సీఎం హోదాలో తొలిసారి కడపకు.. ఆ నేత అడ్డాలో జగన్ బహిరంగ సభ!

ఆంధ్రప్రదేశ్ ఎన్నికల్లో ఘన విజయం సాధించి, ముఖ్యమంత్రి బాధ్యతలు చేపట్టిన తర్వాత వైఎస్‌ జగన్‌మోహన్‌రెడ్డి తొలిసారిగా జులై 8న తన సొంత జిల్లాలో పర్యటించనున్నారు. ఈ నేపథ్యంలో అధికారులు భారీ ఏర్పాట్లు చేస్తున్నారు. పులివెందుల, జమ్మలమడుగు నియోజకవర్గాల్లో సీఎం సోమవారం పర్యటించనున్నారు. దివంగత ముఖ్యమంత్రి వైఎస్ జయంతిని పురస్కరించుకుని ఇడుపులపాయలోని వైఎస్ సమాధి వద్ద నివాళులర్పిస్తారు. అనంతరం అక్కడ పలు అభివృద్ధి కార్యక్రమాలకు శంకుస్థాపన చేస్తారు. గండి క్షేత్రంలో ఆలయ అభివృద్ధి కార్యక్రమాలను ప్రారంభించిన అనంతరం, పులివెందులలో డాక్టర్‌ వైఎస్సార్‌ హార్టికల్చర్‌ యూనివర్శిటీకి అనుబంధంగా అరటి రీసెర్చ్‌ స్టేషన్‌‌కు శంకుస్థాపన చేయనున్నారు. తర్వాత జమ్మలమడుగు బహిరంగ సభలో పాల్గొననున్నారు. రైతులకు మద్దతు ధర, వైఎస్సార్‌ పెన్షన్‌ పథకాలను సీఎం జగన్ ప్రారంభిస్తారు. ఎన్నికలకు ముందు హామీ ఇచ్చినట్టుగా క్వింటాల్ శనగలకు రూ. 6,500, వైఎస్సార్‌ పెన్షన్‌ రూ. 2,250లు లబ్దిదారులకు జగన్ అందిస్తాపారు. వృద్ధులకు, వికలాంగులకు, వితంతువులకు పెరిగిన పెన్షన్లను అందజేయనున్నారు. జగన్ పర్యటన నేపథ్యంలో ముద్దనూరు రోడ్డులో సుమారు ఎనిమిది ఎకరాల స్థలంలో రైతు దినోత్సవం కోసం బహిరంగ సభ ఏర్పాట్లు చేశారు. దాదాపు 20 వేలమంది కూర్చునేందుకు వీలుగా సభా ప్రాంగణాన్ని తీర్చిదిద్దుతున్నారు. ప్రధాన వేదికపై 75 మంది కూర్చునేలా తీర్చిదిద్దుతున్నట్లు అధికారులు తెలిపారు. ఈ ఏర్పాట్లను జిల్లా కలెక్టర్‌ హరికిరణ్‌, ఎస్పీ అభిషేక్‌ మొహంతి ఇతర అధికారులు శనివారం పరిశీలించారు. బహిరంగ సభ ఏర్పాట్లపై అసంతృప్తి వ్యక్తం చేసినట్లు తెలిసింది. సీఎం సభకు మధ్యలో ఒక్క రోజే ఉండడంతో పనులను ఇంకా వేగవంతం చేయాలని ఆదేశించినట్లు సమాచారం. పోలీసు జాగిలంతో సభా ప్రాంగణాన్ని తనిఖీ చేయించారు. జగన్ పర్యటనను విజయవంతం చేయాలని ఇప్పటికే అధికారులకు ఆదేశాలు అందగా, పార్టీ నేతలు వైఎస్ అవినాశ్ రెడ్డి, వైఎస్ కొండారెడ్డి తదితరులు దగ్గరుండి ఏర్పాట్లను పరిశీలిస్తున్నారు. కాగా, మాజీ మంత్రి ఆదినారాయణ రెడ్డి సొంత నియోజకవర్గం జమ్ములమడుగులో జగన్ బహిరంగ సభను నిర్వహించడం చర్చనీయాంశమైంది.

By July 07, 2019 at 12:36PM

Read More https://telugu.samayam.com/latest-news/state-news/ap-cm-jagan-mohan-reddy-tomorrow-will-visit-pulivendula-and-jammalamadugu-in-kadapa/articleshow/70113389.cms