పీపీఏలపై జగన్ నిర్ణయం.. ఝలక్ ఇచ్చిన ఎన్టీపీసీ!

సోలార్, పవన్ విద్యుత్ కొనుగోళ్ల ఒప్పందంలో గత ప్రభుత్వం అక్రమాలకు పాల్పడిందని భావిస్తోన్న ముఖ్యమంత్రి వైఎస్ జగన్‌మోహన్ రెడ్డి వాటిని సమీక్షించాలని నిర్ణయించిన విషయం తెలిసిందే. అయితే, వీటిని సమీక్షించే ఆలోచన విరమించుకోవాలని, దీని వల్ల పెట్టుబడులపై తీవ్ర ప్రభావం చూపుతుందంటూ కేంద్రం రెండుసార్లు లేఖలు రాసింది. తాజాగా, కేంద్ర ప్రభుత్వ రంగ సంస్థ నేషనల్ థర్మల్ పవర్ కార్పొరేషన్ (ఎన్టీపీసీ) ఏపీ ప్రభుత్వానికి షాక్ ఇచ్చింది. సోలార్ విద్యుత్తు ధరలు తగ్గించడం కుదరదని ఆ సంస్థ తేల్చి చెప్పింది. పోటీ విధానంలోనే టెండర్లను ఆహ్వానించి, పారదర్శకంగా వాటిని ఖరారు చేశామని ఏజీఎం (కమర్షియల్) ఇషాపౌల్‌ ఉప్పల్‌ స్పష్టం చేశారు. టెండర్ల ప్రక్రియలో అప్పటి మార్కెట్‌ ధరలకంటే తక్కువకే ఒప్పందాలు కుదుర్చుకున్నామని పేర్కొన్నారు. పీపీఏలపై సమీక్షకు రాష్ట్ర ప్రభుత్వం ఉన్నతస్థాయి సంప్రదింపుల కమిటీని నియమించిన సంగతి తెలిసిందే. 2014 నుంచి ధరలు తగ్గించి బిల్లులు పంపాలని, లేదంటే తమ ముందు హాజరు కావాలని విద్యుత్తు సరఫరా చేసే కంపెనీలకు ఏపీఎస్పీడీసీఎల్‌ లేఖలు రాసింది. ఇందులో ఎన్టీపీసీ, కార్పొరేషన్ ఆఫ్ ఇండియా కూడా ఉన్నాయి. ఏపీఎస్పీడీసీఎల్ రాసిన లేఖకు స్పందించిన ఎన్టీపీసీ సమాధానం ఇచ్చింది. జులై 17న రాసిన లేఖను కూడా ప్రస్తావించడం గమనార్హం. ఏపీఎస్పీడీసీఎల్‌, ఏపీఈపీడీసీఎల్‌‌తో తాము కుదుర్చుకున్న కొనుగోలు ఒప్పందాలు సెంట్రల్ ఎలక్ట్రికల్ రెగ్యులేటరీ అథారిటీ ఖరారు చేసిన ధర కంటే తక్కువగా ఉన్నాయని ఎన్టీపీసీ తన లేఖలో వివరించింది. అనంతపురం జిల్లా ఎన్‌పీ కుంట వద్ద ఈపీసీ విధానంలో 250 మెగావాట్ల సామర్థ్యంతో సౌర విద్యుత్ ప్రాజెక్టు ఏర్పాటుకు 2014 సెప్టెంబరు 26న టెండర్లు పిలిచినట్టు పేర్కొంది. దీనికి మొత్తం ఎనిమిది మంది బిడ్ దాఖలు చేయగా వారిలో అర్హులైన నలుగురిని ఎంపిక చేసినట్టు తెలిపింది. ఆర్‌ఈసీ టారిఫ్‌ ప్రకారం యూనిట్‌కు రూ.7.72 ఉంటే తాము రూ.6.16 చొప్పున నిర్ణయించామని వెల్లడించింది. అలాగే కర్నూలు మెగా సోలార్‌ పార్కు ఏర్పాటుకు అంతర్జాతీయ పోటీ బిడ్డింగ్‌లు ఆహ్వానించి యూనిట్‌కు రూ.4.63 చొప్పున ఇచ్చే వారిని ఎంపిక చేశామని పేర్కొంది. ఆ సమయంలో ఇదే అతి తక్కువ టారిఫ్‌గా గుర్తింపు పొందిందని ఎన్టీపీసీ తన లేఖలో వివరించారు. వీటితో పాటు పలు ప్రాజెక్టుల ఏర్పాటుకు చేసుకున్న ఒప్పందాలను ప్రస్తావించారు. పారదర్శక విధానంలో ఎన్టీపీసీ చేపట్టే ప్రాజెక్టులకు ఎన్నో పురస్కారాలు, ప్రశంసలు లభించాయని ఉప్పల్‌ స్పష్టం చేశారు. రెండు రోజుల కిందటే తమకు ఆపేసిన బకాయిలు చెల్లించాలని, లేదంటూ న్యాయపరమైన చర్యలు తప్పవంటూ ఇదే అంశంపై ఎన్టీపీసీ, ఎస్‌ఈసీఐలు లేఖలు రాశాయి. నిబంధనల ప్రకారం కుదిరిన ఒప్పందాలను గౌరవించాలని, సమీక్షిస్తాం, ధరలు తగ్గిస్తామంటూ కుదరదంటూ ఘాటుగా స్పందించాయి. అలాగే టారిఫ్ సంప్రదింపులపై సోమవారం జరిగిన సమావేశానికి ఈ రెండు గైర్హాజరయ్యాయి.

By July 24, 2019 at 09:34AM

Read More https://telugu.samayam.com/latest-news/state-news/national-thermal-power-corporation-reply-to-ap-govt-letter-on-ppas/articleshow/70356659.cms