YS Jagan: జగన్ను కాదని.. తెలంగాణ ఎంపీకి అపాయింట్మెంట్ ఇచ్చిన అమిత్ షా!
ఢిల్లీ పర్యటనలో ఉన్న సీఎం జగన్.. సోమవారం హోం శాఖ మంత్రి అమిత్ షాతో భేటీ కాలేకపోయారు. మహారాష్ట్ర, హర్యానా అసెంబ్లీ ఎన్నికల కారణంగా తీరిక లేకుండా ఉన్నారని సమాచారం. అందుకే ఆయన జగన్ను కలవలేకపోయారని తెలుస్తోంది. అమిత్ షాతో భేటీ కోసం ప్రత్యేక విమానంలో సోమవారం మధ్యాహ్నం ఢిల్లీ వెళ్లారు. మంగళవారం కూడా ఆయన దేశరాజధానిలో ఉన్నారు. ఈ రోజు ఆయన అమిత్ షాతోపాటు.. న్యాయ, ఐటీ శాఖ మంత్రి రవిశంకర్ ప్రసాద్తో ఆయన భేటీ అవుతారని వైఎస్ఆర్సీపీ వర్గాలు వెల్లడించాయి. సోమవారం జగన్కు అపాయింట్మెంట్ ఇవ్వని అమిత్ షా నిజామాబాద్ బీజేపీ ఎంపీ ధర్మపురి అర్విందర్కు అపాయింట్మెంట్ ఇచ్చారు. 15 నిమిషాలపాటు ఆయనతో భేటీ అయ్యారు. పసుపు బోర్డుపై ఆయన అమిత్ షాతో చర్చించారని సమాచారం. సీఎం హోదాలో ఉన్న జగన్కు అపాయింట్మెంట్ ఇవ్వకుండా.. ఎంపీకి అపాయింట్మెంట్ ఇవ్వడం చర్చకు దారి తీసింది. అమిత్ షాను కలవడానికి జగన్ ఇటీవలే మూడుసార్లు ప్రయత్నించారు. కానీ ఆయన్ను మాత్రం కలవలేకపోయారు. జగన్మోహన్ రెడ్డి కేంద్ర హోం శాఖ మంత్రిని కలవడం కోసం ఎందుకు ఇంత ఆసక్తి చూపిస్తున్నారేది స్పష్టంగా తెలియరాలేదు. కానీ టీడీపీ శ్రేణులు మాత్రం సీబీఐ కేసుల విషయంలోనే ఆయన అమిత్ షాను కలవాలని ప్రయత్నిస్తున్నారని ఎద్దేవా చేస్తున్నాయి. కానీ జగన్ తీసుకుంటున్న నిర్ణయాల పట్ల కేంద్రం అసంతృప్తితో ఉందని.. అందుకే ఆయనకు కావాలనే అమిత్ షా అపాయింట్మెంట్ దక్కడం లేదనే ప్రచారం జరుగుతోంది. పోలవరం రివర్స్ టెండరింగ్, పీపీఏల పునఃసమీక్ష లాంటి నిర్ణయాల పట్ల కేంద్రం ఇప్పటికే అసంతృప్తిని వ్యక్తం చేసింది. తాము వద్దన్నా.. జగన్ ముందుకెళ్తుండటం.. కేంద్రానికి నచ్చలేదని.. అందుకే అమిత్ షా ఇలా వ్యవహరిస్తున్నారనే వాదన వినిపిస్తోంది. అక్టోబర్ 5న ఢిల్లీ వెళ్లిన జగన్.. ప్రధాని మోదీని కలిశారు కానీ.. హోం మంత్రి అమిత్ షాతో మాత్రం భేటీ కాలేకపోయారు. మరుసటి రోజే ఏబీన్ ఆంధ్రజ్యోతి ఎండీ రాధాకృష్ణ ఢిల్లీలో హోం మంత్రి నివాసంలో ఆయన్ను కలిసి మాట్లాడారు. అమిత్ షా ఆహ్వానం మేరకే తాను ఢిల్లీ వెళ్లి ఆయన్ను కలిశానని ఆర్కే అప్పట్లో పేర్కొన్నారు. ఇదంతా చూస్తుంటే.. బీజేపీ ఏదో గేమ్ ప్లాన్ను సిద్ధం చేసిందని భావిస్తున్నారు. ఏపీలో ఎదగడమే లక్ష్యంగా పెట్టుకున్న బీజేపీ ఇన్నాళ్లూ టీడీపీని టార్గెట్ చేసింది. ఇక నుంచి వైఎస్ఆర్సీపీని టార్గెట్ చేయనుందా..?
By October 22, 2019 at 07:49AM
No comments