‘ఖైదీ’గా మారిన Karthi, ట్రైలర్ బాగుంది కానీ..
ప్రముఖ తమిళ నటుడు కార్తికి తెలుగులోనూ మంచి మార్కెట్ ఉంది. ‘ఆవారా’ సినిమాతోనే తెలుగు ప్రేక్షకులకు కూడా కనెక్ట్ అయిపోయాడు. అప్పటినుంచి తాను తమిళంలో నటిస్తున్న ప్రతి సినిమాను తెలుగులోనూ విడుదల చేస్తూ వస్తున్నాడు. తాజాగా ‘ఖైదీ’ అనే చిత్రంతో ప్రేక్షకుల ముందుకు రాబోతున్నాడు. ఈ సినిమాకు సంబంధించిన తెలుగు ట్రైలర్ను తాజాగా విడుదల చేశారు. ఇందులో కార్తి దిల్లీ అనే పాత్రలో నటించాడు. దాదాపు పదేళ్లుగా జైలులో శిక్ష అనుభవిస్తున్న కార్తి ఒక్కసారిగా తప్పించుకుంటాడు. విలన్ చేస్తున్న అక్రమ వ్యాపారాలను అరికట్టడానికి అతని ట్రక్కు తీసుకుని వెళ్లిపోతాడు. ట్రైలర్ను బట్టి చూస్తే సినిమాలో కార్తికి ఓ కూతురు కూడా ఉన్నట్లు తెలుస్తోంది. అయితే ఇందులో హీరోయిన్ లేదు. సినిమా మొత్తం కార్తి జీవితం చుట్టూనే తిరుగుతుంది. అతన్ని పట్టుకోవాలని పోలీసులతో పాటు విలన్ కూడా ప్రయత్నిస్తుంటాడు. ఇంతకీ కార్తి జైలుకి ఎందుకు వెళ్లాడు? ఆ తర్వాత ఎందుకు తప్పించుకున్నాడు? అన్నదే సినిమా కథ. సినిమాను యాక్షన్ థ్రిల్లర్గా తెరకెక్కించినట్లు ట్రైలర్ను బట్టే అర్థమవుతోంది. ఇటీవల ఈ సినిమాకు సంబంధించిన తమిళ ట్రైలర్ విడుదల చేశారు. దీనికి 1.6 మిలియన్ వ్యూస్ వచ్చాయి. ఈ సినిమా ‘మద్రాస్’, ‘ఖాకీ’ సినిమాలలాగే ఉండబోతోందని కార్తి ఆడియో లాంచ్ వేడుకలో వెల్లడించారు. లోకేష్ కనకరాజ్ ఈ సినిమాను డైరెక్ట్ చేశారు. సెప్టెంబర్ 27న సినిమా రిలీజ్ అవ్వాల్సి ఉంది. కానీ పోస్ట్ ప్రొడక్షన్ వర్క్ లేట్ అవడంతో దీపావళికి సినిమాను ప్రేక్షకుల ముందుకు తీసుకురానున్నారు. ‘చినబాబు’లాంటి మంచి ఫ్యామిలీ ఎంటర్టైనర్తో విజయం అందుకున్న కార్తి.. ఆ తర్వాత ‘దేవ్’ అంటూ రొటీన్ స్టోరీతో ప్రేక్షకుల ముందుకు వచ్చాడు. కానీ ఈ సినిమా అట్టర్ ఫ్లాప్ అయింది. దాంతో మంచి కథలను ఎంపిక చేసుకుని ఒకేసారి మూడు సినిమాలకు సంతకం చేశాడు. అందులో ‘ఖైదీ’ ఒకటి. ‘ఖైదీ’ టైటిల్ మన తెలుగువారికి కొత్తేం కాదు. ఈ టైటిల్ వినగానే మనకు మెగాస్టార్ చిరంజీవినే గుర్తుకొస్తారు. ఆ తర్వాత ‘ఖైదీ నెం 150’ అనే సినిమాను కూడా ఆయనే చేశారు. ఇప్పుడు మళ్లీ ఇదే టైటిల్తో కార్తి తెలుగు మార్కెట్లో రిస్క్ తీసుకుంటున్నాడు. కార్తి ఇప్పటివరకు నటించిన అన్ని సినిమాల్లో హీరోయిన్ ఉంది. కానీ ఈ సినిమాలో మాత్రం హీరోయిన్ గ్లామర్, పాటలకు ఎటువంటి స్కోప్ లేదు. ఆ రకంగా చూసుకుంటే కార్తి తొలిసారి ప్రయత్నిస్తున్న కొత్త కాన్సెప్ట్ అనే చెప్పాలి. మరి ప్రేక్షకులు సినిమాను ఎలా ఆదరిస్తారు అన్నది తెలియాలంటే మాత్రం దీపావళి వచ్చేవరకు వేచి చూడాలి.
By October 14, 2019 at 12:41PM
No comments