బీజేపీలో టీడీపీ నేతల చేరికపై బాబు ఆసక్తికర వ్యాఖ్యలు
బీజేపీలోకి నేతల వలసలపై మాజీ ముఖ్యమంత్రి, ఆ పార్టీ అధినేత చంద్రబాబు ఆసక్తికర వ్యాఖ్యలు చేశారు. హైదరాబాద్‌లో చంద్రబాబుతో కేశినేని నాని, గల్లా జయదేవ్, కింజరాపు రామ్మోహన్ నాయుడిలతో ఆదివారం భేటీ అయ్యారు. ఈ సందర్భంగా చంద్రబాబు మాట్లాడుతూ... ముఖ్యమంత్రి జగన్‌మోహన్‌రెడ్డి వరుస తప్పులు చేస్తూ నియంతలా పాలించాలని చూస్తున్నారని మండిపడ్డారు. ప్రజలకు అవసరమైనవి చేయాలి కానీ ఇష్టానుసారం చేస్తామంటే కుదరదని అన్నారు. టీడీపీ నేతలు నిరంతరం ప్రజలకు దగ్గరగా ఉంటూ జగన్ తప్పులను జనంలోకి తీసుకెళ్లాలని ఎంపీలకు బాబు సూచించారు. ఇదే సమయంలో టీడీపీకి చెందిన పలువురు నేతలు బీజేపీలో చేరుతున్న అంశం ప్రస్తావనకు వచ్చింది. దీనిపై స్పందించిన చంద్రబాబు.. పార్టీ నుంచి వెళ్లిపోయేవారు వెళ్తారని, వారి స్థానంలో కొత్తవారికి అవకాశాలు కల్పించి మరింత బలోపేతం చేసుకుందామని వ్యాఖ్యానించారు. ఎంతమంది నేతలు చేరినా ఆంధ్రప్రదేశ్‌లో ఎదగడం కష్టమని, కేరళ, తమిళనాడుల్లోనూ ఆ పార్టీ పుంజుకోదని అన్నారు. మన పని మనం చేసుకుంటూ ఎప్పటికప్పుడు ప్రజా సమస్యలను గుర్తించి వాటిపై పోరాటాలు చేద్దామని, జనాలకు దగ్గరగా ఉండాలని దిశానిర్దేశం చేశారు. పార్టీని సంస్థాగతంగా మరింత బలోపేతం, పునర్నిర్మాణం తదితర అంశాల్లో ముగ్గురు ఎంపీలూ క్రియాశీలక పాత్ర పోషించాలని బాబు స్పష్టం చేశారు. పార్లమెంటు సమావేశాల్లో ఎంపీల పనితీరుపై చంద్రబాబు సంతృప్తి వ్యక్తం చేశారు. ముగ్గురూ బాగా మాట్లాడుతున్నారని, ఎంతమందికైనా దీటుగా సమాధానాలు చెప్పగలుగుతున్నారని పేర్కొన్నారు. పార్లమెంటు సమావేశాలు లేనప్పుడు నియోజకవర్గాలకే పరిమితం కాకుండా గుంటూరులోని టీడీపీ రాష్ట్ర కార్యాలయంలో అందుబాటులో ఉండాలని సూచించారు. పార్టీ కార్యక్రమాలను పర్యవేక్షిస్తూ కార్యకర్తల్లో ఆత్మస్థైర్యం నింపి, పార్టీని తిరిగి అధికారంలోకి తీసుకురావడంలో కీలకంగా వ్యవహరించాలని ఉద్బోధించారు. సామర్థ్యాల పెంపు, కేడర్ బలోపేతం చేసుకోవడం లాంటి అంశాలపై దృష్టిసారించాలని టీడీపీ ఎంపీలను ఉద్దేశించి చంద్రబాబు వ్యాఖ్యానించారు. తాజా రాజకీయ పరిణామాలు, అనుసరించాల్సిన వ్యూహాలు తదితర అంశాలపై కూడా ఎంపీలతో చంద్రబాబు చర్చించారు.
By July 22, 2019 at 08:46AM
No comments