క్లైమాక్స్కు చేరిన కర్ణాటకం.. నేడు కుమారస్వామి రాజీనామా?
రెండు మూడు రోజులుగా ఉత్కంఠ రేపుతున్న కర్ణాటక రాజకీయం క్లైమాక్స్కు చేరింది. ముఖ్యమంత్రి గురువారం తన పదవికి రాజీనామా చేసే అవకాశాలు కనిపిస్తున్నాయి. బుధవారం సాయంత్రం నుంచి శరవేగంగా మారిన పరిణామాలతో కుమారస్వామి సంకీర్ణ ప్రభుత్వాన్ని రద్దు చేయాలన్న నిర్ణయానికి వచ్చినట్లు వార్తలు వినిపిస్తున్నాయి. ఈరోజు ఉదయం 11 గంటలకు కుమారస్వామి అత్యవసరంగా కేబినెట్ భేటీ నిర్వహించనున్నారు. ఈ సందర్భంగానే ఆయన రాజీనామా చేస్తారని తెలుస్తోంది. దీంతో పాటు మొత్తం అసెంబ్లీనే రద్దు చేయాలన్న ప్రతిపాదనను గవర్నర్కు అందచేయనున్నట్లు సమాచారం. కర్ణాటకలో అసంతృప్త ఎమ్మెల్యేల సంఖ్య 16కు చేరడంతో సంక్షోభం మరింత ముదిరింది. దీంతో బుధవారం కుమారస్వామి ఎలాంటి సెక్యూరిటీ లేకుండా బయటకు వెళ్లి కొన్ని గంటల పాటు రహస్య ప్రాంతానికి వెళ్లిపోయారు. తర్వాత జేపీ నగర్లోని తన సొంతింటికి చేరుకున్నారు. తాజా పరిణామాలపై తన తండ్రి దేవెగౌడతో చర్చించారు. ఆయన సలహా మేరకే సీఎం పదవికి రాజీనామా చేయాలని కుమారస్వామి నిర్ణయించుకున్నట్లు తెలుస్తోంది. ఈ సంక్షోభానికి కాంగ్రెస్ నేత సిద్ధరామయ్య అన్న ప్రచారం కూడా జరుగుతోంది. సీఎం పదవి కోసం సిద్ధరామయ్య ఆడుతున్న మైండ్గేమ్లో కుమారస్వామి చిక్కుకున్నట్లు రాజకీయ విశ్లేషకులు అభిప్రాయపడుతున్నారు. ఒకవేళ ప్రభుత్వాన్ని ఏర్పాటు చేసేందుకు కాంగ్రెస్ పార్టీ ముందుకొస్తే బయటి నుంచి మద్దతివ్వాలని జేడీఎస్ నిర్ణయానికి వచ్చినట్లు తెలుస్తోంది. బుధవారం కుమారస్వామి, దేవెగౌడ భేటీలోనూ దీనిపై చర్చ జరిగినట్లు సమాచారం. ఈ విషయంలో కాంగ్రెస్ పార్టీ వ్యవహరిస్తున్న తీరుపై కుమారస్వామి మనస్తాపం చెందినట్లు తెలుస్తోంది.
By July 11, 2019 at 08:22AM
No comments