డివైడర్ను ఢీకొట్టి పల్టీలు కొట్టి తవేరాాను ఢీకొన్న కారు.. 13 మంది మృతి
కర్ణాటకలో శుక్రవారం ఉదయం ఘోర రోడ్డు ప్రమాదం సంభవించింది. బెంగళూరు- మంగళూరు జాతీయ రహదారిపై రెండు కార్లు ఒకదానికి ఒకటి ఢీకొట్టాయి. ఈ ప్రమాదంలో 13 మంది మృతిచెందారు. కార్లు ఢీకొట్టి పల్టీలు కొట్టడంతో వాహనాల్లోని వారు తీవ్రంగా గాయపడ్డారు. కునిగల్ తాలూకా అమరితూరు పోలీస్ స్టేషన్ పరిధిలో బాలాడ్కేరే వద్ద ఉదయం 3.00 గంటల ప్రాంతంలో ఈ ప్రమాదం చోటుచేసుకుంది. బెంగళూరు నుంచి నలుగురు యువకులు కారులో ధర్మస్థలికి వెళ్తుండగా వారు ప్రయాణిస్తున్న వాహనం అమరితూరు వద్ద అదుపుతప్ప డివైడర్ను ఢీకొట్టింది. ఇదే సమయంలో ఎదురుగా వస్తున్న తవేరా వాహనాన్ని కారు ఢీకొట్టడంతో రెండూ పల్టీలు కొట్లాయి. దీంతో కారులోని ముగ్గురు, తవేరాలోని తొమ్మిది మంది మొత్తం 12 మంది అక్కడికక్కడే మృతిచెందారు. వీరిలో తొమ్మిది నెలల చిన్నారి కూడా ఉంది. ప్రమాదంలో తీవ్రంగా గాయపడిన మరో వ్యక్తి హాస్పిటల్లో చికిత్స పొందుతూ చనిపోయాడు. తమిళనాడులోని హోసూరుకి చెందిన ఓ కుటుంబం తొమ్మిది నెలల చిన్నారికి పుట్టు వెంట్రుకలు తీయించడానికి తమ బంధువులతో కలిసి తవేరా వాహనంలో ధర్మస్థలి మంజునాథస్వామి దర్శనానికి వచ్చారు. అక్కడ దర్శనం పూర్తయిన తర్వాత హోసూరుకు వెళ్తుండగా బెంగళూరు నుంచి వస్తున్న కారు డివైడర్ను ఢీకొట్టి ఇవతలి వైపుకు వచ్చి తవేరాను ఢీకొట్టింది. ఊహించని విధంగా కారు ఎదురుగా రావడంతో తవేరాను డ్రైవర్ అదుపుచేయలేకపోయాడు. దీంతో వాహనం పల్టీలుకొట్టి దూసుకెళ్లింది. మృతులను తమిళనాడుకు చెందిన తొమ్మిది నెలల చిన్నారి, మంజునాథ్ (35), తనూజ (25), గౌరమ్మ (60), రత్నమ్మ (52), సౌందరాజన్ (48), రాజేంద్ర (27), సరళ (32), ప్రసూన (14), మాలాశ్రీ (4)గా గుర్తించారు. కారులోని యువకులు లక్ష్మీకాంత్ (24), సందీప్ (36), మధు (28) మృతిచెందారు. గాయపడిన శ్వేత (32), హర్షిత (12), గంగోత్రి (14), ప్రకాశ్ను చికిత్స కోసం కునిగల్ హాస్పిటల్కు తరలించారు. ఈ ప్రమాదం గురించి సమాచారం అందుకున్న పోలీసులు ఘటనా స్థలికి చేరుకుని సహాయక చర్యలు చేపట్టారు. కేసు నమోదుచేసి దర్యాప్తు చేపట్టారు. కారు నడుపుతున్న వ్యక్తి నిర్లక్ష్యమే ఈ ప్రమాదానికి కారణమని నిర్ధారించారు. మృతదేహాలను పోస్ట్మార్టం కోసం కునిగల్ హాస్పిటల్కు తరలించారు.
By March 06, 2020 at 08:20AM
No comments