక్క ఉదయ భాను . అంటూ హృదయ విదారకమైన పోస్టును ఉదయ భాను పోస్టు చేసింది. అంతేకాదు... వీటిని తెలంగాణ సీఎం కేసీఆర్‌తో పాటు మంత్రి కేటీఆర్, టీఆర్ఎస్ పార్టీకి ట్యాగ్ చేసింది.

By April 18, 2020 at 12:04PM

Read More https://telugu.samayam.com/telugu-movies/cinema-news/telugu-anchor-udaya-bhanu-emotional-post-in-facebook/articleshow/75216880.cms