సునంద ఆత్మహత్య కేసు: పోస్ట్‌మార్టం రిపోర్టుతో థరూర్ చుట్టూ ఉచ్చు!

కేంద్ర మాజీ మంత్రి, కాంగ్రెస్ ఎంపీ శశిథరూర్ భార్య ఢిల్లీలోని ఓ హోటల్‌లో 2014 జనవరిలో ఆత్మహత్యకు పాల్పడిన విషయం తెలిసిందే. అయితే, ఆమె ఆత్మహత్య దారితీసిన కారణాలపై కోర్టుకు నివేదిక సమర్పించారు. తీవ్ర మానసిక వేదనతో సునంద ఆత్మహత్యకు పాల్పడినట్టు ల్లీ పోలీసులు తమ నివేదికలో పేర్కొన్నారు. భర్తతోనూ సంబంధాలు సరిగ్గా లేకపోవడంతో ఆమె తీవ్ర ఒత్తిడికి గురైందని తెలిపారు. అంతేకాదు, సునందను థరూర్ వేధింపులకు గురిచేశారని... ఈ క్రమంలోనే ఆమె ఆత్మహత్యకు ఆమె పాల్పడ్డారని వారు ఆరోపించారు. పోస్ట్‌మార్టం నివేదిక ప్రకారం సునంద బాడీలో విషం ఉందని, శరీరంపై కాళ్లు, చేతులు, మణికట్టుతో సహా 15 చోట్ల గాయాలు ఉన్నాయని కోర్టుకు తెలియజేశారు. అంతేకాదు, పాకిస్థానీ మహిళా జర్నలిస్టు మెహర్ తరార్‌తో శశిథరూర్ సన్నిహితంగా ఉండటం కూడా సునందను మానసిక వేదనకు గురిచేసిందని తెలిపారు. న్యాయమూర్తి అజయ్ కుమార్ కున్హార్ ముందు ప్రత్యేక పబ్లిక్ ప్రాసిక్యూటర్ అతుల్ శ్రీవాస్తవ వాదనలు వినిపిస్తూ, పోలీసుల నివేదికను అందజేశారు. సునంద స్నేహితురాలు, జర్నలిస్ట్ నళిని సింగ్ వాంగూల్మం సైతం ఛార్జ్‌షీట్‌లో పేర్కొన్నారు. ఆత్మహత్యకు పాల్పడటానికి ముందు సునంద తనకు ఫోన్‌చేసి చెప్పిన అంశాలను ఇందులో వివరించారు. ‘జనవరి 17న ఏడ్చుకుంటూ తనకు ఫోన్ చేసిన సునంద.. మెహర్ తారార్‌, థరూర్‌ సంబంధం గురించి మీడియాలో జరుగుతున్న ప్రచారం గురించి మాట్లాడింది. థరూర్, తారార్‌పై ప్రతీకారం తీర్చుకోవాలని ఉందని, మీడియాలో చెడుగా ప్రచారం జరుగుతోందని వాపోయింది. ఐపీఎల్ విషయంలో థరూర్‌కు తాను ఎంతో సహాయం చేశానని, అయినా తనను మోసం చేశాడు.. ఇరువురు మధ్య జరిగిన ఫోన్ మెసేజ్‌లు తన దృష్టికి వచ్చాయి. తాను ఇంటికి వెళ్లనని, లీలాప్యాలెస్ హోటల్‌కు వెళ్తున్నట్టు’ తనకు సునంద చెప్పినట్టు నళిని పేర్కొంది. అలాగే, తారార్‌కు పంపిన ఈ-మెయిల్‌లోనూ ‘మై డార్లింగిస్ట్’ అంటూ థరూర్ రాశారని, వారి ఇద్దరి మధ్య ఉన్న సంబంధం ఎలాంటిదో ఈ లేఖలు వెల్లడిస్తున్నాయని కోర్టుకు వివరించారు. కాగా, సునంద ఆత్మహత్య కేసులో నిందితుడిగా ఉన్న శశిథరూర్ ప్రస్తుతం బెయిల్ పై ఉన్నారు. ఆయనపై ఐపీసీ సెక్షన్ 498-ఏ, 306 కింద కేసులు నమోదై ఉన్నాయి. థరూర్ తరఫున సీనియర్ లాయర్ వికాస్ పహ్వా వాదనలు వినిపిస్తూ.. తన క్లయింట్ అలాంటి మెయిల్స్ పంపిన దాఖలాలు లేవని అన్నారు. అనంతరం కేసును ఆగస్టు 31కి న్యాయమూర్తి వాయిదా వేశారు.

By August 21, 2019 at 11:59AM

Read More https://telugu.samayam.com/latest-news/india-news/delhi-police-says-injury-marks-found-on-sunanda-pushkars-body-in-postmortem-report/articleshow/70766164.cms