మధ్యప్రదేశ్లో రేపే బలపరీక్ష... కమల్నాథ్ సర్కార్ నిలబడుతుందా?
మధ్యప్రదేశ్ రాజకీయాలు రసవత్తరంగా మారాయి. బీజేపీ ఆడిన రాజకీయ చదరంగంలో కమల్నాథ్ సర్కార్ పావుగా మారింది. రేపు మధ్యప్రదేశ్లోని కాంగ్రెస్ సర్కార్ బలపరీక్షను ఎదుర్కోనుంది. ఈ విషయాన్ని స్వయంగా ఆ రాష్ట్ర గవర్నర్ లాల్టీ టాండనే ప్రకటించారు. అసెంబ్లీ బలపరీక్ష నిర్వహించాలని శనివారం ఎంపీ మాజీ సీఎం శివరాజ్ సింగ్ చౌహాన్ నేతృత్వంలో బీజేపీ బృందం గవర్నర్ టాండన్ను కలిసింది. బీజేపీ నేతలు గవర్నర్తో భేటీ అయ్యారు. బడ్జెట్ సమావేశాలు ప్రారంభానికి ముందే... బలపరీక్షల నిర్వహించాలని కోరారు. ఈ మేరకు గవర్నర్కు వినతి పత్రం కూడా సమర్పించారు. కాంగ్రెస్ ప్రభుత్వం ప్రస్తుతం మైనార్టీలో పడిపోయిందన్నారు శివరాజ్ సింగ్ చౌహాన్. రాజ్యాంగ పరంగా వారికి ప్రభుత్వాన్ని నడిపే హక్కు లేదన్నారు. కమల్నాథ్ సర్కారు అసెంబ్లీలో తమ బల పరీక్షను నిరూపించుకోవాలని, అంత వరకూ ఎలాంటి నిర్ణయాలు తీసుకునే హక్కు వారికి లేదన్నారు. జ్యోతిరాదిత్య సింధియా రాజీనామాతో మధ్యప్రదేశ్ కాంగ్రెస్లో రాజకీయం మారిపోయింది. సింధియా అసమ్మతితో కాంగ్రెస్ పార్టీకి మధ్యప్రదేశ్లో షాక్ తగిలింది. సింధియా వెంట పలువురు ఎమ్మెల్యేలు కలిసి నడిచారు.దీంతో కమల్ నాథ్ ప్రభుత్వం అంతర్గత కుమ్ములాటలు చోటు చేసుకున్నాయి. 2018 లో కమల్నాథ్ నేతృత్వంలో కాంగ్రెస్ సర్కారు ఏర్పడినప్పటి నుంచీ అంతర్గతంగా సవాల్ను ఎదుర్కొంటూనే ఉంది. సీనియర్ నేత, ముఖ్యమంత్రి కమల్నాథ్కు, యువనేత, రాజ కుటుంబానికి చెందిన జ్యోతిరాదిత్య సింధియాకు మధ్య యుద్ధం నడుస్తూనే ఉంది. చివరికి సింధియా పార్టీకి రాజీనామా చేశారు. వెంటనే మోదీని కలిసి బీజేపీ తీర్థం పుచ్చుకున్నారు. తాను కాంగ్రెస్లో ఉంటే ప్రజలకు సేవ చేయలేనని, అందుకే తాను పార్టీకి రాజీనామా చేసి, బీజేపీలో చేరుతున్నానని సింధియా తన రాజీనామా లేఖలో పేర్కొన్నారు. అయితే సింధియాకు మద్దతుగా దాదాపు 22 మంది కాంగ్రెస్ ఎమ్మెల్యేలు రాజీనామా చేశారు. దీంతో కమల్నాథ్ సర్కారు మైనారిటీలో పడిపోయింది. అయితే రెండు రోజుల క్రితం గవర్నర్ టాండన్ను కలిసి కమల్ నాథ్ బలపరీక్షకు తాను సిద్ధమని ప్రకటించారు. దీంతో ఈ పరిస్థితుల్లో రేపు జరగబోయే బలపరీక్ష కమల్నాథ్కు కత్తి మీద సామే అంటున్నారు రాజకీయ విశ్లేషకులు. మరి బలపరీక్షను కమల్ సర్కార్ ఎలా ఎదుర్కుంటుందో వేచి చూడాలి.
By March 15, 2020 at 08:36AM
No comments