అమరావతి నిర్మాణంపై సభలో బొత్స వ్యాఖ్యలు.. కేశినేని సెటైర్లు!

ఆంధ్రప్రదేశ్ శాసనసభ బడ్జెట్ సమావేశాల సందర్భంగా గురువారం ప్రశ్నోత్తరాల సమయంలో రాజధాని అమరావతి నిర్మాణ పనులపై ఎమ్మెల్యే మద్దాళి గిరిధర్‌రావు అడిగిన ప్రశ్నకు పట్టణాభివృద్ధి మంత్రి బొత్స సత్యనారాయణ సమాధానమిచ్చారు. ఏపీకి దేశంలోనే గొప్ప రాజధాని నిర్మిస్తామని బొత్స సత్యనారాయణ పేర్కొన్నారు. గత ప్రభుత్వం అంతర్జాతీయ స్థాయి నగరం నిర్మిస్తామని ఏదేదో చెప్పిందని, తాము నిర్మించే రాజధాని ఆంధ్రుల సంస్కృతికి తగ్గట్టుగా ఉంటుందని అన్నారు. రాష్ట్ర ఆర్థిక పరిస్థితులకు అనుగుణంగానే రాజధానిని నిర్మిస్తామని స్పష్టం చేశారు. టీడీపీ హయాంలో రాజధాని పేరుతో లంచాలు తీసుకున్నారని, కొందరు పెద్దలు భూములు లాక్కున్నారనే ఆరోపణలున్నాయని మంత్రి చెప్పారు. ఈ అవినీతిపై మంత్రివర్గ ఉపసంఘం, నిపుణుల కమిటీలు ఇచ్చే నివేదికలను పరిశీలించాక తగిన చర్యలు తీసుకుంటామన్నారు. కాగా, గత కొన్ని రోజులుగా సొంత పార్టీ నేతలపై సోషల్ మీడియాలో తనదైన శైలిలో విమర్శలు గుప్పించిన టీడీపీ నేత, విజయవాడ పార్లమెంటు సభ్యుడు వైసీపీ నేతలను టార్గెట్ చేశారు. వైసీపీ నేత పీవీపీపై విమర్శలు గుప్పించిన కేశినేని, తాజాగా ఏపీ మంత్రి బొత్స సత్యనారాయణపై వ్యంగ్యాస్త్రాలు సంధించారు. ‘ఆంధ్రప్రదేశ్‌కు దేశంలోనే మంచి రాజధాని నిర్మిస్తాం. రాష్ట్ర ఆర్థిక పరిస్థితులకు తగ్గట్లు ఈ నిర్మాణం చేపడతాం. ఆంధ్రుల సంస్కృతికి తగట్టు నూతన రాజధాని ఉంటుంది’ అని బొత్స చెప్పడంపై వెటకారంగా ట్వీట్ చేశారు. ‘దేశంలోనే మంచి రాజధానిని ఫోక్స్ వ్యాగన్ వ్యవహారంలో కొట్టేసిన డబ్బులతోనే కడతారా?’ అని సెటైర్ వేశారు. ఉమ్మడి రాష్ట్రంలో బొత్స సత్యనారాయణ భారీ పరిశ్రమల మంత్రిగా ఉన్న సమయంలో జర్మనీకి చెందిన ఫోక్స్ వ్యాగన్ సంస్థ మధ్యవర్తిగా ఉన్న వశిష్ట వాహన్ అనే కంపెనీ రూ.11 కోట్లు చెల్లించారు. అయితే వశిష్ట వాహన్‌తో తమకు సంబంధం లేదని వోక్స్ వ్యాగన్ ప్రకటించడంతో ఈ కుంభకోణం వెలుగులోకి వచ్చింది. వైఎస్ సీఎంగా ఉన్న సమయంలో ఫోక్స్‌వ్యాగన్ సంస్థ విస్తరణ పేరుతో విశాఖలో కార్ల కంపెనీ ఏర్పాటుకు ముందుకు వచ్చింది. అయితే ఈ అవకాశాన్ని ఆసరా చేసుకున్న ఫోక్స్‌వ్యాగన్ కంపెనీ బోర్డు సభ్యుడు హెల్మత్ షుష్టర్ ప్రభుత్వంతో చర్చలు జరిపి వాటాగా రూ.11.60 కోట్లు కేటాయించాలని ప్రతిపాదించారు. ఫోక్స్‌వ్యాగన్‌కు ఇండియాలో అనుబంధ సంస్థగా ఉన్న వశిష్ట వాహన్ సంస్థ పేరు మీద రూ.11.60 కోట్లను విడుదల చేయించారు. డబ్బులు వశిష్ట వాహన్ ఖాతాలో పడగానే ఆ డబ్బులు డ్రా చేసుకొని షుష్టర్ పరారయ్యాడు. ఈ విషయంలో అప్పటి నాటి భారీ పరిశ్రమల మంత్రి బొత్స సత్సనారాయణపై ఆరోపణలు రావడంతో సీబీఐ దర్యాప్తునకు వైఎస్ ఆదేశించారు. బొత్సకు ఎలాంటి సంబంధంలేదని సీబీఐ విచారణ జరిపి తేల్చింది.

By July 19, 2019 at 11:29AM

Read More https://telugu.samayam.com/latest-news/state-news/tdp-leader-vijayawada-mp-kesineni-satire-on-ap-minister-botsa-due-to-comments-on-amaravati/articleshow/70288736.cms