కుల్భూషణ్ కేసులో నేడు ఐసీజే తీర్పు.. భారత్లో ఉత్కంఠ
పాక్ చెరలో బంధీగా ఉన్న భారత నౌకాదళ మాజీ అధికారి కుల్భూషణ్ జాదవ్ కేసులో అంతర్జాతీయ న్యాయస్థానం బుధవారం తీర్పు వెలువరించినుంది. తమ దేశంలో గూఢచర్యానికి పాల్పడ్డారనే ఆరోపణలతో 2016 మార్చిలో సైన్యం అరెస్ట్ చేయగా, తర్వాత పాక్ సైనిక కోర్టు ఆయనకు 2017 ఏప్రిల్ 11న మరణశిక్ష విధించింది. అయితే, దీనిపై అంతర్జాతీయ న్యాయస్థానాన్ని భారత్ ఆశ్రయించింది. భారత్ వాదనలతో ఏకీభవించిన అంతర్జాతీయ న్యాయస్థానం, పాక్ మిలటరీ ఆర్బిటర్ కోర్టు జాదవ్కు విధించిన శిక్షను తాత్కాలికంగా నిలిపివేయాలని ఆదేశించింది. తదుపరి ఉత్తర్వులు ఇచ్చేవరకూ ఎలాంటి నిర్ణయం తీసుకోరాదని స్పష్టం చేసింది. కోర్టు ఆదేశాలతో కుల్భూషణ్ శిక్షను పాకిస్థాన్ నిలిపివేసింది. ఈ కేసులో అంతర్జాతీయ న్యాయస్థానం (ఐసీజే) ఎదుట ఫిబ్రవరిలో నాలుగు రోజులపాటు ఇరు దేశాలూ వాదనలు వినిపించాయి. ఈ వాదనలు పూర్తయిన తర్వాత విచారణ పూర్తిచేసి తీర్పును వాయిదా వేసింది. తీర్పు తమకు అనుకూలంగా వస్తుందని భారత్ భావిస్తోంది. బుధవారం తీర్పు వెల్లడికానున్న ఈ నేపథ్యంలో ఒక రోజు ముందే పాకిస్థాన్ న్యాయ బృందం నెదర్లాండ్లోని ది హేగ్కు చేరుకుంది. మంగళవారం పాక్ విదేశాంగ అధికార ప్రతినిధి మహమ్మద్ ఫైజల్తో పాటు, పాకిస్థాన్ అటార్నీ జనరల్ అన్వర్ మన్సూర్ ఖాన్ సారథ్యంలోని కమిటీ అక్కడికి వెళ్లింది. స్థానిక కాల ప్రకారం జులై 17 మధ్యాహ్నం 3గంటలకు అంతర్జాతీయ న్యాయస్థానం తీర్పు వెలువరించనుందని సమాచారం. ఫిబ్రవరి 18న భారత్ వాదనలు వినిపిస్తే, మర్నాడు పాక్కు ఆ అవకాశం లభించింది. కుల్ భూషణ్ జాదవ్ కేసులో భారత్ వాదనలను తప్పుబట్టిన పాక్ తమ దేశంలో జరిగిన అనేక బాంబు పేలుళ్ల వెనుక ఇండియా హస్తముందని తీవ్ర ఆరోపణలు చేసింది. ముఖ్యంగా 2014లో జరిగిన ఉగ్ర దాడిలో భారత్ ప్రమేయముందని ఆరోపించింది. భారత్ నిజాలను దాస్తోందన్న దాయాది ఆత్మాహుతి దాడులతో బలూచిస్థాన్లో అల్లకల్లోలం సృష్టించేందుకు జాదవ్ ప్రయత్నించాడని వాదనలు వినిపించింది. అయితే, పాక్ ఆరోపణలను భారత్ తిప్పికొట్టింది. భారత్ తరఫున మాజీ సొలిసిటర్ జనరల్ హరీశ్ సాల్వే ప్రాతినిధ్యం వహించారు. పాక్ తరఫున బారిస్టర్ ఖావర్ ఖురేషి వాదనలు వినిపించారు.
By July 17, 2019 at 10:21AM
No comments