పవన్ కళ్యాణ్ కోసం ఎదురు చూసి చివరకు..
అజ్ఞాతవాసి సినిమా తర్వాత పవర్ స్టార్ పవన్ కల్యాణ్ పూర్తిగా సినిమాలకు దూరమైపోయారు. ఈ సినిమా చేస్తు్న్న సమయంలోనే పవన్ జనసేన పార్టీని స్థాపించారు. ఓ పక్క రాజకీయాలతో బిజీగా ఉంటూనే మరోపక్క సినిమా షూటింగ్లలో పాల్గొన్నారు. త్రివిక్రమ్ శ్రీనివాస్ దర్శకత్వం వహించిన ఈ సినిమా కమర్షియల్గా మంచి విజయం సాధించలేకపోయింది. ఆ తర్వాత పవన్ సినిమాల గురించి ఆలోచించడం పూర్తిగా మానేశారు. తన ఫోకస్ అంతా రాజకీయాలపైనే పెట్టారు. కానీ ఎప్పటికైనా పవన్ మళ్లీ సినిమాలు చేయకపోరా అని ఎదురుచూసిన దర్శకులు చాలా మంది ఉన్నారు. వారిలో సంపత్ నంది ఒకరు. పవన్తో సినిమా చేయాలని దాదాపు ఆయన రెండేళ్ల ఎదురుచూశారు. ఎటూ పవన్ నుంచి ఎలాంటి స్పందన రాకపోయేసరికి ఇక గోపీచంద్తో సినిమా చేయాలని నిర్ణయించుకున్నారు. పవన్ సినిమా చేయాలని ఎదురుచూసి విసిగిపోయిన మరో దర్శకుడు సంతోష్ శ్రీనివాస్. కందిరీగ, రభస సినిమాలను తెరకెక్కించిన సంతోష్ కూడా పవర్ స్టార్తో సినిమా చేయాలని కలలు కన్నాడు. కథ సిద్ధం చేసుకుని మైత్రి మూవీ మేకర్స్తో ఒప్పందం కూడా కుదుర్చుకున్నాడు. సినిమాను నిర్మించడానికి మైత్రి మూవీ మేకర్స్ రెడీగా ఉన్నప్పటికీ పవన్ మాత్రం రెడీగా లేరు. ఎలాగైనా మంచి హిట్ కొట్టాలన్న కసితో ఉన్న సంతోష్ తన టైం వేస్ట్ చేసుకోకూడదని అనుకున్నాడు. అందుకే యువ కథానాయకుడు బెల్లంకొండ శ్రీనివాస్తో సినిమా చేయాలని నిర్ణయించుకున్నాడు. వీరిద్దరి కాంబినేషన్లో తమిళంలో మంచి విజయం అందుకున్న ‘తెరి’ సినిమా రీమేక్ రాబోతున్నట్లు గాసిప్స్ వినిపిస్తున్నాయి. సంపత్, సంతోష్ మాత్రమే కాదు జనసేనానితో సినిమా చేయాలని కిశోర్ పార్థసాని, క్రిష్, హరీశ్ శంకర్, తమిళ దర్శకుడు హరి కూడా లైన్లో ఉన్నారు. ‘గద్దలకొండ గణేశ్’ సినిమాతో బ్లాక్ బస్టర్ విజయం అందుకున్న హరీశ్ శంకర్ పవన్తో సినిమా గురించి ఇటీవల తన అభిప్రాయాన్ని వెల్లడించారు. తనతో పాటు ఫ్యాన్స్ కూడా గట్టిగా అనుకుంటే పవన్తో సినిమా చేసేలా ఆ దేవుడు కరుణిస్తాడేమోనని ఆశాభావం వ్యక్తం చేశారు. ప్రస్తుతం ఉన్న పరిణామాలు చూస్తే పవన్ మళ్లీ సినిమాల్లోకి వచ్చే అవకాశం లేదనిపిస్తోంది. అదీకాకుండా ఆయన కొంతకాలంగా వెన్నునొప్పితో బాధపడుతున్నారు. సర్జరీ చేస్తే కానీ ఆ నొప్పి పోదని డాక్టర్స్ ఆయనకు సూచించారు. కానీ ఆయన ఆయుర్వేద చికిత్స తీసుకోవాలని అనుకుంటున్నారని ప్రస్తుతం ఆయనకు చికిత్స జరుగుతోందని సన్నిహితులు వెల్లడించారు.
By October 05, 2019 at 11:03AM
No comments