ఎమ్మెల్యేల సస్పెన్షన్‌కు నిరసనగా అసెంబ్లీ ఎదుట టీడీపీ ధర్నా
ఆంధ్రప్రదేశ్ శాసనసభలో మంగళవారం ముగ్గురు ఎమ్మెల్యేలపై సస్పెన్షన్ వేటుపడిన విషయం తెలిసిందే. ఫింఛన్ అంశంపై అధికార, ప్రతిపక్షాల మధ్య తీవ్ర వాగ్వాదం చోటుచేసుకున్న సమయంలో టీడీపీఎల్పీ ఉపనేత కే అచ్చెన్నాయుడు, ఎమ్మెల్యేలు గోరంట్ల బుచ్చయ్య చౌదరి, నిమ్మల రామానాయుడులను స్పీకర్ సస్పెండ్ చేశారు. ఎస్సీ, ఎస్టీ, బీసీ, మైనార్టీ మహిళలకు 45ఏళ్లకే పెన్షన్ స్థానంలో వైఎస్సార్‌ చేయూత తెచ్చామని సీఎం జగన్ వివరణ ఇవ్వడంతోపాటు తాను గతంలో చేసిన ప్రసంగాల వీడియో క్లిప్పింగులను స్పీకర్ అనుమతితో సభలో ప్రదర్శించారు. ఆ తర్వాత కూడా టీడీపీ సభ్యుల ఆందోళన కొనసాగించారు. ఎస్సీ, ఎస్టీ, బీసీ, అల్ప సంఖ్యాక వర్గాల చెందిన 45 ఏళ్ల మహిళలకు పింఛన్లు మంజూరు చేయడంపై టీడీపీ ఎమ్మెల్యేలు బాల వీరాంజనేయస్వామి, నిమ్మల రామానాయుడులు అడిగిన ప్రశ్నకు అలాంటిదేమీ లేదని మంత్రి పెద్దిరెడ్డి రామచంద్రారెడ్డి సమాధానమిచ్చారు. దీంతో టీడీపీ, వైసీపీ మధ్య వాగ్వాగం చోటుచేసుకుంది. టీడీపీ ఎమ్మెల్యేలను సభ నుంచి బహిష్కరించారు. దీనికి నిరసనగా టీడీపీ శాసనసభ ఎదుట బుధవారం ధర్నా చేపట్టింది. ప్రశ్నిస్తే అన్యాయంగా సస్పెండ్ చేస్తారా?, సస్పెన్షణ్ అన్యాయం.. అంటూ ప్లకార్డులు ప్రదర్శిస్తూ టీడీపీ ఎమ్మెల్యేలు, ఎమ్మెల్సీలు నిరసన తెలియజేసారు. ఈ కార్యక్రమంలో టీడీపీ అధినేత చంద్రబాబు, నారా లోకేష్, ఇతర ఎమ్మెల్యేలు, ఎమ్మెల్సీ అందరూ పాల్గొన్నారు. మరోవైపు, శాసనసభలో ప్రతిపక్ష నేత చంద్రబాబుపై సీఎం జగన్ ఆగ్రహం వ్యక్తం చేశారు. ప్రతి అంశాన్ని అడ్డుకోవడానికి ప్రతిపక్ష నేత ప్రయత్నిస్తున్నారని సీఎం మండిపడ్డారు. తాము మేనిఫెస్టోను పవిత్ర గ్రంథంగా భావిస్తున్నామని, దానిని చూసే ప్రజలు తమకు ఓట్లేశారని జగన్ వ్యాఖ్యానించారు. రబీలో రైతులను ఆదుకోవాలని అక్టోబర్‌లోనే పెట్టుబడి సాయం అందించాలనుకుంటున్నామని పేర్కొన్నారు. తమను అభినందించాల్సింది పోయి వ్యాఖ్యలను వక్రీకరిస్తున్నారని మండిపడ్డారు. సభలో చర్చ జరపాలన్న ఉద్దేశం ప్రతిపక్షానికి లేదని, ప్రజలకు మంచి చేయాలనే ఆలోచనే చంద్రబాబుకు లేదంటూ జగన్ దుమ్మెత్తిపోశారు.
By July 24, 2019 at 10:41AM
No comments